Bronnici

Bronnici
Бронницы

Lidnanznam	Flag
Valdkund	Venäma
Eläjiden lugu (2024)	20,981 ristitud
Pind	22,16 km²
Pämez'	Dmirii Lisenkov (sügüz'ku 2019—, Дмитрий Лысенков)
Telefonkod	+7−49 646-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Bronnici (vai Bronnicad, ven.: Бро́нницы) om Venäman lidn da lidnümbrik Moskvan agjan keskuzpalan suvipäivnouzmas. Se om ümbärtud Ramenskojen ümbrikon (edel 2025. vot — lidnümbrikon) territorijal.

Istorii

Eländpunkt mainitase vspäi 1453 kuti Broniči-torguindžilo (ven.: Броничи), oli Moskvan ruhtinasiden i Venäman cariden žiloks. Hebonferman aluz oli pandud Bel'skoje-johtan luhtoidenno Födor III-carin aigan 17. voz'sadan lopus, hebonraccastajiden polk sijazihe lidnas 19. voz'sadal. Žilo sai makundan lidnan statusad vn 1781 5. päiväl redukud. Francine armii toi äjid murendusid lidnale vn 1812 sügüzel. Lidn oli makundan keskuseks vhesai 1924. Mülütihe Ramenskojen rajonha vll 1929−1992.

Bronnici šingotase valamižmehanižel tegimel, pun i metallan ümbriradmižen edheotandoil, juvelirtegesiden pästandal, omblendfabrikal, sor'mikoiden fabrikal. Nevondkundaližen aigan savičuntegim radoi mugažo.

Geografijan andmused

Ramenskojen ümbrik vn 2010 agjan kartal. Žukovskii-lidn (vauged läip ülähän) i Bronnici (alahan) ei ole sen paloikš

Lidn sijadase Moskv-jogen oiktal randal, 120 m ü.m.t. keskmäižel korktusel. Moskvanjogen Bel'skoje-järv-joht (ven.: Бельское) om lidnan pohjoižröunaks. Kožurnovskii-uit om saudud Moskvan penel Kožurnovk-ližajogel lidnan keskuzpalan suvipäivnouzmas.

Matkad Moskvhasai om vižkümne kaks' kilometrad lodeheze. Lähembaižed lidnad oma Domodedovo 25 km päivlaskmha avtotedme sen rahvahidenkeskeižhe lendimporthasai, Ramenskoje 20 km pohjoižhe orhal, Beloozörskii kümne kilometrad pohjoižpäivnouzmha orhal i Voskresensk 25 km päivnouzmha-suvipäivnouzmha orhal.

«Ural»-avtote (M5-trass) mäneb ühtes kilometras päivlaskmha lidnaspäi («Moskv — Räzan'»-keskust). Moskvan pen' rengaz (A107-trass) läbitab lidnan suvipalad. Lähembaine Bronnici-raudtestancii radab kümnes kilometras pohjoižpäivnouzmha lidnaspäi «Moskv — Räzan'»-keskustal vspäi 1862, žilo stancijanno sijadase Ramenskojen lidnümbrikos, om avtobusühtenzoitust Bronnici-lidnanke.

Tobmuz

Bronnici om lidn oiktanke alištusenke agjan tobmudele, om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnan Administracijan pämez' om Viktor Nevolin, oli radnikusel vn 2019 sügüz'kuhusai. Lidnümbrikon Deputatoiden nevondkundan ezimez' om Aleksandr Kaširin vn 2019 redukuspäi. Edeline lidnan nevondkundan ezimez' om Aleksandr Terkin, radoi vn 2019 redukuhusai.

Eläjad

Vl 1939 lidnan ristitišt oli 6 127 eläjad, vl 1959 — 10 107 eläjad. Vn 2010 Venäman rahvahanlugemižen mödhe lidnan eläjiden lugu oli 21 102 ristutud, vn 2021 — 21 831 ristitud. Kaik 22 396 eläjad oli lidnas vl 2017. Kaikiš suremb lidnan ristitišt om 21..22 tuhad eläjid vspäi 2010 (22 643 rist. vl 2019).

Rahvahad (2010): venälaižed — 91,8 %, ukrainalaižed — 2,3 %, uzbekad — 1,4 %, toižed rahvahad — 4,3 %, rahvahuden ozutandata — 0,2 %.

Ortodoksižen hristanuskondan viž pühäpertid oma saudud lidnas: Ph. Mikoi-arhangelan päjumalanpert', kaks' jumalanpertid i kaks' časounäd.

Openduz

Lapsiden opendusen aluzkundad oma ühesa nimitadud i nomeruidud päivkodid (niiden kesken nomer 1, 2, 4, 6, 8), keskškol nomer 2, gimnazii A.A. Puškinan nimed, licei, ehtal'ne škol nomer 4, norišton «Alibi»-keskuz, čomamahtoiden škol (nell' palakundad), olimpižen varan sportškol (kaks' päpalakundad: meladuz i futbol).

Moskvan agjan avtotesauvondan kolledž om lidnan professionaližen opendusen aluzkundaks.

Galerei

• 
  Policijan palakund, ende kundaline pert' (2015)
• 
  Ph. Mikoi-arhangelan päjumalanpert' kellčuhundusenke, vn 2014 nägu
• 
  Simvoližen hebon skul'ptur (2019)
• 
  Jaugnikoiden sild Bel'skoje-järves päliči, keväz'ku 2010
• 
  Bronnici-stancijan raudteplatform vl 2010

Irdkosketused

• Lidnümbrikon tobmuden aluzkundoiden sait (bronadmin.mosreg.ru) i sen vanhtunu versii (bronadmin.ru). (ven.)