Civil'sk

Vikipedii-späi
Civil'sk
Цивильск (ven.)
Çĕрпӳ (čuv.)
 Lidnanznam
 Flag
Valdkund Venäma
Eläjiden lugu (2021) 15,049 ristitud
Pind 8,62 km²
Civil'sk Цивильск (ven.) Çĕрпӳ (čuv.)
Pämez' Vladimir Pavlov
(reduku 2020—)
Telefonkod +7−83 545-xx-xxx
Avtokod 21, 121
Aigvö UTC+3 (MSK+0)


Civil'sk (ven.: Циви́льск, čuv.: Çĕрпӳ) om Venäman lidn da lidnankund Čuvašijan Tazovaldkundan pohjoižes. Se om Civil'skan rajonan administrativine keskuz da üks'jäine lidn.

Istorii[vajehta | vajehtada tekst]

Nügüdläižen eländpunktan aluz om pandud vl 1589 kuti Venäman puine lidnuz čuvašalaižiden külänno. Om nimitadud möhemba venäks Sürbejevo:ks eländpunktan čuvašan nimitusen mödhe, čuvašan kelen ҫӗрпӳ-sana znamoičeb «sadanik» — sodajoukun sadanke mehenke käsknik. Lidnuz kadoti sodaznamoičendad, i 17. voz'sadaspäi külä šingotaškanzihe torgovanoiden da käziradajiden keskuseks. Vl 1781 se sai makundan lidnan statusad.

Civil'skan tegimišton päsarakod oma sömän tehmine (maidkombinat, leibkombinat, humalan fabrik) i sauvondmaterialiden pästand (savič, metalltegesed, uksiden kaks' fabrikad), mugažo innovacižtehnologijoiden tegim om olmas lidnas. Jogavozne jarmank oleleb heinkun ezmäižel nedalil.

Geografijan andmused[vajehta | vajehtada tekst]

Lidn sijadase Sur' Civil'- (čuv.: Мăн Çавал, mödvedhe muite Civil', Volgan oiged ližajogi) i Pen' Civil'- (čuv.: Кĕçĕн Çа­вал) jogiden ühthejoksmusen randoil, 70 m ü.m.t. keskmäižel korktusel. Matkad Čeboksarhasai om 35 km lodeheze orhal vai M7-avtotedme. Lähembaižed lidnad oma Čeboksarad, Novočeboksarsk 28 km pohjoižhe orhal i Kanaš 39 km suvhe orhal vai 47 km avtotedme.

«Volg»-avtote (M7) läbitab lidnan suvipäivlaskmašt palad. Lähembaine Civil'sk-raudtestancii sijadase kudes kilometras päivlaskmha «Čeboksarad — Kanaš»-jonol, om olmas vspäi 1938.

Civil'sk om lidnankundan üks'jäine eländpunkt.

Eläjad[vajehta | vajehtada tekst]

Vn 2010 kaiken Venäman rahvahanlugemižen mödhe eläjiden lugu oli 13 479 ristitud, rajonan ristitišton kaks' videndest. Kaikiš suremb ristitišt om nügüd' (vl 2021).

Ortodoksižen hristanuskondan viž pühäpertid[1] oma kaičenus lidnas: Tihvinan Jumalanmaman naižjumalankodi (17. voz'sada) päjumalanpertinke i Haralampijan jumalanpertinke, Eläban Eziauguižen Stroican päjumalanpert' (1734) Joann Armahtajan jumalanpertinke kellčuhunduses i Kazanin Jumalanmaman jumalanpert' (1735).

Civil'skan agrariž-tehnologine tehnikum[2] om professionaližen opendusen aluzkundaks.

Galerei[vajehta | vajehtada tekst]

Homaičendad[vajehta | vajehtada tekst]

  1. Civil'skan pühäpertid sobory.ru-saital. (ven.)
  2. Civil'skan agrariž-tehnologižen tehnikuman sait (catt21.ru). (ven.)

Irdkosketused[vajehta | vajehtada tekst]



Čuvašijan Tazovaldkundan lidnad
Alatir' | Civil'sk | Čeboksarad | Jadrin | Kanaš | Kozlovk | Mariinskii Posad | Novočeboksarsk | Šumerl'