Vahdat

Vahdat
Ваҳдат
Valdkund	Tadžikistan
Eläjiden lugu (2022)	54,400 ristitud
Telefonkod	+992−3136
Aigvö	UTC+5

Vahdat (tadž.: Ваҳдат, ven.: Вахда́т) om lidn tazovaldkundan alištusenke Tadžikistanan päivlaskmas, Dušanben päivnouzmaine ezilidn. Se om Vahdatan rajonan tazovaldkundan alištusenke administrativine keskuz, mülüb sihe.

Istorii

Eländpunktan aluz om pandud kuti žilo vl 1927 Jangibazar-nimitusenke (tadž.: Янгибозор, ven.: Янгибазар, «uz' bazar» uzbekan kelespäi). Raudte tuli sihe vl 1930. Vn 1936 sulakuspäi nimitihe žilod Ordžonikidzeabad:aks oficialižikš (tadž.: Орҷоникидзеобод, ven.: Орджоникидзеаба́д) nevondkundaližen Sergo Ordžonikidze-valdkundanšingotajan kanzannimen mödhe, anttihe sile lidnan statusad vn 1965 heinkun 3. päiväl. Vll 1992−2003 lidnan nimi oli Kofarnihon (tadž.: Кофарниҳон, ven.: Кофарнихо́н) jogen mödhe.

Vahdat šingotase puvillan puhtastandtegimel, sauvondmaterialiden pästandal (pertinsauvond, savič, keramzit), šuukankombinatal, sömtegimištol (jauh), kohenduzmehanižel i metalltegesiden tegimil, mugažo meblin fabrik i lindferm ratas lidnas.

Geografijan andmused

Lidn sijadase rajonan i regionan suvipäivlaskmas, Gissar-alangištos, Kafirnigan-jogen randal (tadž.: Кофарниҳон «kamfarantoi jogi» 387 km pitte, Amudarjan oiged ližajogi), 870 m ü.m.t. keskmäižel korktusel.

Matkad Dušanbe-pälidnan röunhasai om kümne kilometrad päivlaskmha, keskuzpalhasai — 19 km päivlaskmha orhal.

Voden keskmäine lämuz om +13,7 C°, kezakun-elokun +24..+26 C°, tal'vkun-uhokun +1..+4 C°. Paneb sadegid 636 mm vodes, enamba keväz'kus-sulakus (114..118 mm kus), vähemba kezakus-sügüz'kus (1..11 mm kus).

Eläjad

Vn 2010 Tadžikistanan rahvahanlugemižen mödhe lidnan eläjiden lugu oli 40,600 ristitud. Kaikiš suremb lidnan ristitišt om nügüd'. Kaik 317,100 ristitud elihe kaikes rajonas vl 2016, 359,800 ristitud — vl 2022.

Statistikan kolledž^[1] (tadž.: Коллеҷи омори шаҳри Ваҳдат, alusenpanend 1958) i medicinan kolledž ratas lidnas.