Žukovskii (lidn)

Žukovskii
Жуковский

Lidnanznam	Flag
Valdkund	Venäma
Eläjiden lugu (2024)	110,083 ristitud
Pind	47,29 km²
Pämez'	Andronik Pak (semendku 2025—)
Telefonkod	+7−49 848-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Žukovskii (ven.: Жуко́вский) om Venäman lidn da lidnümbrik Moskvan agjan keskuzpalan suvipäivnouzmas. Se Moskvan suvipäivnouzmaižeks ezilidnaks, agjan 17..19nz' lidn eläjiden lugun mödhe. Om tedolidnan statusanke vn 2007 vilukuspäi.

Istorii

Edeližed eländpunktad lidnan territorijal oliba Novoroždestveno-žilo, Kolonec-külä i Bikovo-žilon istorine pala. Projektiruihe Kazanin kahtent päraudtestancijad siš tahondas i sauvoškanzihe järedan raudtesol'men sauvusid edel Ezmäšt mail'man sodad, se soda azoti sauvomišt.

Nügüdläižen eländpunktan aluz om pandud vl 1935 sauvomha aerodinamižid kodvindtorvid tedoinstitutanke. Vl 1935 uz' žilo sai Stahanovo-nimed (ven.: Стаха́ново) Donbassan Aleksei Stahanov-kaivajan oiktastuseks. Radnikžilo sai lidnan statusad vn 1947 23. päiväl sulakud, udesnimitihe Venäman imperijan Nikolai Žukovskii-tedomehen kanzannimen mödhe, aerodinamikan alusenpanijan.

Žukovskii šingotase aviaraketižen tehnikan kudel tedokeskusel i eksperimentaližel tegimel, mašinansauvomižen tegimel (eriline aviatehnik, lämbitusen ladimed, lehtraudaine pakuitez), sauvondmaterialiden pästandal (punümbriradai tegim, iknad, alüminijasižed konstrukcijad, lämuzizoläcii, čomamahtol'žen valandan tegim), sömtegimištol (leibän edheotand, «Nestle»-kompanijan jähižen tegim). Rahvahidenkeskeine aviakosmine salon vedase lidnas joga paratomal vodel elokus.

Geografijan andmused

Žukovskii-lidnümbrikon sijaduz agjas vn 2023 kartal

Lidn sijadase Moskvanjogen hural randal tobjimalaz, 130 m ü.m.t. keskmäižel korktusel.

Matkad Moskvhasai (Moskvan rengazavtotehesai) om kaks'kümne kilometrad päivlaskmha-lodeheze. Lähembaižed lidnad oma Ramenskoje ani päivnouzmha da suvipäivnouzmha aerodroman taga, Litkarino 12 km päivlaskmha, Dzeržinskii, Kotel'niki i Lüberci 12 km lodeheze.

Tobmuz

Lidnan planiruindan rajonad (2010)

Žukovskii om lidnümbrikon üks'jäižeks eländpunktaks. Om ümbärtud Ramenskojen municipaližen ümbrikon territorijal kaikiš polišpäi.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Boris Aubakirov (tal'vku 2023 — semendku 2025), Jurii Prohorov (kül'mku 2018 — tal'vku 2023). Jurii Prohorov radab lidnümbrikon Deputatoiden nevondkundan ezimehen vn 2023 tal'vkuspäi. Edeližed lidnan nevondkundan ezimehed oma Boris Aubakirov (reduku 2019 — tal'vku 2023), Sergei Räzanov (kül'mku 2018 — reduku 2019), Andrei Voitük (radoi vn 2018 kül'mkuhusai).

Eläjad

Vl 1939 žilon ristitišt oli 10 785 eläjad, vl 1959 lidnan — 41 748 eläjad. Vn 2010 Venäman rahvahanlugemižen mödhe lidnan eläjiden lugu oli 104 736 ristutud, vn 2021 — 111 222 ristitud. Kaik 108 980 eläjad oli lidnas vl 2017. Kaikiš suremb ristitišt om nügüd', se ületi 100 tuhad vl 1989.

Rahvahad (2010): venälaižed — 85,7 %, ukrainalaižed — 1,2 %, toižed rahvahad — 3,0 %, rahvahuden ozutandata — 10,1 %.

Ortodoksižen hristanuskondan kahesa pühäpertid oma saudud lidnas: seičeme jumalanpertid i časoun'.

Openduz

Lapsiden opendusen aluzkundad oma päivkodid, aluzškol nomer 15 venän etnokul'turkomponentanke, kaks'toštkümne keskškolad (nomer 2..13), gimnazii nomer 1, licei nomer 14, ehtal'ne keskškol, joudai škol, škol-internat, lapsiden sädamižen keskuz, kaks' čomamahtoiden školad, koume sportkeskust (sportkazvatandan Podvig «Vägitego», borcuindsportan «Spektr», noriden päzutajiden).

Professionaližen opendusen aluzkundad oma Žukovskijan Aviatehnikum V. A. Kazakovan nimed, Lendajiden-kodvijoiden škol, üläopendusen aluzkundoiden kaks' filialad (Moskvan aviainstitut i Moskvan fiziž-tehnine institut).

Transport

Avtobusad oma kundaližeks transportaks lidnas: kuz' maršrutad lidnadme i seičeme ühtenzoittas lähižidenke lidnoidenke. Tramvailikund linneb vn 2010 lidnan generaližen planan mödhe.

Rahvahidenkeskeine soda- da civiline Žukovskii-lendimport (ZIA / РНУ / UUBW / УУБВ, 1,1 mln passažiroid vl 2018) radab lidnan suvipäivnouzmas vspäi 2016. Bikovo-lendimport radoi vll 1933−2010 ühtennimižes žilos ani lodeheze lidnaspäi.

Otdih-raudteplatform radab lidnan pohjoižes vspäi 1932, elektrojonused ajadas Kazanin päraudtestancijaspäi, toižed platformad oma Il'jinskai i Kratovo lähižiš žiloiš.

Galerei

• 
  Lidnan tobmuden pert' i Aerogidrodinamikan tedoinstitut (sulaku 2006)
• 
  Koume jumalanpertid, vn 2012 nägu
• 
  Valdkundaližen Centrospas-päzutandjoukun päsijaduz vl 2013
• 
  Lidnan kul'turkeskuz i punolendimiden ištutandtaho Leninan torgul (2022)
• 
  «Meteor»-stadion (2006)
• 
  Rahvahidenkeskeižen Žukovskii-lendimportan sauvuz vn 2018 elokus

Irdkosketused

• Lidnan tobmuden aluzkundoiden oficialine sait (zhukovskiy.ru). (ven.)