Sämž

Vikipedii
Mine navigeerimisribale Mine otsikasti
Sämž
Сямжа
Valdkund Venäma
Eläjiden lugu (2017) 4,029 ristitud
Pämez' Sergei Žitkov
(sügüz'ku 2017—)
Telefonkod +7-81 752-xx-xxx
Avtokod 35
Aigvö UTC+3 (MSK+0)


Sämž (ven.: Сямжа) om Venäman žilo da küläkund Vologdan agjan keskuzpalan pohjoižes. Se om Sämžan rajonan administrativine keskuz da kaikiš suremb eländpunkt.

Istorii[redaktiruida | redaktiruida purde]

Eländpunktan aluz om pandud Sämžen-jogen oiktal randal vl 1935 neniden küliden ühtištusel: Djakovskai, Jeremih, Gork i Popovk (ven.: Дьяковская, Еремиха, Горка, Поповка). Sämžan rajon om udessündutadud sil-žo vodel (vll 1929−1931 olendan jäl'ghe), Djakovskai-külä oli rajonkeskuz. Ühtištuihe küläd Sämžanke i kätihe Sämž-žilod rajonkeskuseks vaiše vl 1953.

Sämžan küläkund om olmas vspäi 2006.

Sämž šingotase valdkundaližil holitišil, mectehmižen edheotandoil i argvoin tegimel. Agjan hihtandsportan «Sämžan marafon» vedase žilonno regulärižikš.

Geografijan andmused[redaktiruida | redaktiruida purde]

Žilo sijadase rajonan keskuzpalan päivlaskmas, Sämžen (Sämšeng)-jogen alajoksmusen molembil randoil (ven.: Сямжена / Сямшенга, Kubenan hura ližajogi). Matkad agjan Vologd-pälidnhasai om 110 kilometrad suvipäivlaskmha orhal vai 116 km avtotedme. Lähembaižed lidnad oma Kadnikov 75 km i Sokol 90 kilometrad suvipäivlaskmha M8-avtotedme, Harovsk (Harovskai-raudtestancii) 47 km päivlaskmha orhal vai 57 km avtol.

«MoskvArhangel'sk»-avtote (M8-trass «Holmogori») läbitab žilod.

Žilo om küläkundan üks'jäine eländpunkt. Küläkundan pind om 84,69 km².

Eläjad[redaktiruida | redaktiruida purde]

Vl 1959 žilon ristitišt oli 955 eläjad. Vn 2002 Venäman rahvahanlugemižen mödhe eläjiden lugu oli 3 932 ristitud, vl 2010 — 3 949 ristitud. Kaikiš suremb žilon ristitišt om nügüd', se jäb 3,9..4,0 tuh. röunoiš vspäi 1989. Rajonan ristitišton pol' eläb žilos (vl 2002 oli kaks' videndest).

Ortodoksižen hristanuskondan Sündun Eläbzdusen jumalanpert'[1] om saudud vl 1806, se ei olend rados vll 1935−1996, kivine puiženke kellčuhundusenke.

Nened büdžetižed aluzkundad oma žilos: rajonan kodirandantedištandmuzei (arheologijan, etnografijan i sijaližen šingotesen istorijan keradused), rajonan kul'turpert', čomamahtoiden lapsidenškol, kirjišt, rajonan läžundkodi. Opendusen aluzkund om Sämžan keskškol. Profškol nomer 54 radoi vll 1989−2014 (ende oli Kadnikovan profškolan filial). Avtobusad oma kundaližeks transportaks žilon ümbrištos i rajoniden keskes.

Homaičendad[redaktiruida | redaktiruida purde]

  1. Sämžan pühäpertid sobory.ru-saital. (ven.)

Irdkosketused[redaktiruida | redaktiruida purde]