Petrovsk-Zabaikal'skii

Petrovsk-Zabaikal'skii
Петровск-Забайкальский
	Lidnanznam;
Valdkund	Venäma
Eläjiden lugu (2021)	15,015 ristitud
Pind	300 km²
Telefonkod	+7−30 236-xx-xxx
Avtokod	75, 80
Aigvö	UTC+9 (MSK+6)

Petrovsk-Zabaikal'skii (ven.: Петро́вск-Забайка́льский) om Venäman lidn Baikalantagaižen randan suvipäivlaskmas. Se om Petrovsk-Zabaikal'skijan ümbrikon administrativižeks keskuseks da palaks. Edel vn 2024 vilukud municipaline ümbrik oli rajonaks, i lidn ei mülünd rajonha, oli erigoittud lidnümbrikoks.

Istorii

Eländpunktan aluz om pandud vl 1789 kuti Petran Tegim (ven.: Петровский Завод). Vl 1926 se sai lidnan statusad da oli udesnimitadud nügüdläižikš. Lidnan raudtestancii om olmas vspäi 1900, se om Transsiban pala i Petran Tegim-nimenke tähäsai.

Petrovsk-Zabaikal'skijan ižandusen päsarakod oma mecan ümbriradmine i sömtegimišt. Raudmetallurgijan i stöklan tegimed ei ole rados.

Geografijan andmused

Lidn sijadase ümbrikon pohjoižes-lodehes, seižub mägidenkeskeižes katl'uses, Baläg- da Mikirt-jogiden kaidoiš alangištoiš (Hilokan i Selengan oigedpol'ne bassein), 800 m ü.m.t. keskmäižel korktusel.

Matkad Čithasai om 414 km päivnouzmha raudtedme vai 480 km «Baikal»-avtotedme (R258), Burätijan Tazovaldkundhasai — 15..20 km lodeheze. Lähembaine lidn om Ulan Ude 105 km lodeheze orhal vai 200 km avtotedme.

Klimat om vilu subarktižen röunal. Voden keskmäine lämuz om −2,8 C°, kezakun-elokun +13..+16 C°, tal'vkun-uhokun −21..−25 C°.

Tobmuz

Petrovsk-Zabaikal'skii oli lidnümbrikon üks'jäižeks eländpunktaks. Lidnümbrikon tobmuz om tühjitadud vn 2024 vilukuspäi.

Lidnümbrikon tobmuden pämez' oli sen Administracijan pämez'. Nikolai Gorünov radoi lidnümbrikon jäl'gmäižen pämehen vn 2023 redukuspäi. Edeližed lidnan Administracijan pämehed oma Igor' Zaripov (Игорь Зарыпов, reduku 2018 — reduku 2023), Aleksandr Taranov (2009 — reduku 2018). Jelena Lapuhova radoi lidnan Duman jäl'gmäižen ezimehen vn 2024 redukuhusai, sid' udesnimitihe Dumad Nevondkundaks, i sen nügüdläine ezimez' om Tat'jana Vdovina (reduku 2024—).

Eläjad

Vn 2010 Venäman rahvahanlugemižen mödhe lidnan eläjiden lugu oli 18 549 ristitud, vn 2021 — 15 015 ristitud (läz kohtaine rajonan ristitištonke). Kaik 16 524 eläjad oli lidnas vl 2017. Kaikiš suremb lidnan ristitišt oli 28..30 tuhad eläjid vozil 1959−1992 (30 945 rist. vl 1979).

Ortodoksižen hristanuskondan Pühän Jumalanmaman Katken jumalanpert'^[1] om saudud vll 2004−2008.

Lapsiden opendusen aluzkundad oma severz'-se päivkodid, viž keskškolad (nomer 1..4, 6), gimnazii (nomer 1), lapsiden sädamižen keskuz, čomamahtoiden škol, lidnan sportškol. Professionaližen opendusen aluzkundad: Čitan politehnižen kolledžan filial^[2] (edel 2016. vot professionaliž-pedagogine tehnikum) i Čitan medicinižen kolledžan filial^[3] (ende medicinine škol-tehnikum).

Transport

Maršruttaksid da taksid oma kundaližeks transportaks lidnas. Ezilidnelektrojonused ühtenzoittas lidnad Ulan Udenke i Hilok-lidnanke.

Dekabristad-raudtestancii (ven.: Декабристы) om toine lidnas, sijadase kudes kilometras päraudtestancijaspäi Čitan polehe.

Galerei

Raudmetallurgijan tegimen sauvusiden nägu vl 2016
Dekabristoiden nekropol' kaumžomal (2014)
VL80R-serijan elektrovedim Petran Tegim-raudtestancijal vl 2009
Memorialine portal dekabristoiden muštoks Petran Tegim-päraudtestancijal (2014)
Petran Tegim-raudtestancijan päsauvuz vl 2008