Klincad

Klincad
Клинцы

Lidnanznam	Flag
Valdkund	Venäma
Eläjiden lugu (2021)	63,059 ristitud
Pind	64 km²
Pämez'	Oleg Škuratov (reduku 2014—)
Telefonkod	+7−48 336-xx-xxx
Avtokod	32
Aigvö	UTC+3 (MSK+0)

Tehnine škol Klincoiš (2014, naižgimnazijan sauvuz istorižikš)

Klincad (ven.: Клинцы́) om Venäman lidn da lidnümbrik valdkundan päivlaskmas, Bränskan agjas. Se om agjan kahtenz' surtte lidn, mugažo om Klincan rajonan administrativižeks keskuseks i ei mülü sihe.

Istorii

Eländpunktan aluz om pandud vanhuskolaižil vl 1707 kuti Klinci-slabad, om nimitadud edeleläjiden kanzannimen mödhe (ven.: Клинец) äilugus. 19. voz'sadal se kändihe tekstil'tegimišton keskuseks, oli olmas 25 edheotandad, niiden kesken kümne vatefabrikad da 11 nahktegint. Ühtennimine Klincad-raudtestancii radab «Bränsk — Gomel'»-keskustal vspäi 1887. Žilo sai lidnan statusad vl 1925.

Klincan ižandusen päedheotandad oma avtolibutimiden tegim, tulkimrenghiden tegim da silikatsavičun tegim. Mugažo sauvondmaterialiden kombinat, «Metrobeton»-tegim, špagatanfabrik, konservtegim, maidedheotand da kengidenfabrik oma saudud.

Geografijan andmused

Lidnan sijaduz ümbärdajas rajonas i agjas vn 2007 kartal

Lidn sijadase agjan päivlaskmas, seižub Moskovk-jogen randal (ven.: Московка, Turosnan ližajogi, Dnepran bassein), 150..160 m ü.m.t. korktusil.

Matkad Bränskhasai om 164 km pohjoižpäivnouzmha, Ukrainan röunhasai — läz vižkümned kilometrad suvhe, Vaugedvenäman röunhasai — läz 50 km päivlaskmha da pohjoižhe.

Tobmuz

Kaik kaks' žilod mülüdas ümbrikho Klincad-lidnan ližaks: Zaimišče (5226 rist. vl 2013) i Ardon' (2418 rist. vl 2013).

Lidnümbrikon pämez' om Rahvahandeputatoiden nevondkundan ezimez'. Klincad-lidnan Administracijan pämez' om Sergei Jevtejev vn 2021 sulakuspäi, hän jo oli sil-žo radnikusel (tal'vku 2015 — kül'mku 2017). Edeližed lidnan Administracijan pämehed oma Fedor Sušok (keväz'ku 2020 — sulaku 2021), Aleksandr Morozov (tal'vku 2017 — sügüz'ku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 62 510 ristitud, lidnümbrikon — 70 350 ristitud, vn 2021 lidnan — 63 059 ristitud. Kaik 62 832 eläjad oli lidnas i 70 164 eläjad kaikes lidnümbrikos vl 2017. Kaikiš suremb lidnan ristitišt oli 72 tuhad eläjid vozil 1986−1987.

Rahvahad (enamba 0,4 % vl 2021): venälaižed — 81,7 %, toižed rahvahad — 2,8 %, rahvahuden ozutandata — 15,5 %.

Ortodoksižen hristanuskondan üks'toštkümne pühäpertid oma kaičenus i saudud lidnas: phh. Petr- i Pavel-appstoloiden kafedraline päjumalanpert' (letihe vll 1835−1848), Jumalannägundan päjumalanpert' (om avaitud vl 2020), Klincan Emäganpäivän naižjumalankodi, seičeme jumalanpertid i časoun'. Niiden ližaks kuz' jumalanpertid ei ole kaičenus.

Lapsiden opendusen aluzkundad oma kaks'kümne üks' nimitadud i nomeruidud päivkodid (nomer 2, 3, 7, 8, 10..12, 14, 15, 17, 18, 20, 23..27, 29..32), kahesa keskškolad (nomer 2..9), gimnazii nomer 1 Ju.A. Gagarinan nimed, lapsiden sädamižen keskuz, čomamahtoiden škol E.M. Beläjevan nimed, lapsiden da norišton kaks' sportškolad («Luč» V. Fridzonan nimed i V.I. Škurnoin nimed). Klincan industrialiž-pedagogine kolledž om lidnan professionaližen opendusen aluzkundaks.

Galerei

• 
  Tobmuden sauvuz (2015)
• 
  Phh. Petr- i Pavel-appstoloiden kafedraline päjumalanpert', vn 2014 nägu
• 
  Avtolibutimiden tegimen produkcii vl 2012
• 
  Lidnan istorižed torguindrived (2017. voz' vai sen aigemba)
• 
  Kul'turkeskuz vl 2015

Irdkosketused

• Lidnümbrikon tobmuden sait (klintsy.gosuslugi.ru) i sen vanh versii (klinci.ru, om täuttud vn 2025 uhokuhusai). (ven.)