Elektrostal'

Elektrostal'
Электросталь

Lidnanznam	Flag
Valdkund	Venäma
Eläjiden lugu (2024)	141,778 ristitud
Pind	51,45 km²
Pämez'	Vladimir Pekarev (tal'vku 2016—)
Telefonkod	+7−49 657-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Elektrostal' (ven.: Электроста́ль) om Venäman lidn da lidnümbrik Moskvan agjan päivnouzmas. Se om agjan kahesanz' lidn eläjiden lugun mödhe.

Istorii

Ende nened küläd oliba lidnan territorijal: Afanasovo, Šebanovo i Visokovo. Zatišje-mectahond (ven.: Зати́шье) oli läz niid. Nügüdläižen eländpunktan aluz om pandud vl 1916, konz sauvoškanzihe kaks' tegint: raudan elektrometallurgijan tegim i šlibakoiden Bogorodskii-tegim. Molembad tegimed radaškanziba voden 1917 aigan, ned oma olmas tämbäi-ki. Vl 1925 nimitihe Zatišje-pol'stancijad Elektrostalikš. Radnikžilon nimituz oli Zatišje vhesai 1928. Se sai lidnan statusad vn 1938 26. päiväl tal'vkud.

Elektrostal' šingotase südäitukuižen poltusen tegimel, raudan elektrometallurgijan «Elektrostal'»-tegimel (hüväladuline teraz lomuspäi), mašiništon tehmižel katilpertiden, metallurgižen i atomižen sarakoiden täht, sauvondmaterialiden pästandal (rosttumatomad torved, pertinsauvomižen kombinat — beton, sauvondblokad), himižen kaičendan abutusiden i fil'triden tehmižel.

Geografijan andmused

Lidnümbrikon sijaduz agjas vn 2018 kartal

Lidümbrikon kart (lidn i alištadud sile territorii, kezaku 2018)

Lidn sijadase Kläz'm-jogen oiktal randpolel, vides kilometras jogespäi, 150 m ü.m.t. keskmäižel korktusel. Mecmassivad oma kaičenus lidnan päivnouzmaižen i päivlaskmaižen röunoidenno.

Matkad Moskvan rengazavtotehesai om koumekümne kahesa kilometrad päivlaskmha. Lähembaižed lidnad oma Noginsk ühtes kilometras pohjoižhe i Pavlovskii Posad 10 km päivnouzmha.

Raudteplatformad oma Metallurg (suvipalas), Elektrostal' (keskuses) i Mašinostroitel' (pohjoižes) sarakol Černogolovkhasai «Moskv — Vladimir»-keskustaspäi. Moskvan pen' avtorengaz (A107-trass) läbitab lidnan päivlaskmad. «Volg»-avtote (M7-trass) mäneb ühtes kilometras pohjoižhe lidnaspäi.

Tobmuz

Kaik viž küläd i viž žilod mülüdas lidnümbrikho Elektrostalin ližaks vspäi 2018. Kaikiš surembad oma Vsevolodovo-külä (2959 rist. vl 2010) i Uded Pertid-žilo (ven.: Новые Дома, 1630 rist. vl 2010). Lidnümbrikon pind om 135,36 km².

Eläjad

Vl 1939 lidnan ristitišt oli 42 607 eläjad, vl 1959 — 96 922 eläjad. Vn 2010 Venäman rahvahanlugemižen mödhe 155 196 ristitud elihe lidnas, vn 2021 — 146 403 ristitud. Kaik 165 364 eläjad oli lidnümbrikos vl 2019. Kaikiš suremb lidnan ristitišt oli 153 tuhad eläjid vll 1990−1992 i 155..158 tuhad eläjid vll 2010−2020 (158 508 rist. vl 2017).

Rahvahad (ozutadud rahvahudenke vl 2010): venälaižed — 95,8 %, ukrainalaižed — 1,6 %, toižed rahvahad — 2,6 %.

Ortodoksižen hristanuskondan nell' jumalanpertid i nell' časounäd oma saudud lidnas. Niiden ližaks jumalanpert' i kuz' časounäd oma avaitud lidnümbrikon toižiš eländpunktoiš.

Openduz

Lapsiden opendusen aluzkundad oma 42 päivkodid, nell'toštkümne keskškolad, viž gimnazijad, koume liceid, ehtal'ne škol, koume ližaopendusen keskust (Dialog, Rostok, noriden tehnikanradajiden stancii), kaks' muzikškolad, čomamahtoine škol, olimpižen varan kaks' sportškolad (dzüdos i vezisportansuguiš), lapsiden da norišton sportškol futbolas.

Professionaližen opendusen aluzkundad oma viž kolledžad (Moskvan agjan politehnine — MIFI-universitetan filial, muite Elektrostalin, Elektrostalin medicinine, Valdkundaline professionaliž-pedagogine, Moskvan agjan bazine muzikkolledž A.N. Skräbinan nimed), Elektrostalin institut (Moskvan politehnižen universitetan filial, ende Elektrostalin politehnine institut) i Moskvan üläopendusen severz'-se toižid filialoid.

Galerei

• 
  Lidnümbrikon administracijan pert' Mirun irdal (2007)
• 
  Sündun Voznesenjan jumalanpert', vn 2020 nägu
• 
  «Elektrostal'»-tegimen kontrol'punkt nomer 2 vl 2020
• 
  «Kristall»-jäpert'kulu (vn 2020 olend)
• 
  Elektrostal' -raudtestancijan pert' vl 2014

Irdkosketused

• Lidnümbrikon tobmuden aluzkundoiden sait (electrostal.ru). (ven.)