Čapligin (lidn)

Čapligin
Чаплыгин
Lidnanznam;	Flag;
Valdkund	Venäma
Eläjiden lugu (2021)	11,579 ristitud
Pind	11 km²
Telefonkod	+7−47 475-xx-xxx
Avtokod	48
Aigvö	UTC+3 (MSK+0)

Čapligin (ven.: Чаплы́гин) om Venäman lidn da raudtesol'm Lipeckan agjan pohjoižpäivnouzmas. Se om Čapliginan ümbrikon (edel vn 2025 uhokud — rajonan) administrativižeks keskuseks da palaks.

Istorii

Eländpunktan aluz om pandud vl 1638 kuti Ust' Stanovih Räs-külä (ven.: Усть Становы́х Ряс), möhemba Slobodskoje-žilo. Vl 1695 Petr I-carin puine lebuerižpert' oli saudud läz žilod tel Moskvaspäi Voronežannoks. Vl 1702 Petr I pani penen Oranijenbaum-lidnusen alust Alamaiden lidnusiden ezikuvan mödhe. Sil-žo vodel car' lahjoiči žilod lidnusenke ičeze Aleksandr Menšikov-favoritale. Vl 1737 ned kändiba valdkundaližikš. Žilo sai makundan lidnan statusad vn 1778 16 (27). sügüz'kud Ranenburg-nimitusenke lidnusen värištadud rahvahal nimen mödhe.

Vl 1890 raudte ühtenzoiti lidnad Dankovanke. Vspäi 1896 saudihe tošt raudted Moskvhasai, se kändi Ranenburg-stancijad raudtesol'meks. Lidn sai nügüdläšt nimitust vn 1948 2. päiväl redukud venämalaižen i nevondkundaližen Sergei Čapligin-mehanikantedomehen (1869−1942) kanzannimen mödhe, hän oli sündnu sihe.

Čapligin šingotase sömtegimištol (maidon edheotand, jauhtegim, trahmaltegim, leibänkombinat) i turizmal. Mašinansauvomižen edheotandad ratas eriližen tegimištzonan rezidentoikš lidnanno.

Geografijan andmused

Lidn sijadase municipaližen ümbrikon keskuzpalas, Stanovaja Räs-jogen randal (ven.: Станова́я Ря́са 100 km pitte, Donan hurapol'ne bassein), 140 m ü.m.t. keskmäižel korktusel. Jagodnaja Räs-jogi (ven. Я́годная Ря́са 75 km pitte) lankteb Stanovaja Räsha oiktalpäi lidnan suves.

Matkad Tambovan agjhasai om seičeme kilometrad päivnouzmha orhal. Matkad Lipeckhasai om seičemekümne viž kilometrad suvhe orhal, 82 km avtotel vai 130 km raudtel. Lähembaižed lidnad oma Mičurinsk (Tambovan agj) suvipäivnouzmha, Lebedän' suvipäivlaskmha, Dankov päivlaskmha i Räžsk (Räzanin agj) pohjoižhe. Ranenburg-raudtestancii radab lidnan lodehes vspäi 1890.

Tobmuz

Čapligin oli lidnankundan üks'jäižeks eländpunktaks. Lidnankundan pind oli 20 km².

Lidnankundan tobmuden pämez' oli sen Administracijan pämez'. Lidnan Administracii om likvidacijan pordhal vn 2020 kül'mkuspäi. Dinara Andrejeva om likvidacižen laudkundan ohjandajan vn 2025 sulakuspäi. Edeližed lidnan Administracijan pämehed oma Sergei Feronov (eloku 2019 — sulaku 2025), Vladimir Skuratov (radoi vn 2019 elokuhusai). Lidnan Deputatoiden nevondkund om pästtud radmaspäi vn 2025 redukus. Aleksei Gukov oli sen jäl'gmäižen ezimehen i likvidacižen laudkundan ohjandajan vn 2025 uhokuspäi. Edeližed lidnan nevondkundan ezimehed oliba Marina Ovčinnikova (semendku 2023 — uhoku 2025) i Andrei Sigitov (sügüz'ku 2021 — semendku 2023).

Eläjad

Vl 1897 ristitišt oli 15 300 eläjad, vl 1931 — 7 800 eläjad. Vn 2010 Venäman rahvahanlugemižen mödhe lidnan eläjiden lugu oli 12 656 ristitud, rajonan kaks' videndest, vn 2021 — 11 579 ristitud. Kaik 11 948 eläjad oli lidnas vl 2017. Kaikiš suremb lidnan ristitišt oli 16 100 eläjad vl 1913 i enamba 14 tuhad eläjid vll 1989−2001 (14 343 rist. vl 1989).

Rahvahad (ozutadud rahvahudenke vl 2010): venälaižed — 98,1 %, toižed rahvahad — 1,9 %.

Ortodoksižen hristanuskondan kuz' pühäpertid^[1] oma kaičenus i saudud lidnas: Eläban Eziauguižen Stroican päjumalanpert' (om saudud 1806−1818), nell' jumalanpertid i puine časoun' (letihe vl 2011). Phh. Pedroin da Pauloin mez'jumalankodi om avaitud kahtes kilometras päivnouzmha lidnaspäi vspäi 1712.

Openduz

Lapsiden opendusen aluzkundad oma viž nimitadud päivkodid, koume keskškolad (nomer 1, 2, 4), ližaopendusen keskuz, čomamahtoiden škol, lapsiden da norišton sportškol.

Čapliginan agrarine kolledž^[2] om lidnan professionaližen opendusen aluzkundaks.

Galerei

Menšikovan pert' enččen Ranenburgan lidnusen territorijal (2013)
Eläban Eziauguižen Stroican päjumalanpert', vn 2011 nägu
Sündun Voznesenjan jumalanpert' Redukun revolücijan torgul, vn 2013 vai sen aigemba nägu
Tätüižmuzei (vn 2015 olend)
Ranenburg-raudtestancijan sauvuz vl 2013

Homaičendad

Irdkosketused

Čapligin (lidn) Vikiaitas

	Lipeckan agjan lidnad
	Čapligin \| Dankov \| Gräzi \| Jelec \| Lebedän' \| Lipeck \| Zadonsk \| Usman'

[1] Čapliginan pühäpertid sobory.ru-saital. (ven.)

[2] Čapliginan agrarižen kolledžan sait (agrocolleg.ru). (ven.)

[1]

[2]