Salavat

Salavat
Салават (ven.)
Салауат (bašk.)
Lidnanznam;	Flag;
Valdkund	Venäma
Eläjiden lugu (2025)	144,970 ristitud
Pind	106,23 km²
Pämez'	Marat Zagidullin; (semendku 2025—)
Telefonkod	+7−3476-xxx-xxx
Avtokod	02, 102
Aigvö	UTC+5 (MSK+2)

Salavat (ven.: Салава́т, tot.: Салават, bašk.: Салауат) om Venäman lidn da lidnümbrik Baškortostanan Tazovaldkundan keskuzpalan suvipäivlaskmas. Se om tazovaldkundan koumanz' lidn eläjiden lugun mödhe.

Istorii

Eländpunktan aluz om pandud vn 1948 30. päiväl kezakud kuti Novostroi-žilo sauvomha kivivoihimišt kombinatad ümbriradamha sijališt kivivoid i geptilan pästandan täht. Kaks'kümne viž tuhad türmatud da ottud plenha mehid sauvoiba sidä. Vl 1949 udesnimitihe žilod Salavat-radnikžiloks baškiralaižiden Salavat Julajev-vägimehen nimen mödhe, oli alištunu Išimbai-lidnan Nevondkundale. Vspäi 1954 om lidnaks tazovaldkundan alištusenke.

Salavat-lidnan ižandusen päsarakod oma kivivoihimine da gazhimine (pästtas poltusid, spirtoid, polietilenad, azotheretusid), kivivoimašiništon tehmine, sauvondmaterialad da tegesed (metalližed konstrukcijad, raudbetontegesed, mineraline izoläcii), stöklantehmine, omblendtegimišt, sömtegimišt, mecan ümbriradmine.

Geografijan andmused

Lidnümbrikon sijaduz tazovaldkundas vn 2020 kartal

Lidn sijadase Vaugedjogen (bašk.: Ағиҙел) hural randal, 150 m keskmäižel korktusel valdmeren pindan päl, kaikiš suremb korktuz om 175 metrad.

Matkad Ufahasai om 155 km pohjoižhe avtotedme. Salavat mülüb Suvibaškortostanan aglomeracijha (565 tuh. rist. vl 2016). Lähembaižed lidnad (avtotedme) oma Meleuz 47 km suvhe, Sterlitamak 30 km pohjoižhe i Išimbai kaks' kilometrad pohjoižpäivnouzmha.

Tobmuz

Salavat om lidnümbrikon üks'jäižeks eländpunktaks. Röunatab Išimbain, Meleuzan i Sterlitamakan rajonidenke.

Lidnümbrikon tobmuden pämez' om sen Administracijan pämez' (mer). Edeližed lidnan Administracijan pämehed oma Al'bert Mutalov (kül'mku 2024 — sulaku 2025), Igor' Mironov (sulaku 2020 — reduku 2024). Lidnan nevondkundan ezimez' om Aleksei Sobolev vn 2024 redukuspäi. Edeline nevondkundan ezimez' om Larisa Davidova (Лариса Давыдова, sulaku 2012 — reduku 2024).

Eläjad

Vl 1959 lidnan ristitišt oli 60 667 eläjad, vl 1979 — 137 237 eläjad. Vn 2010 kaiken Venäman rahvahanlugemižen mödhe lidnan eläjiden lugu oli 156 095 ristitud, vn 2021 — 148 575 ristitud. Kaik 153 181 eläjad oli lidnas vl 2017. Kaikiš suremb lidnan ristitišt oli 157..158 tuhad eläjid vozil 1995−2006.

Rahvahad (enamba 1 % vl 2010, ozutadud rahvahudenke): venälaižed — 54,9 %, totarlaižed — 20,8 %, baškiralaižed — 18,0 %, čuvašalaižed — 2,1 %, ukrainalaižed — 1,5 %, toižed rahvahad — 2,7 %.

Mamankelen mödhe (2020): venän kel' — 55,0 %, baškiran kel' — 21,6 %, totaran kel' — 15,8 %, čuvašan kel' — 1,0 %, mamankelen ozutandata — 5,4 %.

Islaman Salavatan pämečet' i «Ihlas»-pühäpert' oma avaitud lidnas. Ortodoksižen hristanuskondan Jumalanmaman Emäganpäivän päjumalanpert' sijadase lidnas. Om judaizman i protestantizman kundoid.

Lapsiden opendusen aluzkundad oma päivkodid, keskškolad. Professionaližen opendusen aluzkundad: indistrialine^[1], mehanikan da sauvondan^[2], opendusen i proftehnologijoiden^[3], medicinine i muzikaline kolledžad, ekonomikan da ohjastusen, gumanitarine i opendusen tehnologijoiden institutad, Venäman üläopendusen aluzkundoiden (Uf, Moskv) koume filialad.

Transport

Avtobusad, tramvaid, ezilidnelektrojonused, rel'savtobusad da taksid oma kundaližeks transportaks lidnas i sen aglomeracijas. «Uf — Orenburg»-avtote ümbärdab lidnad päivlaskmaižeks röunaks. Avtotesild ühtenzoitab Išimbai-lidnanke Vaugedjoges päliči. Salavat-raudtestancii radab «Uf — Orenburg»-jonol vspäi 1951.

Lähembaine Sterlitamakan lendimport radoi aktivižikš vhesai 1997, om sauptud, alastub rekonstrukcijale vspäi 2008.

Galerei

Lidnan Administracijan sauvuz (2011)
ZAGS (2011)
Salavatan pämečet', vn 2011 nägu
Jumalanmaman Emäganpäivän päjumalanpert', vn 2011 nägu
«Gazprom neftehim Salavat» vl 2012 (edel 2011. vot «Salavatnefteorgsintez»-kompanii)
Novo-Salavatskaja LEK vl 2016
«Neftehimik»-kul'turkeskuz (2011, Kivivoihimik)
«Salavat»-sportkoncertkompleks (2011)
Avtobusstancii vl 2011
Salavat-raudtestancijan nägu jaugnikoiden sildaspäi vl 2013

Homaičendad

↑ Salavatan industrialižen kolledžan sait (salinc.ru). (ven.) (+ äikel'ne avtomatine känduz)
↑ Salavatan mehanikan da sauvondan kolledžan sait (salavat-smsk.ru). (ven.)
↑ Salavatan opendusen i proftehnologijoiden kolledžan sait (skoipt.ru). (ven.)

Irdkosketused

Salavat Vikiaitas

	Baškortostanan Tazovaldkundan lidnad
	Agidel' \| Baimak \| Belebei \| Beloreck \| Birsk \| Blagoveščensk \| Davlekanovo \| Dürtüli \| Išimbai \| Janaul \| Kumertau \| Meleuz \| Mežgor'je \| Neftekamsk \| Oktäbr'skii \| Salavat \| Sibai \| Sterlitamak \| Tuimazi \| Učali \| Uf

[1] Salavatan industrialižen kolledžan sait (salinc.ru). (ven.) (+ äikel'ne avtomatine känduz)

[2] Salavatan mehanikan da sauvondan kolledžan sait (salavat-smsk.ru). (ven.)

[3] Salavatan opendusen i proftehnologijoiden kolledžan sait (skoipt.ru). (ven.)

[1]

[2]

[3]