Paldiski

**Paldiski**
Lidnanznam;	Flag;
Valdkund	Estinma
Eläjiden lugu (2024)	4,073 ristitud
Pind	58,37 km²
Pämez'	Tiit Peedu; (2014—)
Telefonkod	+372
Aigvö	tal'vel UTC+2,; kezal UTC+3

Paldiski (mugažo estin kelel) om lidn, sodabaz da jädumatoi port Estinman i sen Harju-makundan lodehes. Pakri-sared alištudas lidnan tobmudele mugažo.

Istorii

Sur' Petr pani nügüdläižen eländpunktan alust meriportaks Pakri-sal'men randal vl 1718. Portan, majakan, lidnusen i žilon sauvomine oli vhesai 1726 i seižuhti Petran kolendanke. Žilo portanno nimitihe Rogervik:aks (roč.: Rågervik) vspäi 1723. Jekaterina II jätksi sauvomišt, no päti tehta Kronštadtad kaičendportaks vn 1768 Senatan edespaginad jäl'ghe. Vozil 1762−1922 oficialine nimituz oli Baltine Port (ven.: Балтийский Порт), estin nimituz oli Baltiski vspäi 1733, sid' oficialižikš Baltiski Estinman ripmatomudenke, i vspäi 1933 om nügüdläiženke nimenke. Lidnan status om anttud vl 1783.

Nevondkundaližel aigal atomižiden VA-laivoiden sodameribaz oli lidnas, mugažo il'mvastaižen kaičendan raketbaz da sodalendimport oli lidnan saubaližel territorijal. Vozil 1994−1996 Paldiski mülüi Keil-lidnha. Estinman sodavägiden erazvuiččed toižendad sijadasoiš lidnan sodabazas.

Tulleienergopark om saudud. Tedon da tegimišton Pakri-park šingotase lidnan päivnouzmaižen röunanno.

Geografijan andmused

Lidnan sijaduz makundas i valdkundas vn 2013 kartal

Lidn sijadase Suomen lahten suvirandal.

Matkad Tallidnan keskuzpalhasai om vižkümne kaks' kilometrad päivnouzmha avtotedme.

Eläjad

Vl 2012 lidnan eläjiden lugu oli 4 081 ristitud. Ristitišt poleni vspäi 1991 (8,1 tuhad).

Lidn om äirahvahaline. Estilaižed ottas 32,8 % vn 2011 rahvahanlugemižen mödhe. Toižed rahvahad oma enamba pol't ristitištos.

Hristanuskondan nell' pühäpertid om saudud lidnas.

Transport

Kaks' meriportad jüguiden täht om lidnas, pohjoine i suvine. Poltusen kaičendterminal, kivivoinümbriradai terminal, konteinerterminal oma olmas portoiš. Ehtatim ujub Ročinman Kapellskär-porthasai.

Paldiski-raudtestancii om olmas vspäi 1870 «Paldiski — Tallidn — Tosno»-raudtel.