Federativižed Mikronezijan Valdkundad

Federativižed Mikronezijan Valdkundad
Federated States of Micronesia
Flag;	Valdkundznam;
Pälidn	Palikir
Eläjiden lugu (2018)	103,643 ristitud
Pind	702 km²
Kel'	anglijan
Valdkundan pämez'	Uesli Simina
Päministr	hän-žo
Religii	hristanuskond
Valüt	AÜV:oiden dollar ($) (USD)
Internet-domen	.fm
Telefonkod	+691
Aigvö	UTC+10...+11

Federativižed Mikronezijan Valdkundad vai FMV lühüdašti (angl.: Federated States of Micronesia [ˈfedəɹeɪtɪd ˌsteɪts əv ˌmaɪkroʊˈniːʒə], se om täuz' oficialine nimituz), om ümbärtud Tünen valdmerel sar'hine valdkund Valdmerimaiden päivlaskmas. Sen pälidn om Palikir.

Istorii

Vozil 1885−1899 nügüdläine FMV:oiden Karolinan sared-territorii oli Ispanijan kolonijan. Vl 1899 Ispanii möi sarid Saksanmale, i vozil 1899−1914 Karolinan sared oliba Saksanman kolonijan, Saksanman Uden Gvinejan palaks. Vozil 1914−1944 Karolinan sared oliba Japonijan kolonijaks.

Vn 1986 kül'mkun 3. päiväl Federativižed Mikronezijan Valdkundad tedištoitiba ičeze ripmatomudes AÜV:oišpäi, sil-žo päiväl associacijan kožundkirjutez oli allekirjitadud niidenke. Nügüdläine Konstitucii^[2] om väges vn 1979 semendkun 10. päiväspäi (vahvištadud edel ripmatomut völ) vn 1990 vajehtusidenke, se oli ičeze ohjastusen ezmäižen ištundan päiv.

Geografijan andmused

FMV:oiš om 607 sart, 40 niišpäi oma surembad, 65 — elänzoittud. Ned oma Karolinan sariden kesk- da päivnouzmaine pala. FMV:oiden susedvaldkundad da territorijad: Pohjoižed Marianan Sared da Guam pohjoižes, Maršalan Sared da Nauru päivnouzmas, Solomonan Sared suvipäivnouzmas, Papua — Uz' Gvinei suves, Palau da Filippinad päivlaskmas. FMV:oiden randad lainištab Tün' valdmeri. Randanpird — 6112 km. Kattud saril valdmeren pind om läz 2,6 mln km².

Kaik surembad sared oma mägikahad vulkaniženke augotižlibundanke, oma ümbärtud korallrifil. Pened sared oma kattud korallil vedenalaižiden vulkanoiden päd. Kaikiš korktemb čokkoim om Nanlaud-mägenoc Ponpei-sarel, 782 m meren pindan päl.

Klimat om ekvatorialine da subekvatorialine neps mussonine. Kun keskmäine lämuz om +26..+33 C° vodes läbi. Paneb sadegid 2250..3000 mm vodes. Vodes oleskeleb 25 tropišt ciklonad keskmäras.

Londuseližed varad oma mec, merenproduktad, fosfatad.

Politine sistem

Ohjandusen form om federativine parlamentine tazovaldkund, partijoita da armijata. Kaikutte valdkund (štat) om ičeze konstitucijad (kaiken federacijan ozutesen mödhe) da znamasišt ičeohjastust. Kožundkirjutez AÜV:oidenke kaičendas da rahaabus om sätud.

Valdkundan da ohjastusen pämez' om prezident (angl.: President of the Federated States of Micronesia). Üks' varaprezident om hänele abuhu. Parlament valičeb prezidentad da varaprezidentad. Valitas prezidentad nelläks vodeks štatoiden parlamentiden senatoriš-kandidatoišpäi luguhusai nell', kahtenden strokun voimuz om olmas.

Käskusenandai tobmuz om ohjastuz da üks'kodine parlament, Kongress (angl.: Congress) 14 ezitajanke (nell' — üksin kaikuččes štataspäi nelläks vodeks, kümne — valičendümbrikoišpäi kahteks vodeks), kaik rahvaz valičeb parlamentan ezitajid.

Vn 2023 keväz'kun 7. päiväl FMV:oiden päjärgvaličendad oliba, sidä kesken federaližhe parlamentha (änestihe kaikid 14 ezitajid). Jäl'geližed prezidentan valičendad parlamentas oliba vn 2023 semendkun 11. päiväl, Uesli Simina sai vägestust da radab ühtenden strokun. Edeline prezident om Devid Panuelo (11. semendku 2019 — 11. semendku 2023).

Administrativiž-territorialine jagand

Kacu kirjutuz: Federativižiden Mikronezijan Valdkundoiden administrativiž-territorialine jagand.

Federativižed Mikronezijan Valdkundad jagasoiš nelläks valdkundaks (štataks), ned — 75 municipalitetaks (Čuuk — 35, Jap — 23, Ponpei — 12, Kosrae (Kusaie) — viž).

Eläjad

Federativižiš Mikronezijan Valdkundoiš elädas mikronezijalaižed. Vn 2014 heinkus valdkundan ristitišt oli 105,681 eläjad. Ristitišt poleneb lujan emigracijan tagut. Om kahesa sijališt kel't.

Religijan mödhe (2010): riman katolikad — 54,7 %, protestantad — 41,1 % (sidä kesken kongregacionistad 38,5 %), mormonad — 1,5 %, toižed uskojad — 1,9 %, religijatomad — 0,7 %, religijan märhapanendata — 0,1 %.

Vl 2010 znamasižed lidnad oliba (enamba 5 tuh. ristituid, surembaspäi penembha): Veno (Moen), Palikir (pälidn), Kolonia (Jap), Kolonia (Ponpei) (edel 1989. vot oli pälidnaks). Kaik om 11 eländpunktad enamba mi koume tuhad eläjidenke.

Ižanduz

Federativižed Mikronezijan Valdkundad om goll' agrarine valdkund, rippub AÜV:oiden abuspäi. Vl 2018 valdkundan nominaline kogosüdäiprodukt oli 372 mln. US$ ekvivalentas (US$3,634 ühtele hengele) vai 353 mln. US$ tazostadud ostmižmahtusen mödhe (US$3,454 ühtele hengele). Holitišiden sfer (sidä kesken turizman holituz), sauvond, käzitöiden tegesed, kalanpüdand i maižanduz oma ekonomikan alusikš. Znamasine radotomudenmär (16,2 %) oli vl 2010. Finansine voz' zavodiše 1. redukud.

Kogosüdäiproduktan palad vl 2017: maižanduz 26,3 %, tegimišt 18,9 %, holitišiden sfer 54,8 %. Radajiden järgenduz sektoroidme (vn 2013 andmused): maižanduz 5,2 %, tegimišt 0,9 %, holitišiden sfer 93,9 %.

FMV:oiden päeksport om kül'menzoittud, kuivatud kala (96 %), toine eksport — merenproduktad, sobad, bananad, must perč. Importan tavarad oma söndtavarad (lindun i toižiden živatoiden liha, kalaproduktad), kalanpüdused, telekommunikacine ladimišt. Vl 2015 import ületi eksportad enamba mi nellhä kerdha. Irdpol'žen torguindan päižed partnörad (2019) oma Tailand (FMV:n eksportan 73 %), Amerikan Ühtenzoittud Valdkundad (FMV:n importan 32 %), Kitai (eksportan 9 % i importan 16 %) i sen Taivan' (importan 9 %), Japonii (eksportan 10 % i importan 14 %), Filippinad (importan 6 %), Suvikorei (importan 6 %).

Galerei

Prezidentan ofis, Palikir, uhoku 2025
FMV:n Ülembaine Käskuzkund, Palikir, uhoku 2025
Konferenciikeskuz, Palikir, uhoku 2025
Valdkundan Röunantagaižiden azjoiden ministruz, Palikir, uhoku 2025

Homaičendad

Irdkosketused

Federativižed Mikronezijan Valdkundad Vikiaitas

	Valdmerimaiden valdkundad
	Valdmerimaiden valdkundad Avstralii \| Federativižed Mikronezijan Valdkundad \| Fidži \| Kiribati \| Maršalan Sared \| Nauru \| Palau \| Papua — Uz' Gvinei \| Samoa \| Solomonan Sared \| Tong \| Tuvalu \| Uz' Zelandii \| Vanuatu

[1] Federativižiden Mikronezijan Valdkundoiden ristitišton endustuz vn 2018 heinkus // Mail'man faktoiden kirj. — Cia.gov. (angl.)

[2] Federativižiden Mikronezijan Valdkundoiden Konstitucii Vikipurtkiš. (angl.)

[1]

[2]