Bagrationovsk

Bagrationovsk
Багратионовск
Lidnanznam;	Flag;
Valdkund	Venäma
Eläjiden lugu (2020)	6,388 ristitud
Pind	10,7 km²
Pämez'	Jurii Karafelov; (sügüz'ku 2016—)
Telefonkod	+7−40 156-xx-xxx
Avtokod	39, 91
Aigvö	UTC+2 (MSK−1)

Bagrationovsk (ven.: Багратио́новск, pol'š. i saks.: Bagrationowsk; edel 1946. vot — Preisiš Eilau, saks.: Preußisch Eylau) om Venäman lidn Kaliningradan agjan suvipäivlaskmas. Se om Bagrationovskan lidnümbrikon administrativine keskuz. Valdkundröunzonan režim om väges lidnas.

Istorii[redaktiruida | redaktiruida purde]

Eländpunktan aluz om pandud kuti Tevtonan ordenan zamk-varmitez vl 1325, žilo senno — vl 1336. Se sai lidnan oiktusid vl 1585. Vl 1807 7.-8. päivil uhokud tora tegihe lidnanno Francijan i Venäman-Prussijan sodavägiden keskes. Vl 1866 raudte ühtenzoiti lidnad Königsberganke i Bartenštainanke (nüg. Pol'šanmas, heittihe raudted valdkundröunan rajonas). Suren sodan aigan vn 1945 10. päiväl uhokud Rusked Armii anasti lidnad. Nimitihe venämalaižen Pötr Bagration-jenaralan muštoks — vn 1807 toran sodavejan.

Bagrationovsk šingotase mašiništonsauvomižel (torguind- i vilugoitimmašiništ), sömtegimištol (lihakombinat) i zell'tegimel, mugažo mebel'edheotand radab.

Geografijan andmused[redaktiruida | redaktiruida purde]

Lidn sijadase Pol'šanman röunanno, 70 m ü.m.t. keskmäižel korktusel. «Bagrationovsk — Bezledi»-röunpäličmänendtaho om 300 metras suvipäivnouzmha lidnaspäi. Matkad Kaliningradhasai om 37 km pohjoižhe orhal vai 40 km avtotedme. Toižed lähembaižed lidnad oma Laduškin 36 km lodeheze orhal vai 50 km avtol i Bartošice (Pol'šanma) 17 km suvipäivnouzmha orhal vai avtotedme. Pened Langer- i Varškaiterskoje-järved sijadasoiš Bagrationovskas.

Kaik 87 žilod mülüdas lidnümbrikho Bagrationovskan ližaks. Lidnümbrikon pind — 1019,88 km².

Eläjad[redaktiruida | redaktiruida purde]

Vn 2010 Venäman rahvahanlugemižen mödhe lidnan eläjiden lugu oli 6 400 ristitud, lidnümbrikon (edel 2016. vot — rajonan) videndez. Kaikiš suremb lidnan ristitišt oli 7 461 eläjad vl 1939 i 7 400 eläjad vll 1998−2001. Kaik 6 409 eläjad oli lidnas vl 2017.

Rahvahad (lidnan eläjad, enamba 0,3 % vl 2010, ozutadud rahvahudenke): venälaižed — 89,0 %, ukrainalaižed — 3,7 %, vaugedvenälaižed — 3,0 %, armenijalaižed — 0,9 %, saksalaižed — 0,6 %, totarlaižed — 0,5 %, azerbaidžanlaižed — 0,5 %, litvalaižed — 0,5 %, pol'šanmalaižed — 0,3 %, toižed rahvahad — 1,0 %.

Ortodoksižen hristanuskondan kaks' pühäpertid^[1] oma avaitud lidnas: phh. Veran, Nadeždan i Lübovin da heiden Sofija-maman jumalanpert' (letihe vll 1993−1997), phh. Borisan da Gleban časoun' (vspäi 2005).

Lähembaižed professionaližen opendusen aluzkundad ratas Kaliningradas. Vll 1966−1975 KGB:n sodatehnine škol radoi lidnas, vspäi 1975 Bagrationovskan seržantmülükundan škol oli olmas.

Galerei[redaktiruida | redaktiruida purde]

Lidnümbrikon administracijan i erasiden-se federaližiden aluzkundoiden palakundoiden sauvuz (2011)
Jumalanpert', vn 2001 nägu
Ricariden (Preisiš-Eilaun) zamk vl 2009
Kul'turkeskuz, čomamahtoiden škol lapsiden täht, kodirandan istorijan muzei (2010)
Monument Venäman i Pol'šanman röunal (1995)

Homaičendad[redaktiruida | redaktiruida purde]

↑ Bagrationovskan pühäpertid sobory.ru-saital. (ven.)

Irdkosketused[redaktiruida | redaktiruida purde]

Lidnümbrikon tobmuden aluzkundoiden oficialine sait (bagrationovsk.gov39.ru). (ven.)

Bagrationovsk Vikiaitas

	Kaliningradan agjan lidnad
	Bagrationovsk \| Baltiisk \| Černähovsk \| Gur'jevsk \| Gusev \| Gvardeisk \| Kaliningrad \| Krasnoznamensk \| Laduškin \| Mamonovo \| Neman \| Nesterov \| Ozörsk \| Pionerskii \| Polessk \| Pravdinsk \| Primorsk \| Slavsk \| Sovetsk \| Svetlii \| Svetlogorsk \| Zelenogradsk

[1] Bagrationovskan pühäpertid sobory.ru-saital. (ven.)

[1]