Nüksenic

Vikipedii-späi
Nüksenic
Нюксеница
Valdkund Venäma
Eläjiden lugu (2021) 4,333 ristitud
Telefonkod +7−81 747-xx-xxx
Avtokod 35
Aigvö UTC+3 (MSK+0)


Nüksenic (ven.: Ню́ксеница) om Venäman žilo da küläkund Vologdan agjan pohjoižpäivnouzmas. Se om Nüksenican ümbrikon (edel vn 2022 kezakud — rajonan) administrativine keskuz da kaikiš suremb eländpunkt.

Istorii[vajehta | vajehtada tekst]

Eländpunkt mainitase ezmäižen kerdan vl 1619. Žilo om nimitadud penen Nüksenic-jogen mödhe (ven.: Ню́ксеница / Ню́ксенка) i om saudud sen jogensus ümbri. Jogen nimituz korreliruib pohjoižsaamen njukča-sananke («joucen»).

Šingotihe «Moskv — Arhangel'sk»-torguindvezitenno. Mülüi Suren Ustügan makundha 19. voz'sadal. Rajonkeskuz vn 1931 heinkun 30. päiväspäi kahten rajonan ühtištusen jäl'ghe: Suhonan (keskuz oli Gorodiščn-žilos) i Kokšen'gan (Tarnogan Lidnut-keskusenke).

Nüksenic šingotase valdkundaližil holitišil, gazanveimen i kivivoiveimen holitusel, argvoin tegimel[1], mecan varhapanendal.

Geografijan andmused[vajehta | vajehtada tekst]

Žilo sijadase ümbrikon keskuzpalan päivlaskmas, Suhon-jogen alajoksmusen hural randal (ven.: Сухона). Nüksenic-jogi lankteb Suhonha, se sädase kahten penen jogen ühthejoksmusel i jokseb vaiše viž kilometrad. Matkad agjan Vologd-pälidnhasai om 278 kilometrad suvipäivlaskmha orhal vai 310 km «Vologd — Sur' Ustüg»-avtotedme. Lähembaine lidn om Tot'm 96 km päivlaskmha-suvipäivlaskmha orhal vai 106 km avtol.

Klimat om ven kontinentaline, tal'vel kaikiš lujembad kirjutadud pakaižed agjas oleliba žilos, absolütine minimum om −51,3 C°.

Tobmuz[vajehta | vajehtada tekst]

Nüksenican küläkund oli olmas vspäi 2006. Municipaline «Nüksenskoje»-ühtnik om sätud vn 2009 8. päiväl sulakud nellän küläkundan ühtištusel: Nüksenican, Bobrovskojen, Krasavinon i Uftügan.

Kaik koume žilod, 44 küläd i üks' futor mülüiba municipaližhe ühtnikha Nüksenican ližaks. Ühtnik om kätud ümbrikon territorialižeks palakundaks vn 2022 kezakuspäi. Ühtnikan pind oli 2986,47 km².

Municipaližen ühtnikan tobmuden pämez' oli sen Administracijan pämez'. Nüksenic-žilon Administracii om likvidiruidud vn 2023 tal'vkus. Sergei Prokopjev radoi sen jäl'gmäižen pämehen vn 2020 redukuspäi. Edeline Administracijan pämez' oli Oleg Krivonogov (tal'vku 2015 — reduku 2020). Küläkundan nevondkund om likvidiruidud vn 2010 semendkus.

Eläjad[vajehta | vajehtada tekst]

Vl 1959 žilon ristitišt oli 2 067 eläjad. Vn 2002 Venäman rahvahanlugemižen mödhe žilon eläjiden lugu oli 4 407 ristitud (kaikiš suremb ristitišt), vl 2010 — 4 271 ristitud, rajonan ristitišton kaks' videndest. Municipaližen ühtnikan ristitišt oli 6 144 eläjad vl 2010 i 5 785 eläjad vl 2021.

Ortodoksižen hristanuskondan ph. Agapit Markušalaižen puine jumalanpert'[2] om saudud vl 2008.

Nened büdžetižed aluzkundad oma žilos: rajonan kodirandantedištandmuzei, veroližen rahvahankul'turan keskuz, lapsiden sportškol. Opendusen aluzkund om Nüksenican keskškol. Fizkul'turiž-tervehtandkompleks štargundlavanke i stadion oma saudud «Gazprom»-kompanijal.

Transport[vajehta | vajehtada tekst]

Avtobusad oma kundaližeks transportaks žilon ümbrištos i rajoniden keskes, avtobusstancii radab. Ehtatim ühtenzoitab Suhonan randoid žilon keskusenno, avtotesild Suhonas päliči om saudud kahtes kilometras päivlaskmha žilospäi. Passažirühtenzoituz Suhonadme oli olmas 1960−1990-nzil vozil.

Lendimport om saudud žilos vl 1946, se ei ole kävutandas passažirreisiden täht pahan olendan tagut.

Homaičendad[vajehta | vajehtada tekst]

  1. Nüksenican voitegimen sait (maslozavod-nuks.ucoz.ru). (ven.)
  2. Nüksenican pühäpertid sobory.ru-saital. (ven.)

Irdkosketused[vajehta | vajehtada tekst]