Ob' (lidn)

Ob'
Обь

Lidnanznam	Flag
Valdkund	Venäma
Eläjiden lugu (2021)	30,369 ristitud
Pind	21,95 km²
Pämez'	Pavel Bukovinin (uhoku 2020—)
Telefonkod	+7−38 373-xx-xxx
Avtokod	54, 154
Aigvö	UTC+7 (MSK+4)

Ob' (ven.: Обь) om Venäman lidn da lidnümbrik Novosibirskan agjan päivnouzmas. Se om Novosibirskan päivlaskmaine ezilidn.

Istorii

Ob'-raudtestancii om saudud Transsibal vl 1895, kävutihe sidä bazaks sauvomha raudtesildad Ob'-joges päliči vll 1893−1897. Nimitihe stancijad jogen mödhe, hot' se jokseb kümnes kilometras lidnaspäi.

Eländpunktan aluz om pandud vl 1934 žiloks Ob'-raudtestancijanno. Vl 1947 ühtištadihe Tolmačovo-žilon palanke da kätihe lidnanvuiččeks žiloks. Žilo sai lidnan statusad vl 1969. Om lidnaks oiktanke alištusenke agjan tobmudele vspäi 1989.

Ob'-lidn šingotase Tolmačovo-lendimportal (vspäi 1957), lendimiden i raudten kohenduzedheotandoil, libutimiden tegimel i uksiden edheotandal, om «Sibir'»-aviakompanijan päfateraks (se-žo «S7 Airlines», kahtenz' surtte valdkundas). Severz'-se sodapalakundoid sijadasoiš lidnas.

Geografijan andmused

Lidn sijadase 110 m ü.m.t. keskmäižel korktusel. Vlasih-jogi (ven.: Власиха, Obin hura ližajogi) jokseb pidust' lidnan pohjoižpäivnouzmašt röunad, Ob'-lidnan i Novosibirskan keskes.

Matkad Novosibirskan röunhasai om üks' kilometr päivnouzmha orhal, avtotedme vai raudtedme. Transsib i «Irtiš»-avtote (R-254) jagadas lidnad kaks'haz. Lendimport om saudud lidnan pohjoižes.

Tobmuz

Seižutezplatform 3307. km-eländpunkt (ven.: Остановочная Платформа 3307 км, 63 rist. vl 2017) mülüb lidnümbrikho Ob'-lidnan ližaks.

Edeline lidnan pämez' om Aleksandr Mozžerin (uhoku 2015 — viluku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 25 382 ristitud, kaiken lidnümbrikon — 25 725 ristitud, vn 2021 lidnan — 30 369 ristitud. Kaik 29 194 eläjad oli lidnas i 29 257 eläjad kaikes lidnümbrikos vl 2017. Kaikiš suremb lidnan i lidnümbrikon ristitišt om nügüd'.

Ortodoksižen hristanuskondan ph. Tihon Donantagaižen jumalanpert' om saudud vspäi 2008, i ph. Sergii Radonežalaižen časoun' (saudihe vl 2011).

Lapsiden opendusen aluzkundad oma päivkodid, keskškolad. Professionaližen opendusen aluzkund om buhgalteroiden ližakvalifikacijan škol, toižed lähižed aluzkundad sijadasoiš Novosibirskas.

Galerei

• 
  Tolmačovo-lendimport vl 2016
• 
  Adivpert' Tolmačovo-lendimportas (2021)
• 
  Aeroflot-raudteplatform vl 2016

Irdkosketused

• Lidnan tobmuden aluzkundoiden oficialine sait (gorodob.nso.ru). (ven.)