Elektrougli

Elektrougli
Электроугли

Lidnanznam	Flag
Valdkund	Venäma
Eläjiden lugu (2024)	17,793 ristitud
Pind	15 km²
Telefonkod	+7−49 651-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Elektrougli (ven.: Электроу́гли «elektrohiled») om Venäman lidn Moskvan agjan keskuzpalan päivnouzmas. Se om Balašihan suvipäivnouzmaine ezilidn, mülüb Bogorodskan lidnümbrikho (edel vn 2018 kezakud — Noginskan rajonha). Lidnümbrikon kaikiš penemb lidn eläjiden lugun mödhe, koumanz' surtte eländpunkt.

Istorii

Kudinovo-žilo (om erižeks eländpunktaks tämbäi-ki koumes kilometras pohjoižhe) mainitase vspäi 1742 vauktan saven löudmižsijanno. «Elektrougli»-tegim da žilo senno oliba saudud läz Kudinovo-žilod vl 1899. Lämoinvastaižen savičun kaks' tegint oliba saudud Žohovad-vellil-torgovanoil Kudinovo-raudtestancijanno vl 1900. Keramine kombinat radaškanzi niiden alusel vl 1930.

Nügüdläižen eländpunktan aluz om pandud kuti Elektrougli-radnikžilo neniden žiloiden da küliden ühtištusel vn 1934 3. päiväl heinkud: Sur' i Pen' Vasil'jevo, Kamenk (ven.: Каменка), Safonovo, Gorki, Kamčatk (ven. Камчатка), žilo Kudinovo-raudtestancijanno, «Elektrougli»- i «Mosogneupor»-tegimiden žilod. Om lidnan statusanke vn 1956 kül'mkun 2. päiväspäi. Mülütihe kaht lähišt žilod lidnha vl 2005. Sur' kar'jer kävutihe saven samižen jäl'ghe, miše mahapanda kovid kodijändusid, se om järed «Timohovo»-poligon vides kilometras pohjoižpäivnouzmha lidnaspäi, uden pertišton sauvond om röunatud sen tagut.

Elektrougli šingotase elektrohil'tegesiden tedotehmištol'žel kompleksal (elektrojoksusen himižed akkumulätorad da batarejad, elektrodad, tegesed kaičendsarakon täht i uded materialad), elektrohil'tegesiden kodvtegimel, keramižen savičun kombinatal, tehnižen hil'nikan tegimel.

Geografijan andmused

Bogorodskan lidnümbrikon röunad agjas vn 2018 kezakuspäi

Lidn sijadase lidnümbrikon suvipäivlaskmas, 135..145 m ü.m.t. korktusil. Malinovk-jogi ližaojidenke lähteb päivlaskmha lidnaspäi (ven.: Малиновка, Moskvan hurapol'ne bassein). Kamenskii-uit om suviröunal.

Matkad Moskvhasai (Moskvan rengazavtotehesai) om kaks'kümne koume kilometrad päivlaskmha. Lähembaižed lidnad (orhal) oma Noginsk i Elektrostal' 12..18 km päivnouzmha-pohjoižpäivnouzmha, Balaših 2..6 km päivlaskmha i lodeheze, Vanh Kupavn seičemes kilometras pohjoižhe.

Elektrougli-raudtestancii radab lidnan pohjoižröunal «Moskv (Kurskan päraudtestancii) — Vladimir»-keskustal vspäi 1861. Stancijan eziauguine nimituz oli Vasil'jevo, vll 1892−1963 nimitihe Kudinovo:ks.

Tobmuz

Kaik viž küläd i žilo mülüihe lidnankundha Elektrouglin ližaks vn 2018 kezakuhusai. Lidnankundan pind oli 58,42 km².

Eläjad

Vl 1939 radnikžilon ristitišt oli 8 520 eläjad, vl 1959 lidnan — 14 016 eläjad. Vn 2010 Venäman rahvahanlugemižen mödhe lidnan eläjiden lugu oli 20 136 ristutud, rajonan (nüg. lidnümbrik) kümnendez, vn 2021 — 17 944 ristitud. Kaik 20 687 eläjad oli lidnas vl 2017. Kaikiš suremb lidnan ristitišt oli enamba 20 tuhad eläjid vll 2007−2020 (21 263 rist. vl 2020).

Rahvahad (ozutadud rahvahudenke vl 2010): venälaižed — 95,2 %, ukrainalaižed — 1,2 %, toižed rahvahad — 3,6 %.

Ortodoksižen hristanuskondan kaks' pühäpertid oma kaičenus i saudud lidnas: Eläban Eziauguižen Stroican jumalanpert' (om saudud vll 1897−1900, kellčuhunduz vl 1908) i časoun'.

Openduz

Lapsiden opendusen aluzkundad oma viž nimitadud i nomeruidud päivkodid (nomer 41, 44, 83, 88, 93), koume keskškolad (openduzkeskused nomer 28, 30 i 33), kul'turan da čomamahtoiden keskuz, muzikškol, ümbrikon olimpižen varan sportškolan palakund.

Moskvanaluižen «Energija»-kolledžan (baziruiše Reutovas) Bogorodskan palakund om lidnan professionaližen opendusen aluzkundaks.

Galerei

• 
  «Kvant»-kul'turkeskuz (vn 2009 olend)
• 
  Eläban Eziauguižen Stroican jumalanpert', vn 2013 nägu
• 
  «Elektrougli»-tegim vl 2010
• 
  «Energija»-kolledžan Bogorodskan palakund, se-žo amuižen usadiban päsauvuz, viluku 2016
• 
  Elektrougli-raudtestancii vl 2019

Irdkosketused

• Lidnümbrikon tobmuden aluzkundoiden oficialine sait (bogorodsky-okrug.ru). (ven.)