Anusan rahvahaline rajon

Anusan rahvahaline rajon
Олонецкий национальный район (ven.)
Anuksen kanzalline piiri (livv.)
Aunuksen kansallinen piiri (suom.)
Znam (text);	Flag (text);
Valdkund	Venäma
Administrativine keskuz	Anus (lidn)
Eläjiden lugu (2016)	21,071 ristitud
Pind	3,988 km²

Anusan (Olonecan) rahvahaline rajon (venäkelel: Олонецкий национальный район, livv.: Anuksen kanzalline piiri, suom.: Aunuksen kansallinen piiri) om Venälaižen Federacijan municipaline ühtnik Karjalan Tazovaldkundan suves.

Administrativine keskuz om Anus-lidn.

Istorii[vajehta | vajehtada tekst]

Rajon om sätud vl 1927, elokun 29. päivän VCIK:an käskön mödhe. Vspäi 1930 enččen Vidlican rajonan territorii mülüb Olonecan rajonha.

Vozil 1941−1944 Suomenman sodaväged oliba rajonas.

Vspäi 2004 rajonan oficialine nimituz om «rahvahaline»-sananke.

Geografijan andmused[vajehta | vajehtada tekst]

Olonecan rahvahaline rajon om Karjalan Tazovaldkundan suvine taho. Pind — 3 988 nellikkilometrad (14nz' sija tazovaldkundas 18späi). Mecad da sod ottas territorijan ühesa kümnendest. Kavag'mecad oma enambuses (78%), sidä kesken pedajikod oma levitadud (53%).

Om röunoid 4 Venäman rajonanke:

päivnouzmas Leningradan agjan Kos'kenaluižen rajonanke;
suvipäivnouzmas Leningradan agjan Pöudon rajonanke.
lodehes Karjalan Tazovaldkundan Pit'krandan rajonanke;
pohjoižes da pohjoižpäivnouzmas Karjalan Tazovaldkundan Präžan rahvahaliženke rajonanke.

Ladog lainištab rajonan suvipäivlaskmaižid randoid läz 120 km pitte.

Reljef om tazo tobjimalaz, om ülüzid pohjoižes i päivnouzmas. Kaikiš korktemb čokkoim om Raudasine-mägi (ven.: Железная) 97 m kortte valdmeren pindan päl. Joged mülüdas Ladogan da Atlantižen valdmeren basseinha. Kaik om 11 joged i 49 järved rajonas.

Klimat om ven pehmed. Vilukun keskmäine lämuz om −9,9 C°, heinkun kesklämuz om +16,5 C°. Paneb sadegid 584 mm vodes.

Londuseližed varad oma turbaz, sauvondmaterialad (saved, letked, gravii), mineraline muju (mars-umbr), mec, kala, reskvezi.

Vspäi 2005 rajonan territorii jagase 10 municipaližeks ühtnikaks: 1 lidnankund da 9 küläkundad.

Eläjad[vajehta | vajehtada tekst]

Vn 2002 Venäman rahvahanlugemižen mödhe eläjiden lugu oli 27 034 ristitud, vl 2010 — 23 124 ristitud.

Kaik om 65 eländpunktad rajonas (vl 2005), sidä kesken üks' lidn, 8 külänvuittušt žilod da 56 küläd.

Toižed sured eländpunktad oma Il'jinskii-žilo (2,8 tuh. rist. vl 2013), Vidlic-külä (1,6 tuh. rist. vl 2013) da Tuks-külä (1,1 tuh. rist. vl 2015).

Homaičendad[vajehta | vajehtada tekst]

Irdkosketused[vajehta | vajehtada tekst]

Anusan rahvahaližen rajonan oficialine sait (olon-rayon.ru). (venäkelel)
Anusan rahvahaline rajon Karjalan Tazovaldkundan oficialižel gov.karelia.ru-saital. (venäkelel)