Lobn'

Lobn'
Лобня

Lidnanznam	Flag
Valdkund	Venäma
Eläjiden lugu (2024)	81,143 ristitud
Pind	31,56 km²
Pämez'	Anna Krotova (uhoku 2024—)
Telefonkod	+7−495-xxx-xx-xx. +7−498-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Lidnan transportkart (2018)

Lobn' (ven.: Ло́бня) om Venäman lidn da lidnümbrik Moskvan agjan keskuzpalan pohjoižes.

Istorii

Eländpunktan aluz om pandud vl 1902 kuti žilo udenno Lobn'-raudtestancijanno, nimitihe penen jogen mödhe. Sätihe Lobn'-radnikžilod vl 1947 lähižiden kezaküliden i amuižiden eländpunktoiden ühtištusel. Radnikžilo sai lidnan statusad vn 1961 18. päiväl tal'vkud. Alištub agjan tobmudele oikti vspäi 1975, lidnümbrik vspäi 2004.

Lobn' šingotase sauvondmaterialiden pästandal (sauvondhimii, manalaižed raudbetonkonstrukcijad, metalližed tegesed da konstrukcijad, sauvondporcellan, keramine tegim), «Aeroflot»-kompanijan edheotandoil, elektrotehnižel i liftoiden tegimil, sömtegimištol (sömkoncentratad, pühävoi), mugažo bobaižiden tegim, pakuitesen kaks' tegint (plastik i «Tetra Pak»), puvillan kezerduzfabrik i mužiksobiden edheotand ratas lidnas. Kaiken Venäman sötkiden tedoinstitut V.R. Vil'jamsan nimed om olmas Lobnin Tedolidnudes.

Geografijan andmused

Lidnan i Dolgoprudnijan sijaduz päivlaskmha Mitiščin lidnümbrikospäi vn 2014 kartal

Lidn sijadase Lobn'-jogen randoil (ven.: Лобня seičeme kilometrad pitte, Kläz'man hura ližajogi), 195 m ü.m.t. keskmäižel korktusel. Lobnin uit om saudud lidnha.

Matkad Moskvhasai (Moskvan rengazavtotehesai) om vižtoštkümne kilometrad suvhe. Toižed lähembaižed lidnad (orhal) oma Dolgoprudnii ühtes kilometras suvhe, Himki kümnes kilometras suvhe i suvipäivlaskmha sen Šeremetjevo-lendimportanke kahtes kilometras suvipäivlaskmha, Moskvan Zelenograd-rajon 12 km päivlaskmha.

Lobn'-raudtestancii radab lidnan suves «Moskv (Savölovon päraudtestancii) — Taldom»-keskustal vspäi 1901. Toižed lidnan raudteplatformad oma Depo i Lugovai (ven.: Луговая) kaks' i viž kilometrad pohjoižhe. «Moskv — Dubn»-avtote (A104-trass) ümbärdab lidnad kahtes..koumes kilometras päivnouzmaspäi.

Tobmuz

Lidn om lidnümbrikon üks'jäižeks eländpunktaks. Lidnan Deputatoiden nevondkund kogoneb 21 ühtnijaspäi.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Igor' Demeško (eloku 2022 — viluku 2024), Jevgenii Bariševskii (Евгений Баришевский, reduku 2021 — eloku 2022), Jevgenii Smišläjev (Евгений Смышляев, 2014 — reduku 2021). Lidnümbrikon Deputatoiden nevondkundan ezimez' om Aleksandr Kuznecov vn 2021 redukuspäi. Edeline lidnan nevondkundan ezimez' om Nikolai Grečišnikov, radoi vn 2021 redukuhusai.

Eläjad

Vl 1959 žilon ristitišt oli 12 249 eläjad, vl 1979 lidnan — 51 811 eläjad. Vn 2010 Venäman rahvahanlugemižen mödhe lidnan eläjiden lugu oli 74 252 ristutud, vn 2021 — 82 764 ristitud. Kaik 87 352 eläjad oli lidnas vl 2017. Kaikiš suremb lidnan ristitišt oli 90 231 eläjad vl 2020.

Rahvahad (ozutadud rahvahudenke vl 2010): venälaižed — 90,2 %, ukrainalaižed — 2,4 %, armenijalaižed — 1,4 %, totarlaižed — 1,1 %, toižed rahvahad — 4,9 %.

Ortodoksižen hristanuskondan seičeme pühäpertid oma kaičenus i saudud lidnas: kuz' jumalanpertid i časoun'.

Openduz

Lapsiden opendusen aluzkundad oma ühesatoštkümne municipališt nimitadud i nomeruidud päivkodid (nomer 1..19) i nell' privatišt päivkodid, ühesa keskškolad (nomer 1..4, 6..10), kaks' liceid (licei muite i inženeriž-tehnine Aviatika), specialine (korrekcine) škol lapsiden täht tervhuden röunatud voimusidenke, lapsiden da norišton sädamižen Planeta talantov-pert'kulu («Lahjakahuziden planet»), čomamahtoiden škol, olimpižen varan sportškol (dzüdo, sambo, fehtuind, gimnastik, futbol).

Klin-lidnan «Moskvanaluine»-kolledžan palakund (ende Lobnin sauvondtehnikum) om lidnan professionaližen opendusen aluzkundaks.

Galerei

• 
  «TR2»-torguindkeskuz (31. tal'vku 2025)
• 
  Spasan londuseližen jumalanpert' Kiovos, vn 2012 nägu
• 
  Bobaižiden tegim vl 2014
• 
  Sauvondtehnikum (2014, nüg. «Moskvanaluine»-kolledžan palakund)
• 
  Lobn'-raudtestancii vl 2011

Irdkosketused

• Lidnümbrikon tobmuden aluzkundoiden oficialine sait (лобня.рф). (ven.)