Siluanov Anton Germanovič
| Siluanov Anton Germanovič | |
.jpg) | |
| radmižen toižend: | |
|---|---|
| sündundan dat: |
12. sulaku 1963 |
| sündundan sijaduz: |
Moskv, Nevondkundaližiden Socialistižiden Tazovaldkundoiden Ühtištuz |
| valdkund: |
|
| tat: | |
 Siluanov Anton Germanovič VikiAitas | |
Anton Germanovič Siluanov (ven.: Анто́н Ге́рманович Силуа́нов, sünd. Moskvha, 12. sulaku 1963, NSTÜ) — venämalaine politikmez', ekonomist. Venäman rahavaroiden ministr vodelpäi 2011, Venäman varumatomuden nevondišton ühtnik (vodelpäi 2011). Venäman valdmehišton aigsijaline pämez', vozil 2018 — 2020. Venäman nügüdläine valdkundaline 1. klassan nevonik (2008). Ekonomikan tedodoktor (2012).
Elostarin
[vajehta | vajehtada lähtetekst]
Anton Siluanov om sündnu Moskvha vn 1963 12. sulakud, tedofinansistoiden German Mihailovič da Janina Nikolajevna Siluanovoiden kanzha.
Vl 1985 Siluanov lopi Moskvan rahoitusen institutad, «rahavarad da pidenzoittud velg»-openduzpalakundad.
Vn 1985 elokuspäi vn 1987 keväz'kuhusai — ekonomist «Giproribas», Venäman NFST:n rahavaroiden ministrusen vanhemb ekonomist.
Vn 1987 keväz'kuspäi vn 1989 semendkuhusai mez' služi Nevondkundaližes armijas.
Vn 1989 semendkuspäi vn 1992 vilukuhusai — päine i 1. kategorijan ekonomist, palakundan pordaigaline pämez', Venäman NFST:n rahavaroiden ministrusen konsul'tant.
Vn 1992 uhokus — Venäman ekonomikan da rahavaroiden ministrusen palakundan pordaigaline pämez'.
Vn 1992 uhokuspäi vn 1997 redukuhusai Siluanov — rahavaroiden ohjandusen palakundan pordaigaline pämez', rahoituzpalakundan pordaigaline ohjandai — palakundan pämez', Venäman rahavaroiden ministrusen rahoituzpalakundan pordaigaline pämez', hän tuli sihe radole tatan abul.
Vl 1994 Siluanov vahvišti dissertacijan, miše tehtas ekonomikan tedokandidataks, dissertacijan temaks valiči «Valdkundan büdžetpolitik sirdusen torguzkosketusidennoks arvoimižiš: Venälaižen Federacijan ozutesel»[1].
Vn 1997 redukuspäi vn 2003 heinkuhusai — mikroekonomižen politikan palakundan da Venäman rahavaroiden ministrusen bankradon pämez'.
Vn 2001 keväz'kun 22. päiväspäi — Venäman rahavaroiden ministrusen laudkundan ühtnii.
Voden 2003 heinkuspäi voden 2004 semendkuhusai — Venäman rahavaroiden aigsijaline ministr.
Voden 2004 semendkuspäi voden 2005 tal'vkun 12. päivähasai — Venäman rahavaroiden ministerstvan rahakosketusiden erišton pämez'.
Voden 2005 tal'vkun 12. päiväspäi — Venäman rahavaroiden aigsijaline ministr.
Voden 2011 sügüz'kun 27. päiväspäi — Venäman rahavaroiden aigsijaline ministr.
Voden 2011 tal'vkun 16. päiväspäi Siluanov om Venäman rahavaroiden ministr.
Vodel 2012 Siluanov polesti dissertacijan i tegihe ekonomikan tedodoktoraks, temaks valiči "Rahakosketused federalizman kehitoitusen oloiš Venämal". Oficialižed vastustajad — ekonomikan tedodoktor, professor , ekonomikan tedodoktor i ekonomikan tedodoktor, professor L'udmila Likova. Päorganizacii [2].
Voden 2013 vilukuspäi — Rahoitusen universitetan, mitte om Venäman valdmehišton ohjandusel, raha-ekonomižen tedokundan dekan.
Vn 2015 vilukus Venäman valdkundmehišt pani Siluanovad kaclendnevondkundan ühtnijan radsijale.
Vn 2016 uhokus hän läksi «Ühthine Venäma»-partijan Ülembaižes nevondkundaspäi (oli sen ühtnijan vlpäi 2012).
Sulakus vodel 2017 Siluanov tegihe VTB-bankan tarkištelendnevondišton pämeheks.
18. semendkud vodel 2018 Venäman Vladimir Putin-prezidentan käskön mödhe Siluanov tegihe Venäman valdmehišton ezmäižeks aigsijaližeks pämeheks — Venäman rahavaroiden ministraks.
Konz Dmitrii Medvedevan toine valdmehišt jäti radsijan vilukus vodel 2020 Siluanov jäti ezmäižen aigsijaližen pämehen radsijan, no jatkui rata rahavaroiden ministran.
14. semendkud vodel 2024 Siluanov tegihe Venäman rahavaroiden ministraks, necil-žo päiväl Venäman Preziden allekirjuti käskön hänen panendas.
15. semendkud vodel 2025 Venäman Prezidentan käskön mödhe Siluanov om pandud holenpidändan nevondištoho.
Kaikile avaitud mel'kacundad
[vajehta | vajehtada lähtetekst]Vl 2018 Siluanov oli ühten üks'hengišpäi, ken tahtoi pästta radho zakonan penziimehiden igän surendandas Venämal. Nece pätuz ei tulend mel'he äjile ristituile, hö meletiba, miše tahtoitas pästta zakon eloho peitos Mail'man čempionatan sün taguiči. Siluanov sanui, miše reforman zavodind i Mail'man čempionat jaugmäčun mödhe oma ühtel aigal ani muite, miše pensiireforaman polhe levedas diskutiruidas, a möhemba zavodihe rahvahan vastustused reformad vaste[3].
Oldes Venäman rahavaroiden ministran, Siluanov om päarvostelii i hän azoteleb projektan Moskv−Kazan'-kiruhraudten tegendan mödhe.
Sulakus vodel 2019 Siluanov tariči panda školprogramha kursan ičeze biznesan tegendan mödhe.
Vl 2019 Siluanov pučihe VTB-bankan pämehen Andrei Kostinan taričendaspäi alenzoitta nalogoid venälaižiden täht, kel oma pen' rahatulo, i mugažo penen da keskbiznesan täht.
Vl 2020 Siluanov nimiti radon nalogmaksuid Venämal korktoikš. Zakonan mödhe radonandajale Venämal pidab maksta radnikas kaičuzmaksoid, nece om 30 % paukaspäi, 22 % mäneb, 5,1 % — tervhuz'kaičuzmaksuihe, 2,9 % — socialižehe kaičuzmaksuihe. Völ 13 % ristitun rahatulon nalogad heittas radnikan paukaspäi. Mugoižiden suriden nalogoiden taguiči Venämal peittud pauk rados om vaiše ekonomikan rahatulon 13 %. Nalogoiden stavk radole Venämal om kaikid korktemb mail'mas, se om 36,6 % kommercižišpäi radišton ližarahoišpäi. Rindatuzoppindad ozutiba, miše Kazahstanas nalogoiden stavk radole om vaiše 10,1 %, Amerikas — 9,8 %, Kanadas — 12,7 %, Germanias — 21,5 %, Velikobritanias — 12 %. Venäman valdmehišt ei hökkähta alenzoitta nalogoid, sikš ku om varu mureta Venäman b'udžetad i tulijas aigas voib tehtas rahoiden mairiž Venäman pensiifondas, sel'genzoiti rahavaroiden ministr Siluanov.
Kanz
[vajehta | vajehtada lähtetekst]Tat — German Mihailovič Siluanov (om sündnu 25.02.1937), vodel 1961 lopi Venäman ekonomikan universitetad G. V. Plehanovan nimed, "Rahavarad"-tedokundan, openduzvozil oli tedokundan komsomolan organizacijan aigsijaližen sekretarin. German oli ühten koumespäi pästnikaspäi, kudambid institutan lopindan jäl'ghe jättihe Moskvaha, oigetihe radmaha Sovetskijan Sojuzan valdkundan varumatomuden komitetha. Sigä hän radoi vähäižen, i tedokundan dekanan Raisa Gužkovan abul putui radole Sovetskijan Sojuzan rahavaroiden ministerstvaha, kus radoi hänen mužikan Ivan Gužkovan ohjandusel. Oli komsomil'skijan aktivistan, oli seinlehtesen toimišton ühtnikan Rahavaroiden ministerstvas. Vodeks 1991 tegihe RSFSRan rahavaroiden ministerstvan erišton pämeheks, vodel 1996 oli Venäman rahavaroiden ministerstvan velgan da rahan pörundan erišton aigsijaližen pämehen, vodel 1996 läksi pensijale. Teravas nece erišt sauptihe i avaitihe uz' mikroekonomikan da bankoiden erišt, mittušt ohjaškanzi Anton Siluanov.
Mam — Janina Nikolajevna Siluanova (om sündnu 20. vilukud 1936), radoi "Rahavarad da statistik"-painištos, jäl'ges oli Venäman rahavaroiden ministerstvan Valdkundaližen universitetan toimišterišton radnikan. Anton Siluanoval om vel'l' Vsevolod (om sündnu 18. uhokud 1976), hän mugažo radab Venäman rahavaroiden ministerstvas.
Mez' om nainu, no vl 2016 tedod hänen akas kadoiba rahatulon deklaracijaspäi.
Gleb-poig (om sündnu vodel 1999), üläopenik Rahoitusen universitetas Venäman valdkundmehišton ohjandusel, noriden politikmehiden školan pästnik, baiker. Aleksei-poig vlpäi 2023 — «Aeroflot»-aviakompanijan regionaližen šingotesen palakundan pämez'[4].
Mel'hetartused
[vajehta | vajehtada lähtetekst]Anton Siluanov navedib ohjata motocikloil, vedenalaine mectuz om mel'he hänele, keradab grammplatoid. Pagižeb saksan kelel.
Pauklahjad
[vajehta | vajehtada lähtetekst]- Koumanden stepenin "Arvtegoiš Kodiman edes"-orden (15. sulakud vodel 2013) — sures panendas valdkundan rahavaroiden politikan tegemižehe i äivoččes hüväs rados.
- IV stepenin orden "Arvtegoiš Kodiman edes" (2. uhokud vodel 2011) — sabustadud radsatusiš i äivoččes hüväs rados'.
- I stepenin ordenan medal' "Arvtegoiš Kodiman edes" (13. sügüz'kud vodel 2007) — arvtegoiš ekonomikas i rahoitusen rados.
- Venäman Prezidentan arvokaz kirjeine (18. kül'mkud vodel 2010) — verazmaižiden pasportoiden andmižes, miččiš kaičese elektrotedod.
- Venäman Prezidentan kitändkirjeine (1. sügüz'kud vodel 2012) — arvtegoiš ekonomikas i äivoččes hüväs rado.
- Venäman Prezidentan kitändkirjeine (6. sügüz'kud vodel 2002) — arvtegoiš ekonomikas i rahoitusen rados.
- Venäman rahavaroiden ministerstvan arvokaz kitändkirjeine (2001).
- Venäman rahavaroiden ministran kitänkirjeine (2002).
- Orden "Pohjoižtähtaz" (Saha Tazovaldkund).
- Orden "Duslik" (Тatarstan, 2015).
- Medal' "Arvtegoiš Čečenijan Tazovaldkundan edes" (24. kül'mkud 2008) — sures panendas Čečenijan Tazovaldkundan rahavaroiden politikan tegemižehe[5].
- Medal' "Arvtegoiš Karjalan Tazovaldkundan edes" (8. kezakud 2020) — arvtegoiš Karjalan Tazovaldkundan i sen eläjiden edes, sures panendas socialiž-ekonomikan valdkundan kehitoitusehe i aktivižes rados laudkundas Karjalan Tazovaldkundan sadavoččen jubilejan praznuičendan mödhe[6].
Painused
[vajehta | vajehtada lähtetekst]- Межбюджетные отношения в условиях развития федерализма в России (Venäman büdžetoidenkeskeižed sidod federalizman šingotesen arvoimižiš). — M.: Delo, 2011. — 295 lp. : kuv., tabl. (ven.) ISBN 978-5-7749-0660-4
Homaičendad
[vajehta | vajehtada lähtetekst]- ↑ Силуанов, Алексей Германович. Бюджетная политика государства в условиях перехода к рыночным отношениям: На примере Российской Федерации: диссертация … кандидата экономических наук : 08.00.10. — Moskv, 1994. — 139 lp. (ven.)
- ↑ Силуанов, Антон Германович. Межбюджетные отношения в условиях развития федерализма в России: автореферат дис. … доктора экономических наук: 08.00.10 / Силуанов Антон Германович; [Место защиты: Рос. акад. нар. хоз-ва и гос. службы при Президенте РФ]. — Москва, 2012. — 42 с.
- ↑ Коммерсантъ, 30 июля 2018. Протесты ушли на пенсию. Москва отозвалась на непопулярную реформу двумя митингами
- ↑ Песков прокомментировал назначение сына Силуанова в департамент «Аэрофлота» // Uzištused 2. uhoku 2023 ria.ru-saital. (ven.)
- ↑ Указ Главы Чеченской Республики от 24.11.2008 № 379
- ↑ Указ Главы Республики Карелия от 8 июня 2020 года № 58 «О награждении государственными наградами Республики Карелия». (ven.)