Lagan'

Lagan'
Лагань

Lidnanznam
Valdkund	Venäma
Eläjiden lugu (2025)	13,756 ristitud
Pind	91,38 km²
Pämez'	Gennadii Očirov (kül'mku 2015—)
Telefonkod	+7−84 733-xx-xxx
Avtokod	08
Aigvö	UTC+3 (MSK+0)

Lagan' (kalm.: Лагань, ven.: Лага́нь) om Venäman lidn da lidnankund Kalmikijan Tazovaldkundan suvipäivnouzmas. Se om Laganin rajonan administrativine keskuz, mülüb rajonha.

Istorii

Eländpunktan aluz om pandud sar'he mererandanno kuti sidanikoiden evropižen Venäman keskusespäi Lagan' -žilo vl 1871, oli mülünu Astrahanin makundha. Vspäi 1927 om Kalmikijan palaks. Vl 1936 kalanümbriradai kombinat radaškanzi, i kätihe Laganid radnikžiloks. Kalmikalaižiden deportacijan jäl'ghe vl 1944 žilon nimi oli Kaspiiskii. Aigan mändes lete ühtenzoiti sart randanke. Vl 1963 mašiništonsauvomižen tegim radaškanzi, i Kaspiiskii sai lidnan statusad. Vspäi 1991 nimitadas lidnad eziauguižikš.

Lagan' šingotase kalan ümbriradmižel i osötran kazvatusel, sömtegimišton toižil edheotandoil, om kivivoin samižen rajonan keskuseks, mugažo turizman keskuz.

Geografijan andmused

Laganin rajonan sijaduz tazovaldkundas vn 2010 kartal

Lidn sijadase rajonan pohjoižpäivnouzmaižel randištol, läz mererandad, 20 m alemba mail'man valdmeren tazopindad keskmäižel korktusel, mi om 7..8 metras ülemba Kaspijan pindad. Ühtenzoitase merenke laivkanalal kümnen kilometrad pitte.

Matkad Elisthasai om 260 km lodeheze orhal vai 305 km avtotedme. Lähembaine lidn om Kamizäk (Astrahanin agj) 98 km pohjoižpäivnouzmha orhal vai 205 km avtotedme. Matkad lähembaižhe Ulan-Hol-raudtestancijhasai om 40 km päivlaskmha oiktal avtotel.

Tobmuz

Laganin rajonan municipalitetoiden röunad vl 2015

Lagan' om lidnankundan üks'jäižeks eländpunktaks. Lidnankundan pind — 1 521,1 km².

Lidnan municipaližen ühtnikan pämez' om sen Administracijan pämez' (ahlači). Gennadii Očirov radab lidnan Administracijan pämehen vn 2015 kül'mkuspäi. Edeline Administracijan pämez' om Nikolai Girenko, radoi vn 2015 kül'mkuhusai. Lidnankundan Deputatoiden suiman ezimez' om Anna Dordžieva vn 2020 redukuspäi. Edeližed suiman ezimehed oma Irina Žigul'skaja (kezaku 2017 — reduku 2020), Väčeslav Anhanov (radoi vn 2017 kezakuhusai).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 14 323 ristitud, rajonan seičeme kümnendest, vn 2021 — 13 834 ristitud. Vl 2017 kaik 13 137 ristitud elihe lidnas. Kaikiš suremb lidnan ristitišt oli 16 300 eläjad vl 1992.

Rahvahad (enamba 1 % vl 2010): kalmikalaižed — 50,2 %, venälaižed — 38,2 %, kazahlaižed — 7,9 %, totarlaižed — 1,4 %, toižed rahvahad — 2,3 %, rahvahuden ozutandata — 0,05 %.

Buddizman Vauvhatusen pühäpert' (suburgan) radab lidnas vspäi 1995, kaks' stupad oma saudud mugažo. Ortodoksižen hristanuskondan Mikulai-čudonsädajan jumalanpert' om avaitud lidnas, letihe vll 2003−2011.

Lapsiden opendusen aluzkundad oma kuz' nimitadud päivkodid, koume keskškolad (nomer 1, 3, 4), äiprofil'ne gimnazii, škol-internat, lapsiden sädamižen pert', muzikškol, lapsiden da norišton sportškol V.G. Anhanovan nimed. Politehnine tehnikum om lidnan professionaližen opendusen aluzkundaks.

Irdkosketused

• Lidnan tobmuden sait (algmo-rk.ru). (ven.) (angl.) (saks.)

	Kalmikijan Tazovaldkundan lidnad
	Elist | Gorodovikovsk | Lagan'