Dal'nerečensk

Dal'nerečensk
Дальнереченск

Lidnanznam	Flag
Valdkund	Venäma
Eläjiden lugu (2023)	23,028 ristitud
Pind	108,49 km²
Pämez'	Sergei Starkov (kül'mku 2020—)
Telefonkod	+7−42 356-xx-xxx
Aigvö	UTC+10

Dal'nerečensk (ven.: Дальнере́ченск) om Venäman lidn Merenrandaližen randan pohjoižes. Se om kaikiš pohjoižemb da amuižemb lidn Merenrandaližes randas, Dal'nerečenskan lidnümbrikon päpala. Lidn om Dal'nerečenskan rajonan administrativižeks keskuseks mugažo, ei mülü sihe.

Istorii

Eländpunktan aluz om pandud kozakoil vl 1859 kuti Grafskai-stanic (ven.: станица Графская). Vozil 1897−1972 nimitihe Iman:aks jogen mödhe (ven.: Има́н, nüg. Sur' Ussurk), se oli kitajankel'ne nimituz. Om olmas lidnan statusanke vspäi 1917. Vspäi 1972 nimitase nügüdläižikš nevondkundaliž-kitajižen azekhan konfliktan jäl'ghe Damanskii-sarel.

Vn 2016 sügüz'kul Laionrok-taifun toi sur'vet, lidnan znamasine pala alištui upotamižele hätkiden valegiden tagut.

Dal'nerečenskan ižandusen päsarak om mecan varhapanend, ištutand i ümbriradmine (špon, AmberWood-parket). Kivivoinpompstancii om olmas.

Geografijan andmused

Lidn sijadase läz Kitain valdkundröunad, Ussuri-jogen oiktal randal i Sihote-Alinän ezimägištol, 160 m ü.m.t. keskmäižel korktusel. Habarovsk — Vladivostok-raudte i avtote läbitadas lidnad. Om 400 km matkad Vladivostokhasai suvipäivlaskmha. Lähembaine Venäman lidn om Lesozavodsk 50 km suvhe.

Klimat om ven kontinentaline. Voden keskmäine lämuz om +3,2 C°, heinku i eloku oleldas kaikiš lämhembad (+20,4..+21,4 C°), tal'vkun-uhokun lämuz kuidme om −13,7..−18,3 C°. Ekstremumad oma −42 C° (viluku) i +36,8 C° (eloku). Paneb sadegid 637 mm vodes, enamba mussonan aigan (heinku-eloku, 237 mm pordos), vähemba kül'mkus-keväz'kus (94 mm vides kus).

Tobmuz

Kaik koume žilod i Krasnojarovk-külä (ven.: Краснояровка kaikenaigaižeta ristitištota) mülüdas lidnümbrikho Dal'nerečenskan ližaks. Žilod oma Lazo (2465 rist. vl 2010), Grusevoje (410 rist.), Kol'cevoje (301 rist.). Lidnümbrikon pind om 108,49 km².

Lidnümbrikon tobmuden pämez' om sen Administracijan pämez'. Edeline lidnan pämez' om Sergei Vasil'jev, radoi vn 2020 kül'mkuhusai. Lidnümbrikon Duman ezimez' om Aleksandr Pavlov vn 2014 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 27 604 ristitud, kaiken lidnümbrikon — 30 780 ristitud, vn 2021 lidnalaižen lugu oli 23 613 ristitud. Kaik 26 121 eläjad oli lidnas vl 2017. Kaikiš suremb lidnan ristitišt oli 39,7 tuhad eläjid vl 1996.

Ortodoksižen hristanuskondan kaks' pühäpertid oma avaitud lidnas: Spasan Londuseližen Mel'kuvan jumalanpert' (om saudud vl 1913, muzei sijazihe siš nevondkundaližen aigan) i Raštvoiden časoun'.

Tegimištoliž-tehnologine kolledž om lidnan professionaližen üläopendusen aluzkundaks.

Galerei

• 
  Lidnan administracijan sauvuz (2012)
• 
  Spasan londuseližen mel'kuvan jumalanpert', vn 2012 nägu
• 
  Sodakomissariat (2012, ende «Kunst&Albers»-torguindkodin sauvuz)
• 
  «Vostok»-kul'turkeskuz (Päivnouzm)
• 
  Dal'nerečensk I-päraudtestancijan sauvuz vl 2012

Irdkosketused

• Dal'nerečenskan lidnanümbrikon tobmuden sait (dalnerokrug.ru). (ven.)