Petuškad

Petuškad
Петушки

Lidnanznam
Valdkund	Venäma
Eläjiden lugu (2021)	13,317 ristitud
Pind	11,81 km²
Pämez'	Aleksandr Bagrov (2015—)
Telefonkod	+7−49 243-xx-xxx
Avtokod	33
Aigvö	UTC+3 (MSK+0)

Petuškad (ven.: Петушки́) om Venäman lidn da lidnankund Vladimiran agjan suvipäivlaskmas. Se om Petuškan rajonan administrativine keskuz i kahtenz' lidn koumespäi eläjiden lugun mödhe.

Istorii

Eländpunktan aluz om pandud vl 1861 kuti žilo uden Petuškad-raudtestancijanno, kudambad nimitihe lähižen külän mödhe (nüg. Vanhad Petuškad, ven.: деревня Старые Петушки, om olmas 17. voz'sadaspäi). Vozil 1910−1915 saudihe tekstil'fabrikad, kämuiden fabrikad, savičuntegint. Vl 1926 kätihe küläd lidnanvuiččeks Uded Petuškad-žiloks (ven.: Новые Петушки). Vn 1965 11. päiväspäi kül'mkud om lidnan statusanke da nügüdläiženke nimenke.

Petuškan ižandusen päsarakod oma sauvondmaterialiden tehmine (lämuzizoläcii, silikatine savič, katusenmaterialad), metallan ümbriradmine (tulkmen renghad, eriline mašiništ sauvondan täht), sömtegimišt (maidproduktad, kalakonservad da preservad meren produktoišpäi), mugažo trikotažfabrik i mecanümbriradai edheotand oma saudud.

Geografijan andmused

Lidnan sijaduz rajonas i agjas vn 2006 kartal

Lidn sijadase rajonan keskuzpalan suves, Kläz'm-jogen hural pohjoižel randal (Volgan oigedpol'ne bassein).

Matkad Vladimirhasai om kuz'kümne seičeme kilometrad pohjoižpäivnouzmha orhal vai raudtedme/«Volg»-avtotedme. Lähembaine lidn om Pokrov kahesatoštkümnes kilometras päivlaskmha niil-žo teil.

Tobmuz

Petuškad-lidn om lidnankundan üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 15 148 ristitud, rajonan ristitišton videndez, vn 2021 — 13 317 ristitud. Kaik 13 382 eläjad oli lidnas vl 2017. Kaikiš suremb lidnan eläjiden lugu oli 20 144 ristitud vl 1989.

Ortodoksižen hristanuskondan koume jumalanpertid om kaičenus i saudud lidnas: Jumalanmaman Emäganpäivän (1910), ph. Afanasii Kovrovalaižen (2002) i Jumalanmaman Iveran jumalaižen jumalanpert' (om sätud vll 2016−2018) sen pühämehen muzejanno.

Openduz

Lapsiden opendusen aluzkundad oma viž nomeruidud päivkodid (nomer 1, 3, 5, 45, 46), viž keskškolad (nomer 1, 2, 3, 17 i rajonan avoin), lapsiden sädamižen pert', rajonan čomamahtoiden škol, rajonan kompleksine sportškol.

Lidnan professionaližen opendusen aluzkundad: Petuškan tegimištoliž-gumanitarine kolledž i Vladimiran ekonomikan da oiktusen tehnikuman filial.

Transport

Avtobusad oma kundaližeks transportaks lidnas da sen ümbrištos, avtostancii radab.

Federaline «Volg»-avtote (M7) läbitab lidnan pohjošt. Petuškad-raudtestancii sijadase lidnan keskuzpalas.

Galerei

• 
  Jumalanmaman Emäganpäivän pühäpert', vn 2011 nägu
• 
  Ph. Afanasijan jumalanpert', vn 2010 nägu
• 
  Lidnan keskuzpalas vl 2010
• 
  Torguindkeskuz (2011)
• 
  Petuškad-päraudtestancijan sauvuz vl 2010

Irdkosketused

• Municipaližen «Petuškad-lidn»-ühtnikan tobmuden aluzkundoiden oficialine sait (petushki33.ru). (ven.)