Tursunzade

Tursunzade
Турсунзода
Valdkund	Tadžikistan
Eläjiden lugu (2022)	57,800 ristitud
Pind	7,78 km²
Pämez'	Abdukodir Valizoda; (uhoku 2018—)
Telefonkod	+992−3130
Aigvö	UTC+5

Tursunzade (tadž.: Турсунзода, ven.: Турсунзаде́) om lidn tazovaldkundan alištusenke Tadžikistanan päivlaskmas. Se oli Tursunzaden rajonan tazovaldkundan alištusenke administrativižeks keskuseks i ei mülünd sihe vhesai 2018, konz kätihe lidnad i rajonad ühthižeks municipalitetaks.

Istorii

Eländpunkt mainitase ezmäižen kerdan 14. voz'sadan kahtendes poles. Se sai lidnan statusad vl 1954. Vn 1978 uhokun 17. päivhäsai lidnan nimituz oli Regar, udesnimitihe tadžikan Mirzo Tursun-zade-runokirjutajan (1911−1977) kanzannimen mödhe. Raudtestancijan nimi om Regar tähäsai. Vl 2005 oigetihe Tursunzaden seičemekümnevottušt jubilejad.

AÜV:oiden armijan openduzkeskuz radab lidnas Tadžikistanan sodavägiden täht. Järed alüminijantegim radab lidnan pohjoižes vspäi 1975 Nurekan GES:an energijal, kulutab valdkundan elektroenergijan kaht videndest. Lidn om ümbärtud maižanduzrajonal (ris (valdkundan satusen seičemendez), puvill, greipfrutad, maplodud).

Geografijan andmused

Lidn sijadase regionan päivlaskmaiženno röunanno, Gissaran mägisel'ganno, Karatag-jogen oiktal randal i randpolel (tadž.: Қаратоғ 99 km pitte, Amudarjan bassein).

Keskust Uzbekistanan röunhasai om nell' kilometrad päivlaskmha orhal i avtotedme vai kahesa kilometrad suvipäivlaskmha raudtedme. Matkad Dušanbe-pälidnhasai om kuz'kümne kilometrad päivnouzmha avtotedme vai raudtedme.

Eläjad

Vn 2010 Tadžikistanan rahvahanlugemižen mödhe lidnan eläjiden lugu oli 46,700 ristitud. Kaik 53,100 eläjad oli lidnas vl 2018. Kaikiš suremb lidnan ristitišt om nügüd'. Kaik 298,800 eläjad om ezilidnoidenke (rajonanke) vn 2020 andmusiden mödhe.

Eläjad oma islamanuskojad tobjimalaz.