Isil'kul'

Isil'kul'
Исилькуль
Lidnanznam;	Flag;
Valdkund	Venäma
Eläjiden lugu (2023)	20,050 ristitud
Pind	39 km²
Telefonkod	+7−38 173-xx-xxx
Avtokod	55
Aigvö	UTC+6 (MSK+3)

Isil'kul' (ven.: Исильку́ль) om Venäman lidn da lidnankund Omskan agjan suvipäivlaskmas. Se om Isil'kulin rajonan administrativižeks keskuseks da palaks.

Istorii

Eländpunktan aluz om pandud vl 1893 kuti Isil'-Kul' -žilo raudtestancijanno Transsibal. Šingotihe maižanduzrajonan transportkeskuseks. Vl 1945 se sai lidnan statusad.

Isil'kul' šingotase teleradioapparaturan da sidon «Ekran»-tegimel, villänpurnuil, kombisötken tegimel Medvežje-žilos, valdkundaližen büdžetan aluzkundoil.

Geografijan andmused

Nimitihe Isil'kulid lähižen penen järven mödhe, sen rand sijadase koumes kilometras lidnan keskusespäi. Lidn sijadase rajonan keskuzpalas, 125 m ü.m.t. keskmäižel korktusel.

Raudte jagab lidnad läz poleti. Matkad Omskhasai om 149 km päivnouzmha avtotedme vai raudtedme. Om kaks'kümne seičeme kilometrad röunhasai Kazahstananke päivlaskmha (Pohjoižkazahstanan agj). Lähembaižed lidnad oma Bulajevo (Kazahstan) 55 km päivlaskmha raudtedme vai avtol i Nazivajevsk 75 km pohjoižhe avtotedme.

Tobmuz

Isil'kul' om lidnankundan üks'jäižeks eländpunktaks. Lidnankundan pind — 94,81 km².

Lidnankundan tobmuden pämez' oli sen Administracijan pämez'. Lidnankundan Administracii om likvidacijan pordhal vn 2025 heinkuspäi, Dmitrii Suško radab sen likvidacižen laudkundan ezimehen siš-žo aigaspäi. Nened ristitud radoiba lidnan Administracijan pämehil: Il'ja Arhipov (sulaku 2024 — heinku 2025), Sergei Semencov (reduku 2021 — sulaku 2024), Vladimir Gill' (kezaku 2016 — eloku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 24 482 ristitud, rajonan koume videndest, vn 2021 — 20 515 ristitud. Kaik 23 151 eläjad oli lidnas vl 2017. Kaikiš suremb lidnan ristitišt oli 27 800 eläjad vl 2001.

Ortodoksižen hristanuskondan koume pühäpertid^[1] oma saudud lidnas: Venämalaižiden uziden moknikoiden da hengenavaidamižen sajiden kafedraline päjumalanpert' (2004), Pühiden Apostoloiden jumalanpert' (om avaitud vl 2003 restavracijan jäl'ghe) i ph. Mark Pečeralaižen časoun' kaumžomal (saudihe vll 2003−2010). Lidnankundan Deputatoiden nevondkund radoi mugažo (vn 2024 olend). Lidn om ičeze eparhijan keskuseks vspäi 2012.

Openduz

Lapsiden opendusen aluzkundad oma kahesa nimitadud i nomeruidud päivkodid (niiden kesken nomer 2..5, 7, 8), Gorodiščen aluzškol, nell' keskškolad (nomer 1..4), licei, ehtal'ne škol, Isil'kulin škol-internat (adaptivine), lapsiden sädamižen pert', čomamahtoiden škol, lapsiden tervehtamižen da opendusen fizkulturižsportkompleks, noriden tehnikanradajiden stancii, noriden londusentedajiden stancii.

Isil'kulin professionaliž-pedagogine kolledž^[2] i Federaližen aznoičendradnikoičendan openduzaluzkund nomer 300 oma lidnan professionaližen opendusen aluzkundoikš.

Galerei

Toižen mail'man sodan sodamehiden memorial (2024)
Venämalaižiden uziden moknikoiden da hengenavaidamižen sajiden kafedraline päjumalanpert', vn 2008 nägu
Raudteradnikoiden kul'turkeskuz (1926), vn 2011 olend
Isil'kulin vedimdepo vl 2024