Severoural'sk

Severoural'sk
Североуральск

Lidnanznam	Flag
Valdkund	Venäma
Eläjiden lugu (2025)	23,705 ristitud
Pind	80 km²
Pämez'	Svetlana Mironova (sulaku 2022—)
Telefonkod	+7−34 380-xx-xxx
Avtokod	66, 96, 196
Aigvö	UTC+5 (MSK+2)

Severoural'sk (ven.: Североура́льск) om Venäman lidn Sverdlovskan agjan lodehes. Se om Severoural'skan ümbrikon (edel 2025. vot — lidnümbrikon) administrativine keskuz, mülüb sihe.

Istorii

Ende mansid eliba niiš tahoiš. Venälaižiden eländpunktan aluz om pandud vl 1758 kuti žilo sauvomha da holitamha Petropavlovskii-tegint sijaližen raudkivendon ümbriradmižen täht, nimitihe žilon Pedroin da Pauloin pühäpertin mödhe. Vl 1826 avaitihe kuldan jogilöudmižsijid, i vl 1827 sauptihe raudantegint torhuden lopindan tagut. Vl 1931 löuzihe alüminijan torhut žilonno. Vn 1944 27. päiväl kül'mkud žilo sai lidnan statusad nügüdläiženke nimenke. Nimi om anttud geografižen sijadusen mödhe, kuti Sredneural'sk- i Suviural'sk-lidnoile. Vspäi 1963 lidn alištub agjan tobmudele oikti.

Severoural'sk šingotase boksitoiden järedal samižel kaivuziden kal't («Sevuralboksitruda»-edheotand mülüb «Rusal»-kompanijan strukturha), mugažo raudbetonantegim, omblendfabrik i oludtegim jätktas radod.

Geografijan andmused

Severoural'skan ümbrikon sijaduz agjas vn 2018 kartal

Lidn sijadase ümbrikon suvipäivnouzmas, Vagran-jogen hural randal (ven.: Вагра́н 137 km pitte, Sos'van oiged ližajogi, Obinjogen hurapol'ne bassein) i sen Kolong-ližajogen randoil (ven.: Колонга 41 km pitte), Pohjoižen Uralan päivnouzmaižidenno pautkidenno, 200 m ü.m.t. keskmäižel korktusel.

Matkad Jekaterinburghasai om 370 km suvipäivlaskmha orhal vai 440 km avtotedme, raudteühtenzoituz om vaiše jüguiden täht. Lähembaine lidn om Volčansk kaks'kümnes vides kilometras suvhe orhal, avtol i raudtel. Radonan londuseline koncentracii om lujetud.

Ei ole passažirühtenzoitust raudtedme Severoural'sk-raudtestancijhasai vspäi 2013, sen ližaraudted oma demontiruidud, raudtevagzalan sauvuz kävutase avtostancijaks. Boksitad-raudtestancii (ven.: Бокситы) radab lidnan suves jüguiden täht vaiše.

Tobmuz

Municipaližen ümbrikon Dum kogoneb 20 deputataspäi, valitas heid videks vodeks.

Edeline lidnan ümbrikon pämez' om Vasilii Matüšenko (reduku 2016 — uhoku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 29 263 ristitud, lidnan ümbrikon koume videndest, vn 2021 — 24 428 ristitud. Kaik 26 543 eläjad oli lidnas vl 2017. Kaikiš suremb lidnan ristitišt oli 36 200 eläjad vodel 1992.

Rahvahad (ozutadud rahvahudenke vl 2010): venälaižed — 90,9 %, totarlaižed — 3,8 %, ukrainalaižed — 1,3 %, toižed rahvahad — 4,0 %.

Ortodoksižen hristanuskondan kaks' pühäpertid oma kaičenus i saudud lidnas: phh. Pedroin da Pauloin päjumalanpert' (kivine om saudud vll 1787−1798) i ph. Jurgii-vägestusenkandajan jumalanpert' (letihe vll 2013−2015). Islaman kundaline («mahallä») mečet' om avaitud lidnas.

Openduz

Lapsiden opendusen aluzkundad oma üks'toštkümne päivkodid, viž keskškolad, čomamahtoiden škol, čomamahtoine škol, školoidenkeskeine openduzkombinat.

Severoural'skan politehnikum (tehnikum) i Jekaterinburgan ekonomikan da tehnologijoiden kolledžan filial oma lidnan professionaližen opendusen aluzkundoikš.

Galerei

• 
  Mirun torg (2015)
• 
  Phh. Pedroin da Pauloin päjumalanpert', vn 2019 nägu
• 
  MiG-21 skveras i Sevuralboksitruda-edheotandan kontor (2016. voz' vai sen aigemba)
• 
  Krasnaja Šapočka-kaivuz vl 2016 (Sevuralboksitruda, «Rusked Šapkuihut»)
• 
  Severoural'skan avtobusstancii vl 2021

Irdkosketused

• Municipaližen ümbrikon tobmuden aluzkundoiden sait (adm-severouralsk.ru). (ven.)