Kirovskii zavod (metrostancii)

Piterin metropolitenan «Kirovskii zavod»-stancijan keskuzzal

«Kirovskii zavod» (ven.: Кировский завод) om Piterin metropolitenan stancii. Sijadase Kirovan—Viborgan linijal «Avtovo»- i «Narvskaja»-stancijoiden keskes.

Stancii om avaitud vn 1955 15. päiväl kül'mkud metron ezmäižes «Avtovo — Ploščad' Vosstanija»-jonos. Pavil'jon sijadase Stačkoiden prospektal, 70.

Vn 2011 15. päiväl tal'vkud Kul'turjäl'gusen kaičendan Nevondkund pani stancijad regionaliženke znamoičendanke kul'turjäl'gusen objektoiden ühthižhe valdkundaližhe nimikirjuteshe.

Arhitektur

«Kirovskii zavod» — kolonnine stancii süväs (süvüz — 44 m). Manalaine zal om tehtud A.K. Andrejev-arhitektoran da O.V. Ivanov-inženeran projektan mödhe. Ezmäižen kerdan stancijan konstrukcijas tonnelin sauvondan täht pandas kolonnoid terasižiden sarakoiden sijas, ned oma pandud korenvuiččiš kaugedraudasižiš tübingoišpäi.

Stancijan formitandan tem om socialistižen tegimišton šingotez.

Elektrifikacii	Kivivoin tegimišt	Kivihil'tegimišt	Metallurgii

• 
  Leninan büst
• 
  Stancijan platform 2. tel
• 
  Tesein
• 
  Dekorativine uks'

Kohenduz

Vll 2003−2005 vajehtihe ezimramorad sarakoil stancijal. Tehtes radoid avaitud kolonnoiš nägui vedenveimen sistem. Vl 2008 tehtihe stancijan teiden kohendust «špalitoman» tehnologijan abul.

Šingotesen perspektivad

Vn 2023 kahtendes poles zavottihe sauda sirdandad sauvomas olevaha «Putilovskaja»-stancijha «Krasnosel'sko-Kalininskaja»-jonol, sirdand linneb stancijan suvipäivlaskmaižes čogas. Sigä seižui Leninan büst sirttas kuz' metrad lähemba eskalatortunnelihe. Sirdandsol'men avaiduz planiruiše vl 2025. Päličmänendsija oli stancijan vn 1955 projektan pirdatusiš.