Seul

Seul
서울 특별시
*(Seul-thikpölsi)*
Lidnanznam;	Flag;
Valdkund	Korejan Tazovaldkund
Eläjiden lugu (2023)	9,443,722 ristitud
Pind	605,24 km²
Pämez'	O Se Hun; (heinku 2006 — eloku 2011,; sulaku 2021—,; 오세훈 / 吳世勳)
Telefonkod	+82−2
Aigvö	UTC+9

Seul (kor.: 서울 Seul [sʰʌ.ul] — «Pälidn») om Korejan Tazovaldkundan pälidn da kaikiš suremb lidn, sen ristitišt om läz 10 mln. ristituid. Lidn om eriliženke statusanke administrativižešti i üks'jäine mugoine valdkundas, mülüdas sidä statistižhe Pälidnaižhe regionha (Sudogvon).

Istorii

Eländpunkt mainitase ezmäižen kerdan vl 370 edel meiden erad kuti Vireson, Pekče-valdkundan pälidn. Korö-valdkundan aigan oli tetab kuti suvine pälidn i Hanson-lidnuz Hangan-jogen mödhe 11. voz'sadaspäi. Čoson-valdkundan aigan (1392−1897) oli sen Hanän-pälidnaks.

Geografijan andmused

Seul sijadase valdkundan lodehes, seižub Han-jogen randoil (kor.: 한강 Hangan, kaikiš znamasižemb valdkundas, 494 km pitte, lankteb Pakuižhe merhe), 38 m ü.m.t. keskmäižel korktusel. Om ümbärtud Köngido-agjal, mugažo röunatab Inčhon-lidnanke da meriportanke, sen territorii sijadase päivlaskmha Seulaspäi. Matkad lidnan röunaspäi Pohjoižkorejan röunhasai om 24 km pohjoižhe.

Klimat om mussonine, pil'vekaz vodes läbi, musson puhub semendkuspäi redukuhusai. Kezal om räk da luja nepsuz, no luja räk oleskeleb harvoin. Toižil voz'aigoil tulleid kontinentaspäi dominiruidas. Seul ei ole sauptud mägil pohjoižtulleid vaste, pehmed tal'v oleskeleb lidnas −15 C° lämuzidenke da sen alemba. Voden keskmäine lämuz om +12,8 C°, kezakun-elokun +22,7..+26,1 C°, tal'vkun-uhokun −2,0..+0,7 C°. Ekstremumad oma −23,1 C° (tal'vku) i +39,6 C° (eloku). Kezaaigan minimum om +8,8 C° (kezaku), tal'vaigan maksimum om +18,7 C° (uhoku). Paneb sadegid 1418 mm vodes, enamba heinkus (414 mm) i elokus (348 mm), vähemba tal'vkus-uhokus (17..28 mm kus). Paneb lunt tal'ven 24 päiväs keskmäras. Kun keskmäine relätivine nepsuz vajehtase 66..76 % röunoiš kezakus-sügüz'kus, 55..62 % redukus-semendkus.

Tobmuz

Seulas om 25 municipališt ümbrikod (ku — 구, niil om ičeohjandust), kudambad alajagasoiš 522 administrativižeks rajonaks (ton — 동), ned — 13 787 thon:aks da 102 796 pan:aks.

Edeline lidnan pämez' oli Pak Von Sun (reduku 2011 — heinku 2020, 박원순 / 朴元淳), rikoi ičtaze harrasmentan väritusen tagut ezimeletaden.

Eläjad

Vl 2014 lidnan eläjiden lugu oli 10 140 000 ristituid^[1]. Ristitišt poleneb i sirdab ezilidnoihe 1990-nziden voziden keskespäi elon kallištusen tagut. Vl 2018 lidnan kaikenaigaine ristitišt oli 9 838 892 eläjad. Kaik 25,6 mln. ristituid^[2] elädas Seulan aglomeracijas (ühesanz' mail'mas), valdkundan pol'.

Ekonomik

Seul om üks' kaikiš järedambiš mail'man keskusišpäi tegimišton da finansoiden šingotesen mödhe. Samsung-, LG-, Hyundai-, Kia- da SK-korporacijoiden päofisad sijadasoiš täs. Läz 20 tuhad edheotandoid ratas Seulas, ned sätas valdkundan kogosüdäiproduktan 21 %^[3].

Tegimišton päsarakod: mašiništonsauvomine, elektrotehnine sarak, kapitaline sauvond.

Transport

Zavottihe sauda metrod vl 1974, möhemba mi Phen'janan metrod. Nügüd'aigan om ühesa jonod Seulan metropolitenas, ned oma sidotud ahthas ezilidnoiden elektroraudteidenke. Kaik om 22 jonod 707 stancijanke pälidnan regionan elektroraudsistemas. Avtobustransport om lujas šingotadud lidnan südäimes, lidnoidenkeskeižil maršrutoil-ki. Avtoteil om erigoittud likundjonoid avtobusoiden täht.

Kaks' rahvahidenkeskešt lendimportad holitadas lidnad: Inčhon-lendimport (vspäi 2001, kaik reisad) i Kimpho (südäireisad, mugažo reisad Tokionnoks da Šanhaihesai).

Sport

Vl 1988 Seul vastsi 20. Kezaližid Olimpiadvändoid.

Vl 2002 lidn ühtni Mail'man futbolan čempionatha, oli sen vändoiden ühteks sijišpäi.

Galerei

Lidnan ohjastusen pert' (2019, vanh i uz', kaks' sauvust ezimal)
Pert'kuluiden Könbok-kompleks (2016, om saudud vl 1394)
Azjaline Kannam-rajon (angl.: Gangnam-gu) vl 2009
Üläkorged Lotto-sauvuz i Džamsin-raudtesild Han-joges päliči vl 2015
Olimpine stadion sen ümbrištonke (2008)
Seul-päraudtestancii vl 2018

Homaičendad

Irdkosketused

Lidnan administracijan oficialine sait (seoul.go.kr). (kor.) (angl.) (jap.) (kit.) (fr.) (isp.)
Seulan fotokuvad globalphotos.org-saital.

Seul Vikiaitas

	Azijan pälidnad
	Abu Dabi \| Amman \| Ankar \| Astan \| Ašhabad \| Bagdad \| Baku \| Bandar Seri Begavan \| Bankok \| Beirut \| Biškek \| Dakk \| Damask \| Dili \| Doh \| Džakart \| Dušanbe \| El' Kuveit \| Hanoi \| Islamabad \| Jerevan \| Jerusalim \| Kabul \| Katmandu \| Kuala Lumpur \| Male \| Manam \| Manil \| Maskat \| Naip'jido \| Nikosii \| Pekin \| Phen'jan \| Pnompen' \| Rijad \| Sanaa \| Seul \| Singapur \| Šri Džajavardenepura Kotte \| Taškent \| Tbilis \| Tehran \| Thimphu \| Tokio \| Ulanbatar \| Uz' Deli \| V'jent'jan

[1] Seoul's Population Drops Below 10 Million for First Time in 25 Years (Seulan ristitišt tegihe vähemb mi 10 millionad ezmäižen kerdan 25 vodes) // Čosun Il'bo (english.chosun.com). — 2014-02-16. (angl.)

[2] Current population of the Seoul National Capital Area (Seulan rahvahaližen pälidnan regionan nügüdläine ristitišt). — Statistics Korea (index.go.kr). (angl.)

[3] Welcome to KTC (Hüväd tulgat KTC:ha). — Lmg.go.kr, 2006. (angl.)

[1]

[2]

[3]