Sal'to (lidn, Urugvai)

Sal'to
Salto

Lidnanznam	Flag
Valdkund	Urugvai
Eläjiden lugu (2024)	115,448 ristitud
Pind	37,0 km²
Telefonkod	+598−473-xx-xxx
Aigvö	UTC−3

Sil sanal voib olda toižid znamoičendoid; miše nähta niid, tulgat tänna.

Sal'to (isp.: Salto [ˈsalto]) om lidn Urugvain lodehes. Se om valdkundan kahtenz'-koumanz' lidn eläjiden lugun mödhe, om Sal'ton agjan administrativižeks keskuseks da palaks.

Istorii

Eländpunktan aluz om pandud vl 1756 kuti Brazilijan varmitesed, vspäi 1817 — Sal'to-žilo Urugvaiš. Sai lidnuden statusad (isp. villa) vl 1835, om olmas lidnaks (isp. ciudad) vs 1863 kezakun 8. päiväspäi. Edel padoseinän sauvondad oli pit'kid kos'kid Urugvai-jogel läz Sal'tod, ka nimitihe lidnad niiden mödhe (kändase «hüpke» ispanijan kelespäi).

Sal'to šingotase sömtegimištol (lihakonservad, citrusfruktad), laivansauvomižel, lebuturizmal Argentinaspäi. Lidn om ümbärtud citrusfruktoiden i vinmarjan plantacijoil.

Geografijan andmused

Lidnan sijaduz agjas i valdkundas vn 2005 kartal

Lidn sijadase agjan suvipäivlaskmas, Urugvai-röunjogen hural randal, 48 m ü.m.t. keskmäižel korktusel.

Matkad Montevideo-pälidnhasai om 498 km suvipäivnouzmha-suvhe avtotedme vai raudtedme. Argentinan Konkordii-lidn om vastrandal, ned ühtenzoittas Sal'to Grande-padoseinädme kaks'toštkümnes kilometras pohjoižhe lidnaspäi.

Klimat om subtropine neps. Keza om päivoikaz, tal'vaig om pil'vekaz. Voden keskmäine lämuz om +19,1 C°, tal'vkun-keväz'kun +22,7..+25,6 C°, kezakun-elokun +12,6..+14,5 C°. Ekstremumad oma −5,6 C° (kezaku, heinku) i +42,2 C° (viluku, uhoku). Ei voi panda halad kül'mkus-sulakus (sulakun minimum om +0,4 C°). Il'man lämuz voib ületada +30 C° miččel taht kul. Paneb sadegid 1386 mm vodes, vähemba heinkus-elokus (55..69 mm kus), enamba redukus-sulakus (128..157 mm kus). Il'man keskmäine relätivine nepsuz vajehtase 62..67 % röunoiš kül'mkus-uhokus, 75..80 % sulakus-heinkus, 69..72 % toižiš kuiš.

Eläjad

Vn 2011 Urugvain rahvahanlugemižen mödhe lidnan eläjiden lugu oli 104,028 ristitud, agjan viž kudendest, vn 2023 — 114,084 ristitud. Kaikiš suremb lidnan ristitišt om nügüd'.

Nened professionaližen opendusen aluzkundad ratas lidnas: Tehnologine institut, Opendajiden vaumičendan kaks' keskust, tehnine üläškol, ohjandusen da holitišiden tehnologine üläškol, Tazovaldkundan universitetan filial i privatižen Katoližen universitetan filial.

Irdkosketused

• Lidnan oficialine sait (salto.gub.uy). (isp.)
• Lidnan palabiden purtkiden sait (termasdayman.com). (isp.)