Nevel'sk

Nevel'sk
Невельск

Lidnanznam	Flag
Valdkund	Venäma
Eläjiden lugu (2024)	10,568 ristitud
Pind	10 km²
Pämez'	Aleksei Šabel'nik (kül'mku 2017—)
Telefonkod	+7−42 436-xx-xxx
Avtokod	65
Aigvö	UTC+11 (MSK+8)

Nevel'sk (ven.: Не́вельск, japon.: ネベリスク Neberisku, edel 1946. vot — japon.: 本斗 Honto) om Venäman lidn Sahalinan agjan Sahalin-saren suves. Se om Nevel'skan lidnümbrikon (edel 2010. vot — rajonan) administrativižeks keskuseks da palaks.

Istorii

Ainalaižiden Ponto-Kesi- i Turumai-küläd mainitasoiš vspäi 1789. Vll 1855−1875 kaks'jaine ohjanduz oli küliš — Venäman imperijan i Japonijan. Nügüdläižen eländpunktan aluz om pandud Japonijha 20. voz'sadal lidnalaižes Honto-volostikš Maokan makundas. Vl 1920 raudte ühtenzoiti žilod Maokanke. Vhesai 1945 oli Japonijan palaks, šingotihe kalankazvatusel, jädumatomal meriportal (vspäi 1927) i imperatorižel sodaškolal. Sai lidnan statusad vl 1946, nimitihe Gennadii Nevel'skoi-admiralan kanzannimen mödhe.

Nevel'sk šingotase kalanpüdandan meriportal i kalankazvatusel, mugažo merikolledž i röunman sodaväged sijadasoiš Nevel'skas.

Geografijan andmused

Lidnümbrikon sijaduz agjas (2010)

Lidn sijadase ümbrikon lodehes, Tataran sal'men suvipäivnouzmaižel randal, lühüdoiden Nevel'skai- (ven.: Невельская 14 km pitte) i Kazačk- (ven.: Казачка 23 km pitte) jogiden alangištoiš (lanktas merhe), seičeme metrad ü.m.t. keskmäižel korktusel.

Matkad Suvisahalinskhasai om seičemekümne koume kilometrad pohjoižpäivnouzmha orhal, 91 km avtotedme vai 307 km raudtel. Lähembaine lidn om Holmsk nell'kümnes koumes kilometras pohjoižhe-pohjoižpäivnouzmha orhal, 44 km raudtedme vai 47 km avtotedme.

Nevel'sk om Venäman lähembaine Japonijannoks lidn, matkad Hokkaidon Soi-nemehesai om 124 km suvhe orhal. Sidon optine kabel' 570 km pitte zavodiše lidnas i ühtenzoitab Japonijan Sapporon Isikari-ezilidnanke.

Meriport om saudud pudotadud gruntal. Jäl'gmäine luja manrehkaiduz oli vn 2007 2. päiväl elokud (6,1 magnitudanke). Nevel'sk alištub lavinoile.

Tobmuz

Kaik kümne žilod mülüdas lidnümbrikho Nevel'skan ližaks, znamasine om Gornozavodsk-žilo (3711 rist. vl 2021). Ümbrikon pind om 1445,40 nellikkilometrad.

Municipaližen ühtnikan pämez' om sen Administracijan pämez'. Edeližed lidnan pämehed oma Vladimir Pak (2005−2017), Vasilii Rotočev (1998−2005).

Eläjad

Vn 2010 Venäman rahvahanlugemižen mödhe lidnan eläjiden lugu oli 11 682 ristitud, lidnümbrikon kaks' koumandest, vn 2021 — 10 608 ristitud. Kaik 10 681 eläjad oli lidnas i 15 716 eläjad kaikes lidnümbrikos vl 2017. Kaikiš suremb lidnan ristitišt oli 24 800 eläjad vl 1992.

Ortodoksižen hristanuskondan kaks' jumalanpertid oma saudud puspäi lidnas: Jumalanmaman Sündundpäivän (letihe vll 1995−1998) i Jumalanmaman «Kacu tüništoitushe»-jumalaižen (om sätud vll 2013−2015).

Openduz

Lapsiden opendusen aluzkundad oma viž nimitadud i nomeruidud päivkodid (nomer 2, 4, 11, 16, 17), kaks' keskškolad (nomer 2 i 3), lapsiden sädamižen keskuz, čomamahtoiden škol.

Sahalinan merikolledž om lidnan professionaližen opendusen aluzkundaks.

Galerei

• 
  Muštnik Sevsk-, Sebež, Boksitogorsk- i Nahičevan'-laivoiden pölištunuzile (19.01.1965) radon aigan merimehile-kalanpüdajile vl 2017
• 
  Nevel'sk-raudtestancii vl 2016

Irdkosketused

• Lidnan da lidnümbrikon tobmuden aluzkundoiden oficialine sait (nevelysk.sakhalin.gov.ru). (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)