Rešetnikov Maksim Gennadjevič

Rešetnikov Maksim Gennadjevič
	Rešetnikov Maksim Gennadjevič
radmižen toižend:	politikanmez'
sündundan dat:	11. heinku 1979
sündundan sijaduz:	Perm', Venäman NFST, NSTÜ
valdkund:	Venäma
sait:	economy.gov.ru/material/…
	Rešetnikov Maksim Gennadjevič VikiAitas

Maksim Gennadjevič Rešetnikov (ven.: Макси́м Генна́дьевич Реше́тников, sünd. 11. heinku 1979 Permihe, Venäman NFST, NSTÜ) om venämalaine valdkundmez'. Otab Venäman ekonomikan šingotesen ministran radnikust vn 2020 vilukun 21. päiväspäi^[1].

Ende mez' radoi Permin randan pämehen (gubernatoran) vn 2017 sügüz'kun 18. päiväspäi vn 2020 vilukun 21. päivhäsai. Nügüdläine Venäman valdkundaline koumanden klassan nevoi (2010). Ühtneb politižen «Ühthine Venäma»-partijan Ülembaižhe nevondkundha^[1].

Elostarin

Maksim Rešetnikov om sündnu vn 1979 11. heinkud Perm'-lidnha.

Openduz

Mez' lopi gimnazijan № 17 (Perm'). Jäl'ges školad päzui Permin valdkundaližhe universitetha, sen ekonomižen kibernetikan tedokundale. Vodel 2000 lopi universitetan, vaumičihe ekonomistaks-matematikantedajaks, vodel 2002 openui kelentedomeheks-kändajaks.

Vodel 2003 L. S. Portnoin ohjandusel polesti dissertacijad «Agjan ekonomikan ohjandamine rahasisteman pohjal: principad da modelid (Permin agjan ozutesen mödhe)»-temadme, kändihe ekonomikan tedokandidataks.

Rad

Vozil 1998−2002 Rešetnikov radoi pätundijan, projektoiden ohjandajan Prognoz-organizacijas («Endustuz»).

Vozil 2000−2005 Rešetnikov radoi rahantulendan da rajadusiden palakundan pämehen, regionaližiden rahoiden da rahan sijadusen palakundan pämehen, oli ekonomikan ohjandusen pordaigaližeks pämeheks Permin agjan administracijas. Agj kändihe randaks vn 2005 tal'vkus.

Vozil 2005−2007 Rešetnikov — Permin randan programan tegendan palakundan ezmäine pordaigaline pämez', Permin randan gubernatoran administracijan ezmäine pordaigaline pämez'. Vozil 2007−2009 rahakosketusiden palakundan pordaigaline pämez', Venäman subjektoiden valdkundmehiden radon arvon da tarkištelendan palakundan pämez' (Venäman regionaližen šingotesen ministruz).

Vn 2009 14. sulakud — 12. redukud mez' oli Permin randan gubernatoran administracijan pämehen. Sil-žo vodel oli pandud Venäman enččen Dmitrii Medvedev-prezidentan radnikoiden varha.

Vozil 2009−2010 Rešetnikov — valdkundan ohjanduzpalakundas, Venäman ohjastusen apparatan regionaližen šingotesen i ičenaižen organan pämez', oli sen ohjandajan.

Vodel 2010, konz Sergei Sobänin kändihe Moskvan meraks, Rešetnikov mäni radole lidnan ohjastushe. Hän oli Moskvan ezmäižen ohjastusen i meran apparatan pordaigaližen pämehen.

Vozil 2012−2017 Rešetnikov radoi ministran, oli Moskv-lidnan ekonomižen politikan da šingotesen palakundan pämehen.

Permin randan pämez'

Vn 2017 6. uhokud Venäman Vladimir Putin-prezidentan käskön mödhe Rešetnikov kändihe (valičendoiden päivhäsai) Permin randan pordaigaližeks pämeheks.

Vn 2017 14. kezakud Rešetnikov oli taritud Permin randan pämehen kandidataks «Ühthine Venäma»-partijaspäi. Valičendpäivän sen-žo voden 10. sügüz'kud hän vägesti, sai 82,06 % änid. Vn 2017 18. sügüz'kud mez' zavodi rata Permin randan gubernatoran (pämehen).

Vn 2017 tal'vkuspäi Rešetnikov ühtneb «Ühthine Venäma»-partijha. Vn 2018 8. tal'vkud pätandan mödhe, kudambad sen partijan 18. suiman delegatad tegiba, Rešetnikov kändihe partijan Ülembaižen nevondkundan ühtnijaks.

Vn 2018 18. heinkud — vn 2019 28. vilukud Rešetnikov oli Venäman Valdkundaližen nevondkundan ühtnijan.

Venäman ohjastuses

Vn 2020 21. vilukud Venäman prezidentan käskön mödhe Rešetnikov kändihe Venäman ekonomikan šingotesen ministraks; siloi-žo hän oli heittud Permin randan pämehen radsijalpäi ičeze tahton mödhe.

Rešetnikov — «Venälaižen venčurorganizacijan» pämehiden nevondkundan ohjandai (vn 2020 keväz'kuspäi), «Federaližen korporacijan penes da sures biznesas» pämehiden nevondkundan ohjandai (vn 2020 sulakuspäi). «Venäman raudted»- (vlpäi 2020) i «Venäman počt»- (vn 2020 tal'vkuspäi) organizacijoiden pämehiden nevondkundan ohjandai, Venäman Oiktoiden rahasijadusiden fondan ühtnii (vn 2020 sulakuspäi), VTB-bankan ühtnii (vn 2020 sügüz'kuspäi).

Vn 2020 semendkun 12. päiväspäi — Venäman prezidentan erinii ezitai torguimiž-ekonomižes ühthižrados Japonijanke^[1].

Vn 2021 keväz'kun 29. päiväspäi valdkundmez' kändihe Evropan rekonstrukcijan da šingotesen bankan ohjandajaks Venämalpäi^[1] prezidentan käskön mödhe.

Vn 2024 14. semendkud uden ohjastusen sädandan aigan Rešetnikov kändihe Venäman ekonomikan šingotesen ministraks^[1].

Arvznamad da kitändsanad

Kahtenden märpordhan ordenan «Tatanman hüväs rados»-mötal' (2016);
Sebruden Orden^[1];
Venäman ohjastusen arvkirjeine;
Venäman Prezidentan kitändkirjeine^[1].

Kanz

Maksim Rešetnikov om nainu. Hänen Anna-ak om Permin valdkundaližen universitetan pästnikan. Kaik koume last om kanzas — kaks' tütärt i üks' poig.

Mel'hetartused

Ühtištab socialižid verkoid ičeze radonke. Vedab oiktoid efiroid kaikenaigašti, niiš andoi vastusid Permin randan eläjiden küzundoihe socialižiš verkoiš.

Homaičendad

1 2 3 4 5 6 7 Энциклопедия ТАСС (tass.ru), 2024. Решетников, Максим Геннадьевич. Министр экономического развития РФ (TASS:an enciklopedii, 2024. Rešetnikov Maksim Gennadjevič, VF:n ekonomikan šingotesen ministr). (ven.)

Purtked

Энциклопедия ТАСС (tass.ru), 2024. Решетников, Максим Геннадьевич. Министр экономического развития РФ (TASS:an enciklopedii, 2024. Rešetnikov Maksim Gennadjevič, VF:n ekonomikan šingotesen ministr). (ven.)
Biografii Permin randan tobmuden organoiden perm.ru-saital. (ven.)
Biografii Moskvan Ohjastusen depr.mos.ru-saital. (ven.)

[ЭнцТАСС-1] 1 2 3 4 5 6 7 Энциклопедия ТАСС (tass.ru), 2024. Решетников, Максим Геннадьевич. Министр экономического развития РФ (TASS:an enciklopedii, 2024. Rešetnikov Maksim Gennadjevič, VF:n ekonomikan šingotesen ministr). (ven.)

[1]