Mozdok

Vikipedii-späi
Mozdok
Моздок (ven.)
Мæздæг (oset.)
 Lidnanznam
 Flag
Valdkund Venäma
Eläjiden lugu (2022) 40,976 ristitud
Pind 17,5 km²
Mozdok Моздок (ven.) Мæздæг (oset.)
Pämez' Zaurbek Demurov
(semendku 2021—,
velgusentäutai)
Telefonkod +7−86 736-xx-xxx
Avtokod 15
Aigvö UTC+3 (MSK+0)


Mozdok (ven.: Моздо́к, oset.: Мæздæг) om Venäman lidn da lidnankund Pohjoižosetijan — Alanijan Tazovaldkundan pohjoižes. Se om tazovaldkundan kahtenz' surtte lidn, Mozdokan rajonan administrativine keskuz.

Istorii[vajehta | vajehtada tekst]

Eländpunktan aluz om pandud vl 1763 kuti äirahvahaline lidnuz kabardalaižiden mas, kesked Mezdog-mectarhad (ven.: урочище Мездога). Vl 1770 kozakoiden 517 kanzad oliba sirtud sihe Volgan randpolespäi, Emil'jän Pugačovan pereh heiden keskes, valitihe Pugačovad Terekan sodavägen atamanaks.

Trakt ühtenzoiti Mozdokad Tiflisanke 1780-nzil vozil. Forštadt lidnusenke saiba Kavkazan gubernijan makundan lidnan statusad vl 1785. Mozdok šingotihe da änikoiči 19. voz'sadan ezmäižel nelländesel, oli järedaks torguindan keskuseks, tegimed radoiba pästamha muilad, vinad, karasinad, möihe kaikedme imperijadme. Sirtihe traktad polehe vl 1825, i änikoičend tuli lophu. Vl 1835 tühjitadihe Mozdokan lidnust.

Vl 1913 raudte tuli lidnha. Mozdok oli nacistižen Germanijan okkupacijan al nell' kud (23. eloku 1942 — 3. viluku 1943), se toi lujid vigoid ižandusele. Vspäi 1944 lidn om Pohjoižosetijan palaks.

Mozdokan ižandusen päsarakod oma sömtegimišt (pästtas vinad, lihaproduktoid, leibäd) i tekstil'tegimišt (gardinoiden fabrik[1], omblendfabrik), mugažo biopreparatoiden tegim i kartonfabrik oma olmas.

Geografijan andmused[vajehta | vajehtada tekst]

Lidn sijadase tazovaldkundan pohjoižen pol'anklavan keskuses, Terek-jogen hural randal, 130 m keskmäižel korktusel valdmeren pindan päl, mecan da stepin zonas. Matkad Vladikavkazhasai om 84 km suvhe orhal vai 95 km avtotedme. Terekan da Kuman kanal augotase suvipäivlaskmha lidnaspäi. Lähembaine lidn om Ingušetijan Malgobek 30 km suvhe orhal.

Mozdok om lidnankundan üks'jäine eländpunkt. Lidnankundan pind om 35 km².

Eläjad[vajehta | vajehtada tekst]

Vn 2010 kaiken Venäman rahvahanlugemižen mödhe eläjiden lugu oli 38 768 ristitud, rajonan ristitišton pol'. Vl 2017 lidnan ristitišt oli 41 409 eläjad. Kaikiš suremb ristitišt oli läz 43 tuhad eläjid vozil 2002−2003 i 42 155 eläjad vl 2019.

Rahvahad (enamba 1% vl 2010): venälaižed — 59,1%, osetinalaižed — 8,3%, kumikad — 7,1%, armenijalaižed — 6,2%, čečenalaižed — 3,5%, kabardalaižed — 3,2%, turkad — 2,0%, korejalaižed — 2,0%, ukrainalaižed — 1,5%, toižed rahvahad — 5,6%, rahvahuden ozutandata — 1,5%.

Ortodoksižen hristanuskondan Jumalanmaman Emäganpäivän jumalanpert'[2] (oset.: Мадымайрæмы дзуар) i kaks' časounäd, protestantizman (pesviterianižuz i evangelistad) kaks' jumalanpertid-tulendad i islaman kaks' mečetid oma olmas lidnas.

Professionaližen opendusen aluzkundad: Mozdokan mehaniž-tehnologine tehnikum[3], Mozdokan agrariž-tegimištoline tehnikum[4], Vladikavkazan Agrarižen mägiuniversitetan filial.

Edeližed lidnan pämehed (Administracijan pämehed) oma Sergei Džanžakov (2012 — reduku 2017) i Taimuraz Buraev (reduku 2017 — semendku 2021).

Transport[vajehta | vajehtada tekst]

Avtobusad da taksid oma kundaližeks transportaks lidnas. Mozdok-raudtestancii seižub «ProhladniiGudermes»-jonol.

Venäman strategine sodalendimport sijadase lidnan lodehližen röunan taga.

Galerei[vajehta | vajehtada tekst]

Homaičendad[vajehta | vajehtada tekst]

  1. «Mozdokskije uzori»-edheotandan sait (mozdok-uzor.ru). (ven.)
  2. Mozdokan pühäpertid sobory.ru-saital. (ven.)
  3. Mozdokan mehaniž-tehnologižen tehnikuman sait (mmtt.aln.eduru.ru). (ven.)
  4. Mozdokan agrariž-tegimištoližen tehnikuman sait (mapt-mozdok.ru). (ven.)

Irdkosketused[vajehta | vajehtada tekst]



Pohjoižosetijan — Alanijan Tazovaldkundan lidnad
Alagir | Ardon | Beslan | Digor | Mozdok | Vladikavkaz