Ril'sk

Ril'sk
Рыльск
Lidnanznam;	Flag;
Valdkund	Venäma
Eläjiden lugu (2024)	14,843 ristitud
Pind	16,26 km²
Pämez'	Vladimir Koval'čuk; (viluku 2020—,; velgusentäutai)
Telefonkod	+7−47 152-xx-xxx
Avtokod	46
Aigvö	UTC+3 (MSK+0)

Ril'sk (ven.: Рыльск) om Venäman lidn, lidnankund da avtotesol'm Kurskan agjan päivlaskmas. Se om Ril'skan rajonan administrativine keskuz da pala.

Istorii

Eländpunkt mainitase ezmaižen kerdan aigkirjas vl 1152 nügüdläiženke nimitusenke. Nimi sündui severskalaižiden paganusen Jarilo-jumalan pühäsijan tagut nügüd'aigaižen lidnan kukhan päl. Ril'sk oli ühtennimižen ruhtinazkundan pälidnaks 12. voz'sadan keskespäi vhesai 1523, sid' kändihe Venäman palaks. Oli mülünu Sur'he Litvanman ruhtinazkundha (1360-nded voded — 1500). Ril'sk sai makundan lidnan oficiališt statusad 18. voz'sadal. Vl 1894 raudtesarak tuli lidnha. Toižen mail'man sodan aigan lidn oli okkupiruidud nacistižen Germanijan sodavägil (5. reduku 1941 — 30. eloku 1943).

Ril'sk šingotase kancelärižiden ladlüsiden tegimel, sömtegimištol (saguden edheotand, saharantegim, leibtegim) i turizmal.

Geografijan andmused

Lidn sijadase rajonan päivnouzmaiženno röunanno, Seim-jogen muugotil randoil (ven.: Сейм 696 km pitte, Desnan hura ližajogi), 160 m ü.m.t. keskmäižel korktusel.

Matkad Ukrainhasai om koumekümne kilometrad päivlaskmha i lodeheze orhal. Matkad Kurskhasai om 105 km päivnouzmha orhal, 126 km avtotel vai 140 km raudtel. Lähembaine lidn om L'gov 41 km päivnouzmha orhal, 46 km avtotedme vai 65 km raudtedme. E38-avtomaršrut (Ukrainan pohjoine — Kazahstanan suvi) läbitab lidnad. Ril'sk-raudtestancii radab Seiman hural randal, se om 24-kilometrižen sarakon lopstancii Korenevo-stancijaspäi.

Tobmuz

Ril'sk om lidnankundan üks'jäižeks eländpunktaks. Lidnankundan pind — 16,26 km².

Eläjad

Vl 1939 lidnan ristitišt oli 12 401 eläjad. Vn 2010 Venäman rahvahanlugemižen mödhe lidnan eläjiden lugu oli 15 671 ristitud, rajonan pol', vn 2021 — 15 069 ristitud. Kaik 16 319 eläjad oli lidnas vl 2017. Kaikiš suremb lidnan ristitišt oli 19 472 eläjad vl 1989 i 19 400 eläjad vll 2000−2001.

Rahvahad (ozutadud rahvahudenke vl 2010): venälaižed — 97,0 %, ukrainalaižed — 1,5 %, toižed rahvahad — 1,5 %.

Ortodoksižen hristanuskondan kahesa pühäpertid^[1] oma kaičenus i saudud lidnas: kaks' päjumalanpertid, kaks' jumalanpertid i nell' časounäd. Mugažo ph. Mikulain mez'jumalankodi radab ani lidnan pohjoižröunan taga.

Openduz

Lapsiden opendusen aluzkundad oma viž nimitadud i nomeruidud päivkodid (nomer 1..5), aluzškol nomer 2, koume keskškolad (nomer 1, 4, 5), lapsiden sädamižen pert', čomamahtoiden škol, lapsiden da norišton sportškol.

Professionaližen opendusen aluzkundad oma Kurskan agjan äiprofil'ne kolledž Daniil Graninan nimed^[2] (baziruiše Ril'skas, edel vn 2022 keväz'kud Ril'skan agrarine tehnikum i Ril'skan socialiž-pedagogine kolledž eriži), Ril'skan aviacine tehnine kolledž^[3] i Kurskan bazižen medkolledžan Ril'skan filial^[4].