Krasnoural'sk

Krasnoural'sk
Красноуральск

Lidnanznam	Flag
Valdkund	Venäma
Eläjiden lugu (2025)	21,159 ristitud
Pind	21,7 km²
Pämez'	Dmitrii Kuz'minih (sügüz'ku 2017—)
Telefonkod	+7−34 343-xx-xxx
Avtokod	66, 96, 196
Aigvö	UTC+5 (MSK+2)

Krasnoural'sk (ven.: Красноура́льск) om Venäman lidn Sverdlovskan agjan päivlaskmas. Se om Krasnoural'skan municipaližen ümbrikon (edel 2025. vot — lidnümbrikon) administrativine keskuz, mülüb sihe.

Istorii

Ezmäižed eländpunktad lidnan territorijal mainitasoiš vspäi 1832 vällän kuldkivendon löudmižsijidenno. Avaitihe vas'ken Bogomolovan löudmižsijad 19. voz'sadal, kuldsijan Bogomolov-pidajan kanzannimen mödhe. Eländpunktan aluz om pandud vl 1925 kut Bogomolstroi-žilo otmaha kävutamižhe vas'ken kivendod. Vl 1929 udesnimitihe sidä Uralmed'stroi-žiloks. Vas'kensuladuztegim radaškanzi vl 1931, i udesnimitihe radnikžilod nügüdläižikš. Vn 1932 vilukus anttihe Krasnoural'skale lidnan statusad. Vspäi 1963 lidn alištub agjan tobmudele oikti.

Krasnoural'sk šingotase «Svätogor»-vas'kensuladuzkombinatal (mülüb Uralan kaivuzmetallurgižhe kompanijha), meblin tehmižel, leibänkombinatal i lindfabrikal. Himine tegim ei ole rados.

Geografijan andmused

Krasnoural'skan ümbrik agjas vn 2018 kartal

Lidnan suvi sijadase ümbrikon lodehes, Kušaik-jogen randoil (ven.: Кушайка 12 km pitte, Saldan hura ližajogi, Tur-jogen oigedpol'ne bassein), lidnan pohjoine — Klüčevk-jogen randoil (ven. Ключевка, Aivanjogen oiged ližajogi, Saldan hura ližajogi), Keskmäižen Uralan päivnouzmaižil pautkil, 220 m ü.m.t. keskmäižel korktusel.

Vas'k-raudtestancii (ven.: Медь) om lopuline sarakol «Alatagil — Serov»-raudtekeskustaspäi. Matkad Jekaterinburghasai om 172 km suvhe orhal, 207 km avtotedme vai raudtedme. Lähembaižed lidnad oma Kušv seičemetoštkümnes kilometras päivlaskmha-suvipäivlaskmha orhal, 20 km avtotedme vai raudtel, i Ülätur kahesas kilometras päivlaskmha orhal, avtol vai raudtel.

Tobmuz

Kaik ühesa pen't žilod da üks' külä mülüdas ümbrikho Krasnoural'skan ližaks. Küläkundad oliba tühjitadud vl 2017. Municipaližen ümbrikon pind — 1627,23 km².

Ümbrikon tobmuden pämez' om sen Administracijan pämez', edel vn 2017 redukud oli Duman ezimez'. Municipaližen ümbrikon Duman ezimez' om Aleksei Medvedev vn 2017 redukuspäi. Edeline Duman ezimez' (sen aigan lidnümbrikon pämez') om Väčeslav Gribov (eloku 2016 — reduku 2017).

Eläjad

Vn 2010 Venäman rahvahanlugemižen mödhe lidnan eläjiden lugu oli 24 980 ristitud, lidnümbrikon — 25 541 ristitud. Vn 2021 rahvahanlugemižen mödhe lidnalaižiden lugu oli 21 507 ristitud. Kaik 23 142 ristitud elihe lidnas i 23 619 ristitud kaikes lidnümbrikos vl 2017. Kaikiš suremb lidnan ristitišt oli 38..40 tuhad eläjid vll 1959−1979 (40 tuh. rist. vl 1967).

Rahvahad (ozutadud rahvahudenke vl 2010): venälaižed — 92,4 %, totarlaižed — 3,8 %, toižed rahvahad — 3,8 %.

Ortodoksižen hristanuskondan kaks' jumalanpertid i protestantizman koume pühäpertid oma saudud lidnas.

Openduz

Lapsiden opendusen aluzkundad oma kümne nomeruidud päivkodid (3, 4, 7..9, 16, 18, 22, 26, 30), viž keskškolad (nomer 1, 2, 3, 6, 8), korrekcine škol nomer 4, čomamahtoiden škol, sportškol.

Krasnoural'skan äiprofil'ne tehnikum om lidnan professionaližen opendusen aluzkundaks.

Galerei

• 
  Municipaližen ümbrikon administracijan sauvuz Vägestusen torgul (2011)
• 
  Ph. Ioann Kronštadtalaižen i ph. Sergii Radonežalaižen jumalanpert', vn 2019 nägu
• 
  «Svätogor»-edheotandan tehmižlavut vl 2022 (edeline nimituz Krasnoural'skan vas'kensuladuzkombinat)
• 
  «Metallurg»-kul'turkeskuz (2022)
• 
  Molodost' -sportpert'kulu vl 2022 («Noruz»)

Irdkosketused

• Krasnoural'skan municipaližen ümbrikon tobmuden sait (krur.midural.ru). (ven.)