Sibirin Usol'je

Sibirin Usol'je
Усолье-Сибирское
Lidnanznam;	Flag;
Valdkund	Venäma
Eläjiden lugu (2025)	71,694 ristitud
Pind	74 km²
Pämez'	Maksim Toropkin; (sügüz'ku 2017—)
Telefonkod	+7−39 543-xx-xxx
Avtokod	38, 85, 138
Aigvö	UTC+8 (MSK+5)

Sibirin Usol'je (ven.: Усо́лье-Сиби́рское, burät.: Дабһан) om Venäman lidn da lidnümbrik Irkutskan agjan suves. Se om agjan videnz' lidn eläjiden lugun mödhe, edel 2016. vot oli mugažo Usol'jen rajonan administrativižeks keskuseks (ei mülünd rajonha).

Istorii

Eländpunktan aluz om pandud vl 1669 keitandsolan purtkil kuti Usol'je jenisejalaižil Mihalövad-vellesed-kozakoil. Usol'je sai lidnan statusad vl 1925. Vspäi 1940 om nügüdläiženke nimenke erištamha Permin sätud Usol'je-lidnaspäi. Šingotaškanzihe himižen tegimišton keskuseks Suren sodan jäl'ghe, pästtihe bazižid substancijoid, silikonad, mašiništod päiväižbatarejiden täht.

Sibirin Usol'je šingotase kaivuzmašiništon tegimel, farmaceftižen torhuden tegimel, «Baikal»-faneriž-virikombinatal, ratud kristalliden edheotandal, Usol'je-solredukurortal. Vodele 2017 travijad himižed edheotandad ei ole rados, om äi travijoid jändusid niišpäi, toksižed himižed tehmištlavuded oma likvidacijas.

Geografijan andmused

Lidn sijadase ümbärdajan rajonan pohjoižpäivnouzmaiženno röunanno, Angar-jogen hural randal (Bratskan vezivaradim), 440 m ü.m.t. keskmäižel korktusel.

Matkad Irkutskhasai om kuz'kümne kuz' kilometrad suvipäivnouzmha orhal, 79 km «Sibir'»-avtotedme vai Transsibal. Lähembaižed lidnad om Svirsk i Čerömhovo nell'kümne kilometrad lodeheze orhal vai 50 km avtotel i Angarsk koumekümnes kilometras suvipäivnouzmha keskuzpalhasai orhal i kaikil teil.

Tobmuz

Sibirin Usol'je om lidnümbrikon üks'jäižeks eländpunktaks.

Lidnümbrikon tobmuden pämez' om mer (Administracijan pämez'). Maksim Toropkin om meran radnikusel vn 2017 sügüz'kuspäi. Edeline mer om Oleg Žilkin, radoi vn 2017 sügüz'kuhusai. Lidnan Duman ezimez' om Natal'ja Jefremkina vn 2017 redukuspäi. Edeline Duman ezimez' om Lübov' Lis, radoi vn 2017 redukuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 83 327 ristitud, vn 2021 — 74 762 ristitud. Kaik 77 989 eläjad oli lidnas vl 2017. Kaikiš suremb lidnan ristitišt oli enamba 100 tuhad eläjid vll 1975−2001 (109 tuh. rist. vll 1985−1986).

Ortodoksižen hristanuskondan kaks' pühäpertid^[1] oma saudud lidnas: Spasan Toižetamižen jumalanpert' (letihe vll 1994−2016) i puine ph. Mikulai-čudonsädajan jumalanpert' (om saudud vll 2006−2008). Katoline naižjumalankodi om avaitud vspäi 2002. Islaman pühäpert' om väges lidnas.

Openduz

Lapsiden opendusen aluzkundad oma kaks'kümne viž nomeruidud päivkodid (nomer 1..3, 5..7, 18, 21, 22, 25, 26, 28, 29, 31..35, 37..40, 42..44), kümne keskškolad (nomer 2, 3, 5, 6, 10, 12, 13, 15..17), kaks' gimnazijad (nomer 1 i 9), licei nomer 1, lapsiden sädamižen pert', muzikškol, čomamahtoine škol, lapsiden da norišton sportškol nomer 1, noriden naturalistoiden stancii.

Professionaližen opendusen aluzkundad: Usol'jen industrialine^[2], holitusen sferan i medicinine^[3] tehnikumad, Angarskan pedagogižen kolledžan filial, Irkutskan valdkundaližen tehnižen universitetan filial.

Transport

Avtobusad, tramvaid da maršruttaksid oma kundaližeks transportaks lidnas. Vn 2024 kül'mkuspäi ümbärdai lidnad avtote om avaitud.

Ezilidnelektrojonused (päraudtestancii da koume platformad) i kezaližed jogilaivad ühtenzoittas Irkutskan aglomeracijan toižidenke lidnoidenke.

Galerei

Lidnan tobmuden sauvuz vn 2021 heinkus
Spasan Toižetamižen jumalanpert', vn 2021 heinkun nägu
Kaičendministrusen radiolokacine «Voronež-M»-stancii (2016)
Irkutskan valdkundaližen tehnižen universitetan filial (2009)
Kul'turkeskuz (2021)
Tramvaid i torguindkeskuz (2009)
«Sibir'»-avtote (R255) läbitab lidnad vl 2015
Sibirin Usol'je-päraudtestancijan sauvused vn 2021 heinkus

Homaičendad

Irdkosketused

Sibirin Usol'je Vikiaitas

	Irkutskan agjan lidnad
	Alaudinsk \| Alzamai \| Angarsk \| Baikal'sk \| Birüsinsk \| Bodaibo \| Bratsk \| Čerömhovo \| Irkutsk \| Kirensk \| Sajansk \| Sibirin Usol'je \| Slüdänk \| Svirsk \| Šelehov \| Zim \| Železnogorsk Ilimal \| Taišet \| Tulun \| Ust'-Ilimsk \| Ust'-Kut \| Vihorevk

[1] Sibirin Usol'jen pühäpertid sobory.ru-saital. (ven.)

[2] Usol'jen industrialižen tehnikuman sait (гапоууит.рф). (ven.)

[3] Usol'jen medtehnikuman sait (usoliemed.ru). (ven.)

[1]

[2]

[3]