Sajanogorsk

Vikipedii-späi
Sajanogorsk
Саяногорск (ven.)
Наа Сойан Тура (hak.)
 Lidnanznam
 Flag
Valdkund Venäma
Eläjiden lugu (2021) 44,872 ristitud
Pind 19 km²
Sajanogorsk Саяногорск (ven.) Наа Сойан Тура (hak.)
Pämez' Jevgenii Molodnäkov
(sügüz'ku 2022—)
Telefonkod +7−39 042-xx-xxx
Avtokod 19
Aigvö UTC+7 (MSK+4)


Sajanogorsk (hak.: Наа Сойан Тура, ven.: Саяного́рск) om Venäman lidn da lidnümbrik Hakasijan Tazovaldkundan päivnouzmaižes sen röunanno. Se om Hakasijan koumanz' surtte lidn.

Istorii[vajehta | vajehtada tekst]

Eländpunktan aluz om pandud vl 1830 kuti Označennoje-külä kaičemha Venäman röunad. Vozil 1965−1975 šingotihe sidä lidnanvuččeks žiloks sauvomha järedad gidroelektrostancijad, miše sada alüminijad. Vl 1975 žilo sai lidnan statusad nügüdläiženke nimenke.

Sajanogorsk ižandusen päsarakod oma alüminijan da sen ühthesuladusiden pästand (kaks' alüminijantegint[1][2]), gidroenergetik (Sajanan-Šušenskojen GES vspäi 1978), mugažo alüminijasižen pakuitesen tegim i maidtegim ratas lidnas.

Geografijan andmused[vajehta | vajehtada tekst]

Lidn sijadase Jenisei-jogen hural randal, Päivlaskmaižen Sajanan pautkidenno 300 m ü.m.t. korktusel, stepin zonas. Matkad Abakanhasai om 80 km pohjoižhe. Om ümbärtud Bejan rajonal.

Sajanogorsk jagase kümneks lidnanlaptaks. Lähižed lidnanvuiččed Čerömuški-žilo (7382 rist. vl 2021) i Main-žilo (ven.: Майна, 4325 rist. vl 2021) mülüdas lidnümbrikho Sajanogorskan ližaks.

Eläjad[vajehta | vajehtada tekst]

Vn 2010 kaiken Venäman rahvahanlugemižen mödhe lidnan eläjiden lugu oli 49 887 ristitud, lidnümbrikon — 63 322 ristitud. Vodele 2017 lidnan ristitišt poleni 47 983 eläjhasai, lidnümbrikon — 61 013 ristithusai. Kaikiš suremb lidnan ristitišt oli 56 tuhad eläjid vl 1996.

Ortodoksižen hristanuskondan koume pühäpertid[3] oma letud lidnas: Eläban Eziauguižen Stroican jumalanpert' (letihe vll 1992−1999), Jumalanmaman Tulendan Pühäpertihe jumalanpert' (1997−2003, ei ole rados) i Jumalanmaman Nägundan Sergii Radonežalaižele časoun' (2011). Niiden ližaks koume jumalanpertid om lidnümbrikon žiloiš.

Sajanogorskan politehnine tehnikum[4] i privatine «STEMI»-tehnikum[5] oma lidnan professionaližen opendusen aluzkundoikš.

Edeližed lidnümbrikon pämehed (sen Administracijan pämehed) oma Mihail Valov (sügüz'ku 2018 — kezaku 2022) i Leonid Bikov (viluku 2004 — sügüz'ku 2018).

Galerei[vajehta | vajehtada tekst]

Homaičendad[vajehta | vajehtada tekst]

  1. Sajanogorskan alüminijantegim rusal.ru-saital. (ven.)
  2. Hakasijan alüminijantegim rusal.ru-saital. (ven.)
  3. Sajanogorskan pühäpertid sobory.ru-saital. (ven.)
  4. Sajanogorskan politehnižen tehnikuman sait (spt19.ru). (ven.)
  5. Sajanan «STEMI»-tehnikuman sait (стэми.рф). (ven.)

Irdkosketused[vajehta | vajehtada tekst]



Hakasijan Tazovaldkundan lidnad
Abakan | Abaz | Černogorsk | Sajanogorsk | Sorsk