Belozersk

Vikipedii-späi
Belozersk
Белозерск
 Lidnanznam
 Flag
Valdkund Venäma
Eläjiden lugu (2023) 8,183 ristitud
Belozersk Белозерск
Telefonkod +7−81 756-xx-xxx
Avtokod 35
Aigvö UTC+3 (MSK+0)


Belozersk (ven.: Белозе́рск) om Venäman lidn Vologdan agjan päivlaskmas. Se om Belozerskan ümbrikon (edel vn 2022 kezakud — rajonan) administrativine keskuz.

Istorii[vajehta | vajehtada tekst]

Eländpunkt mainitase kirjutadud purtkiš ezmäižen kerdan vl 862 kuti Beloozero-lidn. Se oli olmas ende Šeksnanjogen niškan molembil randoil. Vozil 1238−1485 lidn oli Beloozeron ruhtinazkundan keskuseks, ičeohjastusenke vhesai 1380 (Kulikovon tora). Vl 1352 pošav tegihe, sauvoškatihe ut lidnad nügüdläižel sijal, 17 km päivlaskmha Šeksnanjogen niškaspäi. Vanh lidn oli olmas 15. voz'sadahasai.

Eländpunkt sai lidnan oficiališt statusad nügüdläiženke nimenke vodel 1777.

Belozerskan ižandusen päsarakod oma mecan ümbriradmine i sömtegimišton edheotandad. Kalanpüdandan edheotandad čihoziba torhuden olmatomuden tagut.

Geografijan andmused[vajehta | vajehtada tekst]

Belozersk sijadase Vaugedjärven suvižel randal, 130 m ü.m.t. keskmäižel korktusel, Volgan-Baltijanmeren vezitel (Belozerskan kanal).

Matkad Vologd-lidnhasai om 214 km suvipäivnouzmha. Lähembaine lidn om Kirillov 37 km suvipäivnouzmha orhal vai 44 km avtotedme. Lähembaine sur' lidn i passažirine raudtestancii om Čerepovec 120 km suvhe.

Klimat om ven kontinentaline. Voden keskmäine lämuz om +2,3 C°, kezakun-elokun +14,3..+17,2 C°, tal'vkun-uhokun −9,7..−11,1 C°.

Tobmuz[vajehta | vajehtada tekst]

Lidnankund oli sätud vn 2006 1. päiväl vilukud, sen ohjastuz alištui rajonadministracijale. Lidnankundan pind oli 44,58 nellikkilometrad. Se om kätud ümbrikon territorialižeks ohjanduzkundaks vn 2022 kezakuspäi.

Kaik kuz' eländpunktad mülüiba lidnankundha lidnale ližaks: nell' küläd, Kargolom-futor i Peredovik-sijaine, kaikiš suremb om Maeks-külä (474 rist. vl 2002) kahtes kilometras päivlaskmha randadme.

Jevgenii Šaškin radoi lidnankundan pämehen vn 2017 keväz'kuspäi.

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 9 616 ristitud, lidnankundan — 10 147 ristitud. Vl 2015 Belozerskan lidnankundan ristitišt oli 9 641 eläjad, heišpäi 9 172 ristitud eliba arni lidnas. Kaik 8 375 eläjad oli lidnas vl 2021. Lidnan kaikiš suremb ristitišt oli 12..12,3 tuh. eläjid vozil 1970−1996.

Rahvahad (enamba 0,4 % vl 2021): venälaižed — 96,8 %, toižed rahvahad — 2,2 %, rahvahuden ozutandata — 1,0 %.

Ortodoksižen hristanuskondan 12 pühäpertid[1] oma kaičenus i saudud lidnas: Jumalanmaman Emäganpäivän i Spasan Toižetamižen päjumalanpertid, ühesa jumalanpertid, ph. Kirill Novojezerolaižen časoun'. Niiden ližaks viž jumalanpertid ei ole kaičenus.

Belozerskan industrialiž-pedagogine kolledž[2] om lidnan professionaližen opendusen aluzkundaks.

Transport[vajehta | vajehtada tekst]

Eriližed avtoted ühtenzoittas lidnad Čerepovecanke i Vologdanke.

Lähembaine rahvahidenkeskeine aeroport om Čerepovecan lendimport, se sijadase 85 kilometrad suvhe Belozerskaspäi Čerepovecan rajonan Botovo-žilos.

Galerei[vajehta | vajehtada tekst]

Homaičendad[vajehta | vajehtada tekst]

  1. Belozerskan pühäpertid sobory.ru-saital. (ven.)
  2. Belozerskan industrialiž-pedagogižen kolledžan sait (p03601.edu35.ru). (ven.)

Irdkosketused[vajehta | vajehtada tekst]



Vologdan agjan lidnad
Babajevo | Belozersk | Čerepovec | Gräzovec | Harovsk | Kadnikov | Kirillov | Krasavino | Nikol'sk | Sokol | Sur' Ustüg | Tot'm | Ustüžn | Vitegr | Vologd