Severokuril'sk

Severokuril'sk
Северо-Курильск

Lidnanznam	Flag
Valdkund	Venäma
Eläjiden lugu (2023)	2,439 ristitud
Pind	155 km²
Pämez'	Aleksandr Ovsännikov (kezaku 2021—)
Telefonkod	+7−42 453-xx-xxx
Avtokod	65
Aigvö	UTC+11 (MSK+8)

Lidnan geografine sijaduz saril

Severokuril'sk (ven.: Се́веро-Кури́льск, japon.: セベロクリリスク Seberokuririsku, edel 1946. vot — Kasivabar, japon.: 柏原 Kasivabara) om Venäman lidn Sahalinan agjan Paramušir-saren pohjoižes. Se om Severokuril'skan lidnümbrikon (edel 2006. vot — rajonan) administrativine keskuz da üks'jäine elänzoittud eländpunkt.

Istorii

Vspäi 1711 Venäman imperijan merimatkadajad tedoižiba Kurilan sarid Petropavlovskaspäi Kamčatkal. Vll 1875−1945 oli Japonijan oficialižeks palaks. Japonijalaižed paniba Kasivabar-žilon alust ainalaižiden Ottomai-külän sijha. Sirtihe ainalaižid Šikotan-sar'he. Nimitihe žilod «Ivaki»-tedoiduzlaivan kapitanan kanzannimen mödhe. Suren sodan aigan AÜV:oiden aviacii bombardirui meriportad da sodalendimportad žilos vspäi 1943. Se sai lidnan statusad vl 1946, nimitihe Kurilan sariden mödhe. Vn 1952 5. päiväl kül'mkud luja (kümne metrad kortte) cunami pani lidnad mantazole manrehkaidusen jäl'ghe 8.8..9.0 magnitudanke, i se om udessündutadud uzil korktusil. Vn 2025 heinkun 30. päiväl lidnan port i kalategim oliba upotadud cunamin nelläl aldal lujan (8.8 magnitudanke) manrehkaidusen Kamčatkal jäl'ghe.

Severokuril'sk šingotase kalantegimišton radol sijaližel torhudel.

Geografijan andmused

Lidnümbrikon sijaduz agjas (2010)

Lidn sijadase ümbrikon pohjoižpäivnouzmas, Kurilan kahtenden sal'men randal (ven.: Второй Курильский пролив), 30 m ü.m.t. keskmäižel korktusel, Tünen valdmeren Ohotskan meren päivnouzmaižel randal.

Matkad Suvisahalinskhasai om 1060 km suvipäivlaskmha orhal, no voib sadas kalalaivištol vai punolendimel vaiše Petropavlovskan Kamčatkal kal't (Kamčatkan rand) 312 km pohjoižpäivnouzmha orhal, se om lähembaine lidn.

Klimat om subarktine meren märg. Vilu Ojasio-joksmuz valatoitab sidä. Voden keskmäine lämuz om +3,0 C°, heinkun-sügüz'kun +10,0..+11,7 C°, tal'vkun-keväz'kun — −2,4..−4,4 C°. Ekstremumad oma −22,0 C° (viluku) i +29,4 C° (heinku). Kezaaigan minimum om −1,9 C° (kezaku), tal'vaigan maksimum om +7,9 C° (tal'vku). Ei voi panda halad heinkus-elokus vaiše. Paneb sadegid 1977 mm vodes, enamba redukus-kül'mkus (246..253 mm kus), vähemba vilukus (126 mm) i sulakus-semendkus (113..116 mm kus). Paneb lunt pol'vot (184 päiväd vodes), lumikatken korktuz sase 86..103 sm uhokus-sulakus. Voib panda tuhkad lähižes Ebeko-vulkanaspäi seičemes kilometras. Kun keskmäine relätivine nepsuz vajehtase 85..89 % röunoiš kezakus-elokus, 74..77 % redukus-keväz'kus, 79..82 % toižiš kuiš.

Tobmuz

Baikovo-sodažilo jäb kaikenaigaižeta ristitištota 20. voz'sadan lopuspäi, mülüb lidnümbrikho Severokuril'skan ližaks. Lidnümbrikon pind — 3501,23 km².

Municipaližen ühtnikan pämez' om sen Administracijan pämez'. Edeline lidnümbrikon pämez' om Aleksandr Serebräkov (keväz'ku 2014 — kezaku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 2 536 ristitud, vn 2021 — 2 374 ristitud. Kaik 2 587 eläjad oli lidnas vl 2017. Kaikiš suremb lidnan ristitišt oli 7 733 eläjad vl 1959 i 5 180 eläjad vl 1989.

Ortodoksižen hristanuskondan ph. Innokentii Moskvalaižen puine jumalanpert' om letud vll 2003−2005.

Openduz

Lapsiden opendusen aluzkundad oma päivkodi, keskškol.

Lähembaižed professionaližen opendusen aluzkundad ratas Petropavlovskas Kamčatkal.

Galerei

• 
  Lidnan edeližen sijadusen nägu vl 2006 (oli edel vn 1952 cunamid)
• 
  Kajaged kalategimen päl Paramušir-sarel (2021)

Irdkosketused

• Lidnan da lidnümbrikon tobmuden aluzkundoiden oficialine sait (sevkur.sakhalin.gov.ru). (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)