Karjalan taidehmuzejas

Karjalan taidehmuzei (ven.: Музей изобразительных искусств Республики Карелия) — muzei Petroskoi-lidnas, om tehtud vodel 1960^[1].

Ühthižed tedod

Muzei sijadase enččen Oloncan gubernijan mužikoiden gimnazijan istoriližes pertiš, mitte om sauvotud vodel 1790, pert' om federaližen znamoičendan puštpacaz.

Muzejan interaktivine ozuteluz «88 jänišad», radod Ju. A. Vasnecovan, lapsiden kuvad. 2018

Muzei oli avaitud kävutajiden täht 20. redukud vodel 1960. Ezmäine pämez' — М. V. Popova (1927—2000). Muzejan keradamišton pohjal oma radod, miččed andoi muzejale Karjalan valdkundaline kodiröunan muzei. Jäl'ges muzejan kollekcijaha ližazihe radod, miččed andoiba Valdkundaližed Venäman muzei, Valdkundaline Tretjakovan galerei da Ermitaž.

Muzejas oma mugomad ozutelused: Endevanhan Karjalan jumalaižiden pirdandkuvad, Karjalan rahvahaline taideh, Karjalan XX voz'sadan taideh, Venäman voz'sadan XVIII — XX augotišen taideh, Venäman XX voz'sadan taideh, Päivlaskm-Jevropan taideh. Kaiked muzejan keradamištos om enamba 16 000 eksponatad, a kirjišton fond enamba 17000 azjbumagad^[2].

Melentartuižembad oma pirandkuvad V. М. Vasnecovan «Hristan nagloičend ristha» (1902), V. D. Polenovan «Londuzkuva jogenke» (1888) da «Ojat'-jogen mägekaz rand», I. Je. Repinan «Hristos Gemsimanskan sadus», I. I. Šiškinan «Te puištos, sumeg», I. K. Aivazovskovan nel'l' kuvad, I. N. Kramskovan et'ud «Hristan Pä» (1863), этюд I. I. Levitanan et'ud «Pil'vekaz sä» da toižed.

Vodel 2001 om udištadud muzejan pert'.

Vodel 2019 muzejale anttihe uden honusen fondan kaičendan täht, a päzutadud 150 nellikmetroil avaitihe uden kaikenaigaižen ozutelusen ven.: «Вселенная Калевала» nüdüdläižiden materialoiden da kalundišton kävutandanke, kus om ozutadud enamba sada eksponatad muzejan «kalevalan» keradamištospäi, sen lugus: unohtamatomad Tamara Jufan akoiden modkuvad, Georgii Stronkan da Osmo Borodkinan akvarelid, M'ud Mečevan linograv'urad, Nikolai Br'uhanovan čomad pirdandkuvad da äi toižid šedevroid ^[3].

Muzejan keradamišt

Karjalan taidehmuzejan keradamištos oma Venäman taidehen endevanhad XV voz'sadan jumalaižiden kuvad, nügüdaigaižiden pirdajiden töd da völ verazmaižen taidehen töd^[4].

Endevanhan venälažen taidehen keradamišt

Jumalaižiden pirdamižen fond om muzejan keradamištos päsijal da mülütab läz 2 500 eksponatad. Ani kaik se om keratud nügüd'aigaižen Karjalan territorijal, kuvastab jumalaižiden pirdamižen kehitoidandad Venäman pohjoižen kahtes istorižes regionas — Änižrandan da Päivlaskman Pomorjan.

Pohjoiž jumalaižiden pirdamine voz'sadan XVI om kuvastadud mugomil muštpachil kut «Uspenije» Vasiljevo-küläspäi, «Deisusnii čin» Časovenskaja-küläspäi, «Pühäd Jevstafii da Trifonн» Päl'ma-küläspäi, «Kaikiden pühiden sobat» Pebozero-küläspäi da toižil.

Endevanhan venälaižen taidehen keradamišton päpala oma voz'sadoiden XVII—XVIII jumalaižed. Eristil'joukus oma sijaližiden mastariden jumalaižed karjalaižes Segjärvespäi da völ Änižtagaižespäi, Oloncan röunaspäi, Päivlaskman Pomorjaspäi. Muzajas kaičese ei sur' puižiden kuviden kogomuz. Enamba nece pun čapandan oma voz'sadoiden XVII—XIX jumalaižed-bareljefad da vanhan uskondan jumalaižed Golgofan ristanke.

Endištamižen radod

Nügüd' endevanhan venälaižen taidehen muštpachiden endištamižen muzei om lopnu, jäiba vaiše üksjaižed erišused, avaiduz voz'sadoiden XV—XVI kuvid. Endištanikoiden päradod oma oigetud sihe, miše puhtastada voz'sadoiden XVII—XIX jumalaižid.

Dekorativno-kävutamižen taidehen keradamišt

Rahvahan taidehen keradamištos om enamba 2000 radod. Sihe mülüba sädon, poimetišen, kudondan, pun čapandan, tohesižen, vaskižen da savesižen kodikalundišton voz'sadoiden XIX — XX kogomused da völ nügüd'aigaižiden rahvahan mastariden radod.

Venäman XVIII — XX voz'sadoiden taidehen keradamišt

Venälaižen taidehen fondas oma pirdand-, grafik-, vestatuztöd (enamba 600 eksponatad). Sur' keradamišton pala oli anttud muzejaha voden 1960 augotišes Ermitaž-muzejaspäi, Venälaižen muzejaspäi, Tretjakovan galerejaspäi, personaližiš kogomusišpäi. Keradamišton kuldaižes fondas oma I. Šiškinan, I. Levitanan, V. Polenovan, K. Korovinan, A. Meščerskovan, A. Bogol'ubovan pirdandkuvad da toižid. Jo äjan vozid kävutajiden melentartuz' om kärautud tetaban kodiman marinistan I. Aivazovskovan radoihe.

Voz'sadan XX Kodiman taidehen keradamišt

Nügüd' keradamištos om lüznel'l' tuhad töd, miččed oma tehtud Moskvan, Piterin da toižiden valdkundan taidehkeskusiden mastaril. Muzejan melentartuz' voziden 1920—1930 pirdajiden radoihe abuti kerata materialad, mitte kuvastab jügedan kodiman taidehen kehitoitusen da ozutab vähän tetabiden nimid da unikaližid azjoid. Keradamišton ülenduz om Mihail Cibasovan, Tatjana Glebovan, Alisa Poretan, Pavel Kondratjevan töd — voz'sadan XX tetaban venälaižen avangardistan Pavel Filonovan openikoiden radod.

Voz'sadan XX Karjalan taidehen keradamišt

Karjalan voz'sadan XX kuvataidehen keradamištos om läz 3 000 radod da mülütab pirdandkuvad, vestatused, grafikad, dekorativno-kävutamižen da teatral'no-dekoracionižen taidehen kaluid. Se ozutab Karjalan kuvataidehen istorižen kehitoitusen. Muzei om keradanu da oppinu unikaližed keradamištod, miččed kuviteldas regionan rahvahaližid da taidehen veroid.

«Karjalaiž-suomalaine Kalevala-epos karjalaižiden, venälaižiden da verazmaižiden pirdajiden radoiš»-keradamišt

Kuvataidehen muzejas om keratud unikaline keradamišt karjalaiž-suomalaižen Kalevala-eposan teman mödhe. Nügüd' sihe mülüb läz 700 eksponatad. Sidä päpala om Karjalan, Piterin da Moskvan pirdajiden kirjoiden da stankovi grafik. «Kalevaline» keradamišt om muzejan fondoiden kaikid tarbhaižemb da vajehtelii, joga voden sen ozutadas muzejan ozutelusil, keradamišton eksponatad ühtnedas rahvahidehneskeižihe projektoihe.

Verhan maiden taidehen keradamišt

Verhan maiden taidehen keradamišt zavodihe vanhiden mastariden radoiden penes joukuspäi, miččen andoi muzejaha Karjalan rahvahaline muzei vodel 1960. Möhemba keradamištoho mülüiba Ermitažin da Venäman muzejoiden pirdandkuvad da vestatused. Keradamišton čomuz' om voz'sadoiden XVI—XVII niderlamdoiden pirdajiden Mihel' van Koksinan da Jan van der Geidenan radod «Susana da vanhad» da «Lidnalaine avoird». Om melentartuine Jevropan Meisen- da Sevr-manufakturoiden pen' farforan kogomuz.

Literatur

Дом на площади: Сборник статей / Музей изобр. искусств РК. — Петрозаводск: VERSO, 2000. — 63 с.
Музей изобразительных искусств Республики Карелия. — М., 2003. — 64 с.
Платонов В. Г. Деятельность Музея изобразительных искусств Республики Карелия по сохранению и презентации культурного наследия православия // Православие в Карелии: материалы IV научной конференции, посвящённой 25-летию возрождения Петрозаводской и Карельской епархии (25—26 ноября 2015 года, г. Петрозаводск). — Петрозаводск: Издательство ПетрГУ, 2016. — 478 с. — ISBN 978-5-8021-2949-4 — C. 343—349

Tarkendused

Homaičendad

[1] ttps://goskatalog.ru/portal/#/museums?id=170

[2] ttps://artmuseum.karelia.ru/news/v-muzej-izobrazitelnyh-iskusstv-karelii-privezut-shedevry-iz-russkogo-muzeya/

[3] ttps://gov.karelia.ru/news/02-03-2021-v-muzee-izo-otkrylsya-novyy-razdel-postoyannoy-ekspozitsii-vselennaya-kalevala/

[4] ttps://web.archive.org/web/20140305155149/http://artmuseum.karelia.ru/collection.html

[1]

[2]

[3]

[4]