Karjalan Vozduh (festival')

«Karjalan Vozduh» (ven.: «Во́здух Каре́лии» «Karjalan il'm», mugažo om tetab «Се́верное наше́ствие», «Во́здух» i «Се́верный во́здух» nimiden al: Pohjoine tungend, Il'm, Pohjoine il'm) — venälaine festival' avoinudel irdal, mäneb kaikuččen voden kezakus Karjalan Tazovaldkundan administrativižes Petroskoi-keskuses. Venän Vozduh-sana voib znamoita lühendust venäks: ven.: «ВОЗвышение ДУХа», vepsäks «hengen libutand». Om sureks muzikaližeks aigtegoks Venäman lodehes.

Vl 2025 sen päiväd oliba 12.-15. kezakud.

Festivalin polhe

«Karjalan Vozduh» — muzikaline festival', ühtenzoitab erazvuiččid muzikstilid da žanroid. Festivalihe ühtneba kut muzikantad, kudambad vaiše zavodiba väta da pajatada, muga «tähthaižed»-ki.

Vl 2025 eriline aigtego mäni festivalin scenal: patriotižen «Venäma — nece mö»-pajokonkursan final.

Festivalin tegijad nimitadas sidä «kanzaližeks», sikš ku sil kut lapsed, muga vanhembad-ki voidas löuta ičeze mel'hetartust: attrakcionad, bobuštuzsijad, lapsiden taho animatoroiden radonke.

Vl 2025 festival' radoi tulnuziden kanzparoiden registracijan täht eskai da völ il'mšuruiden festival' oli.

«Karjalan Vozduh»-festivalil pidetas «Tehtud Karjalas»-ozutelendan. Käziradoiden allejal mastarid ozutadas mastar-klassoid da mödas ičeze käzil sätud tegesid.

Tegemižen sija

«Karjalan Vozduh» om muzikaline festival', tegese Peski-aerodromal, kudamb sijadase Petroskoi-lidnas Änižjärven randal. Lidnan kül'bendrand levitase päliči tes aerodromaspäi.

Putta festivalile voib lidnan avtobusoil. Matk Petroskoin keskuzpalaspäi libo lidnan päraudtestancijaspäi om 15..20 minutad, lendimportaspäi läz koumekümned minutad.

Infrastruktur

Festivalin sijal oma:

• kangazkodiden lidnut (600 kangazkodihesai kacujiden täht);
• avtoseižundtaho — tuhaze sijhasai;
• bobuštuztaho;
• tahot lapsiden täht;
• sömsija;
• sporttahod.

Festivalin istorii

2005−2010

Venälaine «Karjalan Vozduh»-festival' avoinudel irdal zavodihe vodel 2005, konz Petroskoin eläi i aktivist Maksim Mazurovskii meleti tehta Karjalas surt muzikališt aigtegod. Karjalan kul'turan i opendusen ministrusiden, mugažo «Meiden radio — Petroskoi»-radiostancijan da karjalaižen «Nika»-telekompanijan abul Mazurovskii tegi ezmäšt muzikfestivalid avaitud taivhan al Peski-aerodromal vn 2005 17.-18. kezakud, sen nimi oli ven.: «Северное нашествие». Petroskoi tegihe ezmäižeks lidnaks (ei lugeda lidnoid, kus million eläjid om), kus mäni rok-festival' ven.: «Нашествие»-brendan mödhe. Sil eziniba ven.: «Ночные снайперы», ven.: «Маша и Медведи», ven.: «Задвиги Поплавского», Aspirin, D`Airot da toižed. Hedlaineroikš tegihe Splin da toižed gruppad. Mugažo eziniba muzikantad Petroskoišpäi, Murmanskaspäi, Severodvinskaspäi da Kostamukšaspäi: hö eziniba tetabiden muzikantoiden keskes. Festivalile tuli 12 tuhad ristituid. Sen tegijad saiba kundališt «Rigehtai tulebha aigha lidn»-lahjad (ven.: «Город, устремлённый в будущее») «Voden 2005 kundaline iniciativ»-nominacijas.

Sid' festivalin nimi oli «Vozduh». Vozil 2005−2009 se mäni kaikuččen voden. Tobjimalaz mäni kezakun jäl'gmäižil pühäpäivil, kanman Petroskoin lidnan päiväd.

Vl 2010 festival' oli planoiš tehta 18.-20. kezakud, no 10. kezakud orgkomitet sanui sen heitandan polhe: festivalin tegijad ei sanugoi laskendad kävutada tahod koncertan tegemižen täht. «Vozduh:an» orgkomitetan pämez' Jelena Šaglina sanui press-konferencijal, miše hö ei sanugoi ni üht taritud tahod. Pigai Karjalan Südäiazjoiden ministrusen kaclendan ohjanduz avaiži kriminališt azjad festivalin tegijoiden Šaglinan da Mazurovskijan mödhe. Tedištelusen versijan mödhe hö vargastiba Karjalan büdžetaspäi pol'tošt millionad rublid, väritadihe heid služban valdoiktusiden ülituses. Vn 2013 tal'vkus kaik väritused rahoiden vargastuses oliba heittud. Vn 2013 sulakus Šaglina sai kaks' vot uslovno, Mazurovskii — koume vot uslovno.

2013−2016

Maksim Mazurovskii tegi ut festivalid vn 2013 sügüz'kus Končezero-järven randal, kaks'kümnes kilometras Petroskoišpäi. Sen nimi oli «Vozduh. Perezagruzka», läz 40 pajatajad ezini sil, hedlaineroiden keskes oliba «Alisa», «Arija», ven.: КняZz. Festivalile tuli läz 12 tuhad ristituid.

Vl 2014 festival' oli tehtud kezakus Peski-aerodromal, sen nimi oli ven.: «Северный воздух».

Vl 2015 festivalile täudui kümne vot. Jäl'ghe ridoid «Meiden radio»-radiostancijanke, kudambal avtoroiktused oliba «Vozduh»-brendale, tegijad pätiba vajehtada festivalin nimed i käta «Karjalan Vozduh:aks».

Vn 2016 keväz'kus festivalin tegii Maksim Mazurovskii sanui, miše festivalid ei linne, sikš ku ei ole rahoid. Sid' Mazurovskii pakiči abud Karjalan valdkundmehištos festivalin edeližen tegemižen täht.

Vl 2019 tahtoihe vedada festivalid Murmanskas, no nece mel'pideg ei olend tugetud valdkundmehištol.

Vodelpäi 2023

Vl 2023 muzikaline festival' oli udessündutadud, no vajehti nimed da kändihe «Karjalan Vozduh:aks». Tegeškat'he sidä rahatugel. Maksim Mazurovskijan sanoiden mödhe oli planoiš tehta «pen't aigtegod», no sündui sur' projekt. Festivalin tahoks-2023 tegihe karjalaižen pakaižukon eländsija Čaln-küläs. 16.-18. kezakud «Karjalan Vozduh»-festivalin scenal ezini enamba 40 muzikantad. Festivalin vedajaks tegihe ven.: «АукцЫон»-rokgruppan frontmen.

Vl 2024 festival' mäni 14.-16. kezakud, möst karjalaižen pakaižukon — Talviukon eländsijal. Festivalihe ühtni enamba vižkümned pajogruppad (Rock Privet, GSPD, ven.: Юрий Лоза, ven.: «План Ломоносова», ven.: «Конец фильма», ven.: «Кирпичи», Jane Air, ven.: Кино da toižed). Festivalile tuli 25 tuhad kacujid.

Vl 2025 festivalile täudui kaks'kümne vot. Sen tehmižen täht valdkundmehišton orgkomitet oli keratud ezmäižen kerdan, kudambad ohjanzi Karjalan Valdkundan Artur Parfenčikov-pämez'. Festival' oli tugetud Venäman kaičendministrusen kul'turan departamental. Festivalin tehmižen sijaks möst tegihe Peski-aerodrom. Festival' mäni ezmäižen kerdan nell' päiväd (12.-15. kezakud), ezmäižen kerdan festivalin aigan oli keratud edheotajiden «Tehtud Karjalas»-ozutelend, radoi oficialine ZAGS kanzparoiden registracijan täht. Festivalin büdžet oli enamba 100 mln rublid. Programas oli neniden muzikantoiden da gruppoiden ezitust: RammProject, ven.: «Шекsпир», ven.: «Ундервуд», ven.: «Гудтаймс», ven.: «Биртман», ven.: «Горшенев», ven.: «Алиса» da toižed. 12. kezakud festivalin scenal mäni patriotižen «Venäma — nece mö»-pajokonkursan final.

Festivalin hedlainerad

• 2005 — ven.: «Сплин», ven.: «ЧайФ»;
• 2006 — ven.: «Алиса», ven.: «Король и Шут», Brainstorm;
• 2007 — ven.: «Агата Кристи», ven.: «Браво», ven.: «Ленинград»;
• 2008 — ven.: «Король и Шут», ven.: «Кипелов», ven.: «Чиж и Co», ven.: «Ночные снайперы», ven.: «Пилот»;
• 2009 — ven.: «Алиса», Brainstorm, ven.: «ЧайФ»;
• 2013 — ven.: «Алиса», ven.: «Ария», ven.: «КняZz», ven.: «Ляпис Трубецкой»;
• 2014 — The Rasmus, ven.: «ДДТ»;
• 2015 — ven.: «Пикник», Lumen, ven.: Лирой Торнхилл;
• 2023 — ven.: «Алиса», «TODD», ven.: «Пилот», ven.: «Гарик Сукачёв», ven.: «СерьГа», ven.: «Мара»;
• 2024 — ven.: «Кино», ven.: Вадим Самойлов, ven.: Кипелов.

Irdkosketused

• «Karjalan Vozduh»-festival' | Kut se oli vl 2024 rutube.ru-saital. (ven.)