Nazivajevsk

Nazivajevsk
Называевск
Valdkund	Venäma
Eläjiden lugu (2023)	10,236 ristitud
Pind	68,7 km²
Telefonkod	+7−38 161-xx-xxx
Avtokod	55
Aigvö	UTC+6 (MSK+3)

Nazivajevsk (ven.: Называ́евск) om Venäman lidn da lidnankund Omskan agjan päivlaskmas. Se om Nazivajevskan rajonan administrativižeks keskuseks da palaks.

Istorii

Eländpunktan aluz om pandud vl 1910 kuti Sibirin posad-žilo (ven.: посёлок Сибирский посад) Transsiban Nazivajevskai-raudtestancijanno. Vll 1917−1933 nimitihe Sibirskoje-eländpunktaks. Vspäi 1933 — Nazivajevk-žilo (ven.: Называевка). Vl 1947 kätihe Novonazivajevk-radnikžiloks. Se sai lidnan statusad vl 1956 nügüdläiženke nimenke.

Nazivajevsk šingotase savičuntegimel i nahktegimel, mugažo maidtegim radab.

Geografijan andmused

Nazivajevskan rajonan sijaduz agjas (2006)

Lidn sijadase rajonan keskuzpalas, Išiman tazangištol, 90 kilometras jogespäi, kesked penid järvid i soid, 126 m ü.m.t. keskmäižel korktusel. Nazivajevsk alištub sur'vezile gruntveden korktan tazopindan tagut.

Matkad Omskhasai om 140 km suvipäivnouzmha orhal (raudtedme) vai 205 km avtotedme. Lähembaižed lidnad oma Isil'kul' 75 km suvhe avtotedme i Tükalinsk 75 km pohjoižpäivnouzmha avtol. «Tümen' — Omsk»-raudtejono jagab lidnad kaks'haze.

Tobmuz

Nazivajevsk om lidnankundan üks'jäižeks eländpunktaks. Lidnankundan pind — 68,7 km².

Lidnankundan tobmuden pämez' oli sen Administracijan pämez'. Lidnankundan Administracii om likvidacijan pordhal vn 2025 kezakuspäi. Viktor Lupinos radoi lidnan Administracijan pämehen hätken (keväz'ku 2010 — kezaku 2025). Lidnan Nevondkund om likvidacijan pordhal mugažo, vn 2025 uhokuspäi. Sen enččed ezimehed oma Nelä Špeht (reduku 2021 — uhoku 2025), Natal'ja Tarasova (semendku 2018 — reduku 2021), Tat'jana Ekojan (radoi vn 2018 semendkuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 11 615 ristitud, rajonan pol', vn 2021 — 10 434 ristitud. Kaik 11 249 eläjad oli lidnas vl 2017. Kaikiš suremb lidnan ristitišt oli 16 494 eläjad vl 1959.

Ortodoksižen hristanuskondan kaks' pühäpertid^[1] oma saudud lidnas: phh. Borisan i Gleban jumalanpert' (letihe vll 2008−2011) i ph. Ol'gan časoun' (om 2000-nziš vozišpäi).

Openduz

Lapsiden opendusen aluzkundad oma nell' päivkodid (nomer 1..4), kaks' keskškolad (nomer 1 i 4), gimnazii (ende škol nomer 3), lapsiden sädamižen pert', čomamahtoiden škol, lapsiden da norišton sportškol.

Nazivajevskan agrariž-industrialine tehnikum^[2] om lidnan professionaližen opendusen aluzkundaks.