Belebei

Belebei
Белебей (ven.)
Бәләбәй (bašk.)

Lidnanznam	Flag
Valdkund	Venäma
Eläjiden lugu (2017)	59,123 ristitud
Pind	34,26 km²
Pämez'	Rišat Nizajev (2016—)
Telefonkod	+7−34 786-xx-xxx
Avtokod	02, 102
Aigvö	UTC+5 (MSK+2)

Belebei (ven.: Белебей, bašk. i tot.: Бәләбәй, čuv.: Пелепей) om Venäman lidn da lidnankund Baškortostanan Tazovaldkundan päivlaskmas. Se om Belebein rajonan administrativine keskuz.

Istorii

Eländpunktan aluz om pandud čuvašalaižil sirdmižen jäl'ghe, mainitase ezmäižen kerdan vl 1757 kuti Belebejevo-külä. Nimitihe 10-kilometrižen Belebeik-jogen mödhe (Ik-jogen da Kaman bassein). Vspäi 1781 om olmas lidnan statusanke.

Geografijan andmused

Lidn seižub Suviuralan Bugul'man da Belebein ülüdel, 300 m ü.m.t.keskmäižel korktusel. Matkad Ufahasai om 138 km pohjoižpäivnouzmha orhal, 195 km avtotedme. Lahembaine järed lidn om Oktäbr'skii 78 km avtotedme lodeheze.

Klimat om ven kontinentaline. Heinkun lämuz +20,9 C°, vilukul i uhokul oleleb −11,4 da −11,2 C° keskmäral. Voden keskmäine lämuz om +4,1 C°.

Belebei om lidnankundan üks'jäine eländpunkt.

Eläjad

Vl 1959 eläjiden lugu oli 26 172 ristitud. Kaikiš suremb ristitišt oli vl 2005 — 61 200 eläjad. Vn 2010 kaiken Venäman rahvahanlugemižen mödhe eläjiden lugu oli 60 188 ristitud. Rajonan koume ristitud videspäi elädas lidnas.

Rahvahad (2010, enamba 1%): venälaižed — 47,0%, totarlaižed — 23,1%, čuvašalaižed — 12,5%, baškiralaižed — 12,5%, ukrainalaižed — 1,7%, mordvinalaižed — 1,0%, toižed rahvahad — 2,2%.

Religijan mödhe eläjad oma ortodoksižed hristanuskojad i islamanuskojad-sunnitad.

Ižanduz da transport

Lidnan päsarakod oma paloiden tehmine avtoiden täht (2 tegint), sauvondmaterialiden sarak (savič), sömtegimišt (maidkombinat, etilspirtan pästand).

Kaik 10 keskškolad om lidnas. Specialižen kesk- da alaopendusen aluzkundad: maižandusen mehanizacijan da elektrifikacijan tehnikum, medicinine i gumanitariž-tehnine kolledžad, pedagogine škol.

Avtobusad da taksid oma kundaližeks transportaks. «Samar — Uf»-raudtejono läbitab lidnad vspäi 1914, 1990-nziš vozišpäi Belebei-stancii om olmas vaiše jügustancijaks.

Irdkosketused

• Lidnankundan tobmuden aluzkundoiden oficialine sait (belebey-gp.ru). (ven.)