Fevral'sk

Fevral'sk
Февральск

Valdkund	Venäma
Eläjiden lugu (2023)	3,495 ristitud
Pämez'	Jevgenii Konorkin (uhoku 2021—)
Telefonkod	+7−41 655-xx-xxx
Avtokod	28
Aigvö	UTC+9 (MSK+6)

Fevral'sk-stancijan vagzal (2006)

Fevral'sk (ven.: Февра́льск) om Venäman radinžilo (lidnanvuitte žilo) Amuran agjan Selemdžan rajonas.

Istorii

Žilo om tehtud BAM:an sauvondan aigan (1974−1980 voded). Kätihe lidnanvuiččeks vn 1982 vilukun 4. päiväl Amuran agjan Rahvahandeputatoiden nevondkundan pätandan mödhe. Om nimitadud lähižen Fevral'skoje-žilon mödhe (alusenpandud vodel 1896, se om nelläs kilometras pohjoižhe radnikžilospäi), a se venän kelen uhokun nimen mödhe (февраль).

Fevral'sk šingotase mecan varhapanendan vemha Kitaihe kahtel edheotandal («Fevral'sk-les», «Li Čan Li»), parziden pilindan 22 edheotandal, ühtennimižel Fevral'sk-raudtestancijal (vspäi 1997, raudten distancii, vedimdepo). Enamba mi 60 torguindan edheotandad ratas žilos.

Geografijan andmused

Selemdžan rajonan sijaduz agjas vn 2013 kartal

Žilo sijadase agjan keskuzpalan suvipäivnouzmas, rajonan päivlaskmas, Selemdž-jogen (ven.: Селемджа́) keskjoksmusen i sen huran Biss-ližajogen (Бы́сса) keskes. Biss lankteb Selemdžaha kaks'kümnes kilometras päivlaskmha žilospäi.

Fevral'sk seižub avtotel Svobodnijan i Ekimčanan keskes. Matkad Ekimčan-rajonkeskushesai om 204 km päivnouzmha-pohjoižpäivnouzmha. BAM:an avtodublör läbitab žilod, sen tel ei ole avtotesildad Selemdžas päliči, vaiše jäehtatuz oleleb. Raudtesildad molembiš jogiš päliči i avtotesild Bissas päliči oma saudud.

Tobmuz

Lähine Fevral'skoje-žilo (348 rist. vl 2010, 254 eläjad vl 2021) mülüb lidnankundha Fevral'skan ližaks. Lidnankundan pind om 1348 km².

Eläjad

Vn 2010 Venäman rahvahanlugemižen mödhe radnikžilon eläjiden lugu oli 5,128 ristitud, rajonan pol'. Kaikiš suremb žilon ristitišt oli 8,816 eläjad vl 1989.

Ortodoksižen hristanuskondan Pühän Jumalanmaman Sündundan puine jumalanpert' om avaitud žilos vl 2013.

Socialine sfer

Nened büdžetižed aluzkundad ratas žilos: Krasnaja Šapočka-päivkodi («Rusked Šapkut»), Fevral'skan keskškol, kaks' kirjištod (školan i žilon), kul'turkeskuz, lapsiden čomamahtoiden škol (vll 1978−2007 muzikškol, horeografine palakund i teatr oma siš), sportškol, läžundkodi.

Professionaližen opendusen aluzkundad sijadasoiš lähembaižiš lidnoiš.

Irdkosketused

• Lidnankundan oficialine sait (fevralskadm.ru). (ven.)