Dmitrov

Dmitrov
Дмитров

Lidnanznam	Flag
Valdkund	Venäma
Eläjiden lugu (2024)	63,044 ristitud
Pind	26 km²
Telefonkod	+7−49 622-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Dmitrov (ven.: Дми́тров) om Venäman lidn Moskvan agjan pohjoižes. Se om Dmitrovan ümbrikon (edel 2025. vot — lidnümbrikon, edel vn 2018 semendkud — rajonan) administrativine keskuz da kaikiš suremb lidn, «sodahoštusen lidn»-arvonke vn 2008 redukuspäi.

Istorii

Eländpunktan aluz om pandud Jurii I Pit'kkäded-ruhtinasel vl 1154 kuti lidn Jahrom-jogen sokhal randal. Ruhtinaz nimiti lidnad sündnus Vsevolod III Sur' Peza-poigan sanuden valatusiš kahtenden Dmitrii-nimen mödhe, anttihe sidä nimed ph. Dimitrii Solunalaižen oiktastuseks. Lidn šingotaškanzi torguindtel Volgan i Moskvan jogiden keskes. Dmitrov i Galič oliba ühten ruhtinazkundan keskusikš 13.-14. voz'sadal. Dmitrovan ruhtinazkund oli ripmatoman edel 14. voz'sadan kesked, sid' oli alištadud Moskvan tobmudele, om likvidiruidud vl 1569. Dmitrov sai makundan lidnan statusad vl 1781. Saudud türmatud mehil kanal läbiti lidnan istorižid fartaloid vll 1932−1937, no vedi industrializacijannoks. Toižen mail'man sodan aigan tahond suvhe lidnaspäi oli okkupiruidud nacistoil kahteks päiväks vn 1941 lopus.

Dmitrov šingotase ekskavatoriden tegimel, freztömašinoiden tegimel, sauvondmaterialiden pästandal (sildraudbetonkonstrukcijad, saiding, pumaterialad, elektrokabeliden koume edheotandad), sömtegimištol (lihakombinat, maidtegim, vauktuškombinat), pakuitesen tegimil (alüminiilent, stökolmülüd, gofr), mugažo trikotažan edheotand i meblin fabrik ratas lidnas.

Geografijan andmused

Dmitrovan ümbrikon sijaduz agjas vn 2025 uhokun kartal

Municipaližen ümbrikon kart (2014)

Lidn sijadase municipaližen ümbrikon keskuzpalas, Kanalan Moskvan nimed päivnouzmaižel randal läz täuzin, 160 m ü.m.t. keskmäižel korktusel.

Matkad Moskvhasai (Moskvan rengazavtotehesai) om vižkümne kilometrad suvhe. Lähembaine lidn om Jahrom koumes kilometras suvipäivlaskmha.

Dmitrov-raudtestancii radab lidnan suvipäivlaskmas vspäi 1901, sijadase kanalan randanno, elektrojonused lähttas Moskvan Savölovon päraudtestancijaspäi. Toine stancii om Kanalstroi lidnan pohjoižröunanno. Lidn om raudtesol'meks, ühtenzoitase oikti nenidenke lidnoidenke: Dubn, Krasnii Holm (Tverin agj), Aleksandrov (Vladimiran agj). Moskvan agjan sur' avtogengaz (A108-trass) läbitab lidnan pohjoižpalad. Jüguport radab kanalan randal.

Eläjad

Vl 1939 lidnan ristitišt oli 25 029 eläjad, vl 1959 — 34 518 eläjad. Vn 2010 Venäman rahvahanlugemižen mödhe lidnan eläjiden lugu oli 61 305 ristutud, rajonan (nüg. ümbrik) kaks' videndest, vn 2021 — 65 574 ristitud. Kaik 67 506 eläjad oli lidnas vl 2017. Kaikiš suremb lidnan ristitišt oli 68 792 eläjad vl 2020, se oli enamba 64 tuhad eläjid vll 1986−1998 (65 800 rist. vl 1992) i vll 2013−2023.

Rahvahad (ozutadud rahvahudenke vl 2010): venälaižed — 94,6 %, ukrainalaižed — 1,3 %, toižed rahvahad — 4,1 %.

Openduz

Lapsiden opendusen aluzkundad oma päivkodid, keskškolad.

Professionaližen opendusen aluzkundad oma Dmitrovan tehnikum, Dmitrovan rattematoman opendusen institut da sen kolledž, Moskvan agjan medicinižen kolledžan filial Dmitrovan filial, Moskvan üläopendusen aluzkundoiden severz'-se filialoid.

Galerei

• 
  Dmitrovan Kremlin ansambl', 2005
• 
  Phh. Borisan da Gleban mez'jumalankodi, vn 2006 nägu
• 
  Lugustuzkasskeskusen sauvuz vl 2005 (nüg. Valdkundmaksoiden inspekcii)
• 
  Lidnan kul'turkeskuz (2005)
• 
  Torg Dmitrov-päraudtestancijanno vl 2020

Irdkosketused

• Lidnümbrikon tobmuden aluzkundoiden oficialine sait (dmitrov-reg.ru). (ven.)