Mar Del' Plat

Mar Del' Plat
Mar del Plata
Lidnanznam;	Flag;
Valdkund	Argentin
Eläjiden lugu (2022)	682,605 ristitud
Pind	79,48 km²
Pämez'	Gil'jermo Montenegro; (tal'vku 2019—,; Guillermo Montenegro)
Telefonkod	+54-(0)223
Aigvö	UTC−3

Mar Del' Plat (isp.: Mar del Plata «meri hobedan polhe») om Argentinan lidn da port Atlantižen valdmeren randal. Se om Heneral' Pueiredon-municipalitetan päpala, valdkundan seičemenz' lidn eläjiden lugun mödhe. Mülüb Buenos Airesan agjaha.

Istorii

Nügüdläižen eländpunktan aluz om pandud vn 1874 10. päiväl uhokud. Vspäi 1911 raudte ühtenzoitab meriportad Buenos Airesanke. Meriport om saudud vll 1911−1916.

Mar Del' Plat ezilidnoidenke šingotase kurortižel turizmal (enamba adivpertiden nomeroid, mi Buenos Airesas), kalanpüdandan portal i kalan ümbriradmižel, pakuitezmašinoiden pästandal, tekstilin i polimeriden tehmižel. Kaks' laivankohenduztegint ratas lidnas. Elektrotehnine tegimišt radab lidnas 1980-nziš vozišpäi (telekommunikacine Nexuscom i DelSat-mašiništ, tehtihe kompjuteroid da smartfonid 2010-nzil vozil). 2010-nziš vozišpäi sidodud turistižhe valuhu oluden (valdkundan koumandeshesai) i vinan tehmine eläb korktas aigas läbi. Siš-žo aigaspäi sijaline programsarakon Making Sense-kompanii avaiži ofisoid AÜV:oiš.

Geografijan andmused

Lidn sijadase valdkundan i agjan päivnouzmas, 38 m ü.m.t. keskmäižel korktusel. Matkad Buenos Aireshasai om 400 km pohjoižhe.

Klimat om valdmeren. Keza om päivoikaz lujas, tal'vaig om pil'vekaz. Il'massad Antarktikaspäi vajehtadas säd teravas miččen taht voz'aigan. Voden keskmäine lämuz om +14,0 C°, tal'vkun-keväz'kun +18,1..+20,3 C°, kezakun-elokun +7,5..+9,0 C°. Kaikiš madalamb registriruidud lämuz om −9,3 C° (heinku), kaikiš korktemb +42,4 C° (viluku). Kezaaigan minimum om −0,2 C° (tal'vku), tal'vaigan maksimum om +29,9 C° (eloku). Voib panda halad kezakus-sügüz'kus tobjimalaz, ei olele haloid vilukus-keväz'kus vaiše (keväz'kun minimum om +0,2 C°). Paneb sadegid 946 mm vodes, läz tazomäras kuidme, enamba redukus-sulakus (80..104 mm kus), vähemba semendkus-sügüz'kus (58..66 mm kus). Voib panda lunt tal'vel harvoin (heinkus i elokus). Kun keskmäine relätivine nepsuz vajehtase 73..75 % röunoiš kül'mkus-vilukus, 77..82 % toižiš kuiš.

Eläjad

Vn 2010 Argentinan rahvahanlugemižen mödhe lidnan eläjiden lugu oli 593,337 ristitud, 765 tuhad eläjid oli kaikes lidnaglomeracijas. Vn 2022 rahvahanlugemižen mödhe lidnan ristitišt oli 682,605 eläjad. Kaikiš suremb lidnan ristitišt om nügüd'.

Mar Del' Platan nacionaline universitet (isp. lühenduz UNMdP) radab vspäi 1962.

Irdkosketused

Lidnan oficialine sait (mardelplata.gob.ar). (isp.)

Mar Del' Plat Vikiaitas