Bangladeš

Bangladešan Rahvahaline Tazovaldkund
গণপ্রজাতন্ত্রী বাংলাদেশ
*(Gônôprôdžātôntrī Bānglādeš)*
Flag;	Valdkundznam;
Pälidn	Dakk
Eläjiden lugu (2018)	159,453,001 ristitud
Pind	148,460 km²
Kel'	bengalan (bangla)
Valdkundan pämez'	Abdul Hamid
Päministr	Šeih Hasina Vazed
Religii	islam
Valüt	bangladešan tak (৳‎, Tk) (BTD)
Internet-domen	.bd
Telefonkod	+880
Aigvö	UTC+6

Bangladeš (beng.: বাংলাদেশ Bānglādeš [ˈbaŋlaˌdeʃ] «bengalan ma»), täuz' oficialine nimituz — Bangladešan Rahvahaline Tazovaldkund (beng.: গণপ্রজাতন্ত্রী বাংলাদেশ Gônôprôdžātôntrī Bānglādeš [ɡɔnopɾodʒat̪ɔnt̪ɾi‿baŋlad̪eʃ]), om pen' valdkund Azijas ičeze pindan mödhe, no znamasine ižandusen i eläjiden lugun mödhe. Sen pälidn da kaikiš suremb lidn om Dakk.

Istorii

Valdkundan territorii oli Suren Britanijan kolonijaks, kudamb zavodi sen otandad kävutamižhe 17. voz'sadan ezmäižes poles i ühtišti nügüdläižen territorijan tobmad palad ičeze tobmuden alle 20. voz'sadan zavodindale. Vll 1905−1911 oli Bengalijan regionan jagon naprindoid kahteks agjaks, panendanke Dakk-lidnan päivnouzmaižen palan administrativižeks keskuseks. Vl 1947 Britanižen Indijan jagon aigan Bengalijan region oli jagadud religijan tundusen mödhe. Regionan päivlaskmaine pol' kändihe Indijan palaks, päivnouzmaine pol' oli ühtištadud Pakistananke Päivnouzmaine Bengalii-agjaks (möhemba udesnimitihe Päivnouzmaižeks Pakistanaks), Dakk oli sen administrativižen keskusen.

Vn 1971 26. päiväl keväz'kud Bangladeš tedištoiti ičeze ripmatomudes Pakistanaspäi satusekahan sodan ripmatomudes jäl'ghe, sil-žo vodel tal'vkun 16. päiväl Pakistan tundišti necidä ripmatomut.

Valdkundan Konstitucii^[3] (beng.: সংবিধান Sambidhāna) tuli väghe vn 1972 4. päiväl kül'mkud, se om udištadud znamasižešti vl 1986 i om väges möhembaižidenke vajehtusidenke.

Geografijan andmused

Bangladeš sijadase Brahmaputra- (pävago om Džamun) da Gang- (pävago nimitase Padm:aks) jogiden suhišton randoil.

Valdkund om maröunoiš Indijanke päivlaskmas, pohjoižes da päivnouzmas (röunan piduz — 4142 km), mugažo Mjanmaranke suvipäivnouzmas (271 km). Ühthine röunoiden piduz om 4413 km. Randanpird — 580 km. Valdkundan suvižed randad lainištab Indižen valdmeren Bengalijan laht.

Ühthine pind om 148 460 km², sidä kesken kuivman pind — 130 170 km², saum vezid — kahesandez (18 290 km²). Kaikiš korktemb čokkoim om Moudok Mjanmaran röunal, sen pä om 1052 m ü.m.t. korktusel.

Lodnuseližed varad oma londuseline gaz, väghine mahuz, mec, hil'.

Politine sistem

Ohjandusen form om unitarine konstitucine parlamentine tazovaldkund. Valdkundan pämez' om prezident (beng.: বাংলাদেশের রাষ্ট্রপতি Bangladešer Rašṭrôpôti), hän paneb päministrad radsijha videks vodeks.

Parlament om üks'kodine Nacionaline Suim (beng.: জাতীয় সংসদ Džātīja Sangsada) 350 ühtnijanke, kaik rahvaz valičeb 300 heišpäi videks vodeks, völ 50 sijad kvotiruiše naižiden täht. Parlament paneb prezidentad radnikusele videks vodeks i voib heitta händast radmaspäi kahtel änel koumespäi.

Bangladešan parlamentan ühtnijoiden järgenduseližed valičendad oliba vn 2018 30. päiväl tal'vkud. Prezident om Abdul Hamid vodes 2013 keväz'kun 20. päiväspäi. Šeih Hasina om pandud päministran radsijha vn 2009 6. päiväl vilukud da radab tähäsai, mugažo oli sil-žo radsijal vll 1996−2001.

Administrativiž-territorialine jagand

Kacu kirjutuz: Bangladešan administrativiž-territorialine jagand.

Valdkund jagase nimitadud kaikiš suremban lidnan mödhe seičemeks administrativižeks agjaks (bibhag:aks). Ned alajagasoiš 64 ümbrikoks (zil:aks, (d)zel:aks).

Eläjad

Vl 2011 valdkundan eläjiden lugu oli 142,319,000 ristitud. Kaikiš suremb valdkundan ristitišt om nügüd', otab kanesant sijad mail'mas.

Bangladešas elädas bangladešalaižed, heišpäi enamba 98 % oma bengalijalaižed. Religijan mödhe (vn 2011 rahvahanlugemine): islamanuskojad — 90,4 % (valdkundaline religii), induistad — 8,5 %, buddistad — 0,6 %, hristanuskojad — 0,4 %, toižed uskojad — 0,1 %.

Lidnad-millionerad ezilidnoidenke (vl 2008): Čittagong, Khuln, Narajangandž. Lidnalaižiden pala om 38,2 % (2020).

Rahvahanižanduz

Bangladeš om šingotai agrariž-industrialine valdkund. Se eli gollüdes hätken aigan, šingotase teravas, vspäi 2004 ekonomine kazvand oli 6..8 % vodes. Ei ole lujad rippundad irdpol'žes torguindaspäi. Vl 2024 valdkundan nominaline kogosüdäiprodukt oli 451 mlrd. US$ ekvivalentas (35. sija mail'mas; US$2,624 ühtele hengele, 139. sija) vai 1,69 trln. US$ tazostadud ostmižmahtusen mödhe (24. sija; US$9,989 ühtele hengele, 126. sija). Industrijan päsarakod oma tekstiline, farmaceftine, laivansauvomine i laivanutilizacii, elektronine, raudan metallurgii, likkuimiden tehmine (avtod, velosipedad), nahkan, stöklan, bumagan, plastmassan, džutan i cementan pästand, sömtegimišt (čai, ris, jomad), kivivoin i londuseližen gazan samine. Finansine voz' zavodiše 1. heinkud.

Kogosüdäiproduktan palad (2024. finansine voz'): maižanduz 14,5 %, tegimišt 34,1 %, holitišiden sfer 51,4 %. Radajiden järgenduz sektoroidme (vn 2017 andmused): maižanduz 40,6 %, tegimišt 20,4 %, holitišiden sfer 39,6 %.

Vl 2009 valdkundan päeksport oli erazvuiččed sobad (läz 70 %), puvill (21 %); toine eksport — merenproduktad (2 %), nahkad, džut, lang. Vodele 2012 sobad vajehtiba puvillad eksportas täuzin. Importan tavarad (2020) oma nozoltadud londuseline gaz, toreh kivivoi, mašinansauvomižen produkcii i mašiništ, himikalijad, puvill, söndtavarad. Vl 2024 import ületi eksportad läz kudendeshe. Bangladešan eksportan pätorguindpartnörad (2020) oma Saksanma (eksportan 16 %), Amerikan Ühtenzoittud Valdkundad (15,2 %), Sur' Britanii (7,4 %), Ispanii (7,2 %), Pol'šanma (5,6 %), Francii (4,2 %). Import tuleb neniš maišpäi (2017): Kitai (Bangladešan importan 27,0 %, sidä kesken Honkong 5,5 %), Indii (12,2 %), Singapur (9,2 %), Evropan Ühtištusen mad (6,2 %).

Galerei

Päministran ofis, Dakk, eloku 2024
Valdkundan Ülembaine Käskuzkund, Dakk, kezaku 2015
Bangladešan Bank (oiktalpäi, keskuzbank, Bangladesh Bank, BB) Dakkan azjaližes Motidžil'-rajonas, keväz'ku 2007 vai sen aigemba
Röunantagaižiden azjoiden ministruz, Dakk, sügüz'ku 2022
Bangladešan Nacionaline arhiv, Dakk, uhoku 2023

Homaičendad

Irdkosketused

Valdkundaline informacine portal (bangladesh.gov.bd). (beng.) (angl.)
Bangladešan parlamentan oficialine sait (parliament.gov.bd). (angl.) (beng.)
Bangladešan prezidentan ofisan sait (bangabhaban.gov.bd). (beng.) (angl.)

Bangladeš Vikiaitas

	Azijan valdkundad
	Azijan valdkundad Afganistan \| Araban Ühtenzoittud Emiratad (AÜE) \| Armenii \| Azerbaidžan¹ \| Bahrein \| Bangladeš \| Brunei \| Butan \| Egipt² \| Filippinad \| Gruzii¹ \| Indii \| Indonezii³ \| Irak \| Iran \| Izrail' \| Japonii \| Jemen² \| Jordanii \| Kambodž \| Kazahstan¹ \| Katar \| Kipr¹ \| Kirgizstan \| Kitai \| Korejan Rahvahaliž-Demokratine Tazovaldkund \| Korejan Tazovaldkund \| Kuveit \| Laos \| Livan \| Malaizii \| Mal'divan Sared \| Mjanmar \| Mongolii \| Nepal \| Oman \| Pakistan \| Päivnouzmaine Timor \| Saudan Arabii \| Singapur \| Sirii \| Šrilank \| Tadžikistan \| Tailand \| Turkanma¹ \| Turkmenistan \| Uzbekistan \| Venäma¹ \| Vjetnam
	¹ Om Evropas mugažo. ² Om Afrikas mugažo. ³ Om Valdmerimaiš mugažo.

[1] Bangladešan ristitišton endustuz vn 2018 heinkus // Mail'man faktoiden kirj. — Cia.gov. (angl.)

[2] Bangladešan pind // Mail'man faktoiden kirj. — Cia.gov. (angl.)

[3] Bangladešan Konstitucijan tekst constituteproject.org-saital. (angl.)

[1]

[2]

[3]