Sortaval

Vikipedii-späi
Sortaval
Сортавала (ven.)
Sortavala (karj. i suom.)
 Lidnanznam
 Flag
Valdkund Venäma
Eläjiden lugu (2016) 18,746 ristitud
Pind 10 km²
Sortaval Сортавала (ven.) Sortavala (karj. i suom.)
Pämez' Sergei Krupin
(velgusentäutai,
sügüz'ku 2015—)
Telefonkod +7−81 430
Avtokod 10
Aigvö UTC+3 (MSK+0)


Sortaval (ven.: Сортавала, edel 1918. vot Сердоболь; karj. i suom.: Sortavala, roč.: Sordavala) om Venäman lidn Karjalan Tazovaldkundan suvipäivlaskmas. Se om Sortavalan rajonan administrativine keskuz da üks'jäine lidn. Rajonan ristitišton koume videndest eläb lidnas. Vspäi 1991 se om olmas Venäman istorižen lidnan statusanke.

Istorii[vajehta | vajehtada tekst]

Eländpunkt mainitase ezmäižen kerdan venälaiž-ročižes röunaktas vl 1468: «Ei pida toda nimittušt pahut Sortevalha».

Vozil 1617−1721 nügüdläižen lidnan territorii oli Ročinman palaks Stolbovon kožundaktan mödhe. Vl 1632 Sordavall-lidn (roč.: Sordavalla) om pandud läz Serdovolin pagastad ročin Gustavan II kunigahan käskön mödhe. Vspäi 1721 Pohjoižen sodan jäl'ghe Sortaval oli muretud lujas, kadoti lidnan statusad, nimitihe sidä Serdobolikš (ven.: Сердоболь) da mülütihe Venäman imperijha Ništadtan kožundaktan mödhe. Serdobol' oli Piterin gubernijan Viipurin provincijan, vspäi 1744 — Viipurin gubernijan palaks vhesai 1812. Vl 1783 eländpunkt sai lidnan statusad tošti.

Vl 1812 eländpunkt kuti Viipurin gubernijan pala oli mülünu Suomenman surhe ruhtinazkundha, vspäi 1917 — Suomenmaha. Vn 1893 kül'mkus raudte tuli lidnha, se tegihe «ViipurJogensu»-raudtekeskustan palaks. Vspäi 1900 mašiništonsauvomižtegim zavodi radod.

Sortaval om Karjalan palaks Tal'vsodan jäl'ghe, vspäi 1940.

Sortaval šingotase leibäntegimel.

Geografijan andmused[vajehta | vajehtada tekst]

Lidn sijadase rajonan suvipäivnouzmas, seižub Ladoganjärven pohjoižel randištol. Ladogan Rijekkalan- da Valaam-sared mülüdas Sortavalan lidnankundha. Matkad lidnaspäi Petroskoihesai om 195 km orhal päivlaskmha, 247 km A121-avtotedme. Matkad Piterihesai om 197 km orhal suvhe, 271 km avtotedme. Lähembaine lidn om Lahdenpohj, 33 km suvipäivlaskmha orhal, 42 km avtotedme.

Kaik üks'toštkümne žilod mülüdas Sortavalan lidnankundha, niiden ühthine ristitišt om 1 165 eläjad vl 2016.

Tobmuz[vajehta | vajehtada tekst]

Järgenduseližed valičendad lidnankundan Nevondkundha (ven.: Совет поселения) oliba vn 2013 sügüz'kun 8. päiväl (koumanz' kucund). Kaik rahvaz valičeb sen 15 ezitajad nelläks vodeks.

Vs 2015 sügüz'kun 13. päiväspäi Sergei Krupin om valitud da tegeb lidnankundan pämehen (sen Nevondkundan ezimehen) velgusidme[1]. Hän-žo radab Sortavalan rajonan pämehen (sen Nevondkundan ezimehen) vs 2013 redukun 16. päiväspäi. Kaks' lidnankundan varapämest alištudas hänele. Sortaval-lidnankundan administracii kogoneb koumes palakundaspäi.

Eläjad[vajehta | vajehtada tekst]

Vl 1910 lidnan eläjiden lugu oli 3 085 ristitud. Kaikiš suremb ristitišt oli 22 800 eläjad vl 1992. Vn 2010 kaiken Venäman rahvahanlugemižen mödhe lidnan eläjiden lugu oli 19 235 ristitud.

Petri Šemeikkan muštpacaz om pandud Sortavalha, mez' oli tetaban karjalaižen runonpajatajan 19. voz'sadal.

Sortavalan kolledž[2] om lidnan professionaližen opendusen aluzkundaks.

Galerei[vajehta | vajehtada tekst]

Homaičendad[vajehta | vajehtada tekst]

  1. Руководители района (Rajonan ohjandajad). — Sortavalan rajonan oficialine sait (рк-сортавала.рф). (ven.)
  2. Sortavalan kolledžan sait (sk-karelia.ru). (ven.)

Irdkosketused[vajehta | vajehtada tekst]



Karjalan Tazovaldkundan lidnad
Anus-lidn | Belomorsk | Kem' | Kondopog | Kostamukš | Lahdenpohj | Medvežjegorsk | Petroskoi | Pit'krand | Pudož | Segež | Sojärv | Sortaval