Dakar

Dakar
(Ville de) Dakar

Lidnanznam	Flag
Valdkund	Senegal
Eläjiden lugu (2023)	1,182,417 ristitud
Pind	82,38 km²
Pämez'	Soham El Vardini (sügüz'ku 2018—, Soham El Wardini)
Telefonkod	+221−8xx-xxxx
Aigvö	UTC+0

Lidnan kart (2013)

Dakar (franc.: (Ville de) Dakar [dakaʁ], volof.: Ndakaaru) om Senegalan pälidn da kaikiš suremb lidn. Se om Afrikan kontinentaližen palan kaikiš päivlaskmaižemb lidn, Dakaran agjan administrativine keskuz mugažo.

Istorii

Nügüdläižen eländpunktan aluz om pandud 1860-nzil vozil francižeks fortaks kolonijan südäiterritorijan anneksijan jäl'ghe. Vl 1902 vajehti pohjoišt Sen Lui-lidnad Francižen Päivlaskmaižen Afrikan pälidnaks. Vspäi 1960 Dakar om ripmatoman valdkundan pälidnaks.

Geografijan andmused

Lidn sijadase Kap-Ver-nemel, Atlantižen valdmeren randal, 0..104 m korktusil, 27 m ü.m.t. keskmäižel korktusel.

Klimat om subekvatorialine pol'kuiv valdmeren valatoitusenke. Meribriz puhub vodes läbi i poleneb räkän. Nepsuz om korged eskai kuivan sezonan aigan (kül'mku-kezaku, 19 mm kaikes pordos) meritullein tagut. Voden keskmäine lämuz om +24,0 C°, heinkun-redukun +26,9..+27,4 C°, tal'vkun-semendkun +19,9..+22,7 C°. Ekstremumad oma +14 C° (viluku) i +40,4 C° (keväz'ku, kül'mku). Paneb sadegid 411 mm vodes, enamba elokus-sügüz'kus (299 mm pordos), läz ei ole sagegid kül'mkus-semendkus (viž millimetrad pordos). Kun keskmäine relätivine nepsuz vajehtase 78..81 % röunoiš sulakus-redukus, 66..69 % tal'vkus-vilukus. Meriveden lämuz om +20..+27 C° kuidme.

Tobmuz

Lidnümbrikon kommunad vn 2013 kartal

Dakar jagase 19 lidnümbrikon kommunaks (franc.: communes d'arrondissement).

Lidnan edeline pämez' om Halifa Ababakar Soll (fr. Khalifa Sall, 2009−2018).

Eläjad

Vl 2011 lidnan eläjiden lugu oli 1 056 009 ristitud. Kaikiš suremb lidnan ristitišt om nügüd'. Kaik läz 3,9 mln ristituid elädas ezilidnoidenke vl 2023 (550 km², Dakaran agj, vl 2011 oli enamba 3,6 mln eläjid), valdkundan ristitišton nelländez.

Sebruzlidnad

• Azerbaidžan Baku, Azerbaidžan
• Dual, Kamerun
• Francii Marsel', Francii (vspäi 1968)
• Sfaks, Tunis (1965)
• AÜV Vašington (Kolumbijan federaline ümbrik), AÜV (1980)

Irdkosketused

• Lidnan tobmuden sait (villededakar.sn). (fr.)