Černogorsk

Černogorsk
Черногорск (ven.)
Харатас (hak.)
Lidnanznam;	Flag;
Valdkund	Venäma
Eläjiden lugu (2021)	75,745 ristitud
Pind	117,87 km²
Pämez'	Vasilii Belonogov; (uhoku 2010—)
Telefonkod	+7−39 031-xx-xxx
Avtokod	19
Aigvö	UTC+7 (MSK+4)

Černogorsk (hak.: Харатас, ven.: Черного́рск) om Venäman lidn da lidnümbrik Hakasijan Tazovaldkundas. Se om tazovaldkundan kahtenz' surtte lidn, Abakan-pälidnan pohjoine kaimdailidn.

Istorii

Eländpunktan aluz om pandud vl 1907 kuti Černogorskije Kopi-žilo samha kivihil't. Vl 1936 ühtištadihe žilod lähevenujidenke kaivuzžiloidenke da anttihe lidnan statusad udenke nügüdläiženke nimenke. Vll 1942−1955 kävutihe türmatud mehiden radod kaivuziš, heiden lugumär saihe 12 tuhazesai aigoidme.

Černogorskan ižandusen päsarak om kivihilen samine tähäsai, mugažo kohenduzmehanine tegim radab (SUEK-kompanijan pala vspäi 2023, kaivuzmašinoiden paloiden valamine), om sauvondan kompanijoid, sauvondmaterialiden pästand tegese (raudbetontegesiden tegim^[1], savičun tegim om sauvomas^[2]), bentonitan edheotand^[3] om avaitud sijaližel torhudel, sömtegimišton edheotandad (olud, konditerižed tegesed), gofrokartonpakuitesen tegim.

Geografijan andmused

Lidn seižub tazovaldkundan päivnouzmas, vides kilometras Jenisei-jogen hural randalpäi, Minusinskan katl'uses, 260 m ü.m.t. keskmäižel korktusel.

Matkad lidnan röunaspäi Abakanan röunhasai om viž kilometrad suvhe. Lidnanvuitte Ust'-Abakan-žilo sijadase Černogorskan da Jenisein keskes.

Tobmuz

Lidnanvuitte Prigorsk-žilo mülüb Černogorskan lidnümbrikho mugažo (2392 rist. vl 2017).

Lidnümbrikon tobmuden pämez' om sen Administracijan pämez'. Lidnan Deputatoiden nevondkundan ezimez' om Tatjana Gricaenko vn 2012 keväz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 72 147 ristitud. Kaik 74 698 eläjad oli lidnas vl 2017. Kaikiš suremb ristitišt lidnan oli läz 80 tuhad eläjid vozil 1986−1998 i 75 419 eläjad vl 2020.

Ortodoksižen hristanuskondan seičeme pühäpertid^[4] oma saudud lidnas: viž jumalanpertid, valatusiden pühäpert' i časoun'.

Lapsiden opendusen aluzkundad oma 25 päivkodid, 12 školad, viž ližaopendusen aluzkundad. Černogorskan mehaniž-tehnologine tehnikum^[5] i kaivuzsauvondan tehnikum^[6] oma lidnan professionaližen opendusen aluzkundoikš.

Galerei

Muštnik ezmäižen kaivuden Vera Balandina-alusenpanijale (2013)
Muštnik pölištunuzile kaivajile i Pühän Jumalanmaman sündundan jumalanpert' (om saudud vll 1989−1992) tagamal, vn 2013 nägu
Muštnik Birm-garnizonan sodaaviaškolan lendajile vl 2013
Škol nomer nell' (2006)
Znam lidnan röunal vl 2002