Haidenhaim Brencal

Haidenhaim Brencal
Heidenheim an der Brenz
	Lidnanznam;
Valdkund	Saksanma
Eläjiden lugu (2024)	50,618 ristitud
Pind	107,09 km²
Pämez'	Mihael' Salomo; (mandat 2021−2029,; Michael Salomo)
Telefonkod	+49−7321
Aigvö	tal'vel UTC+1,; kezal UTC+2

Haidenhaim Brencal (saks.: Heidenheim an der Brenz [ˈhaɪdn̩haɪm ʔan deːɐ̯ ˈbʁɛnts], lühüdas Heidenheim, sijaližen švabijan paginal Hoidna / Hoirna) om lidn Saksanman suves, Baden-Vürtemberg-federacijanmas.

Istorii

Kaikenaigaižen eländpunktan aluz om pandud 13. voz'sadal edel m.e.. Vozil 85−159 m.e. Rimalaižen imperijan tuha azekast kavaleristod oli sijatud Akvilei-lidnuses (latin.: Aquileia). Hellenstein-lidnuz da lidnansein oma saudud vll 1190−1420. Vl 1356 Haidenhaim sai lidnan statusad da torgusen sijadusen oiktust.

Voith GmbH-kompanijan päfater da tegimed sijadasoiš lidnas (virktas «Foit», 7,5 tuh. radnikoid, pästtas turbinoid da mašiništod cellülozbumagaižen sarakon täht). Ižandusen toižed sarakod oma pol'veimiden, plastmassan, tekstilin da ventiläcijan tehmine. Medicinižen mašiništon edheotand i cementtegim ratas lidnankundas mugažo.

Geografijan andmused

Lidnan sijaduz federacijanmas i valdkundas vn 2006 kartal

Lidn sijadase federacijanman päivnouzmas, läz röunad Bavarijanke, 478..645 m korktusil valdmeren pindan päl (504 m om keskmäine).

Lähembaine sur' lidn om Štuttgart kahesakümnes kilometras päivlaskmha.

Tobmuz

Haidenhaim Brencal jagase lidnankeskuseks (saks.: Kernstadt) da nelläks lidnrajonaks (ende erigoittud kundad): Šnaithaim (mülüb lidnha vspäi 1910), Mergel'štetten (vspäi 1937), Oggenhauzen (1971), Groskuhen (om ühtištadud lidnanke vn 1974 heinkuspäi). Kaik om 35 uhtnijad municipaližes suimas (vll 2019−2024 heid oli 33, edel 2019. vot 34), valičesoiš videks vodeks. Om kožundkirjutest ühthižes ohjanduses Natthaim-kundanke.

Edeline lidnan pämez' om Bernhard Il'g (Bernhard Ilg, 2000−2021).

Eläjad

Vn 2011 Saksanman rahvahanlugemine löuzi 46,085 kaikenaigašt eläjad lidnankundan röunoiš. Kaik 48,048 eläjad oli lidnas vl 2015. Kaikiš suremb lidnan ristitišt oli 50,292 eläjad vl 1970 i 52,527 eläjad vl 1995.

Galerei

Lidnan ohjastusen pert' (2009)
Ph. Paulan jumalanpert' (Pauluskirche, om saudud vodele 1897), vn 2009 heinkun nägu
Kongress-keskuz (2010)
Haidenhaim-päraudtestancijan sauvuz vn 2019 heinkus