Belojarskii (lidn)

Belojarskii
Белоярский (ven.)
Нуви сӑңхум (hant.)

Lidnanznam
Valdkund	Venäma
Eläjiden lugu (2020)	19,622 ristitud
Pind	72,15 km²
Pämez'	Jevgenii Pakulev (kezaku 2019—)
Telefonkod	+7−34 670-xx-xxx
Avtokod	86, 186
Aigvö	UTC+5 (MSK+2)

Belojarskii (ven.: Белоя́рский, hant.: Нуви сӑңхум) om Venäman lidn da lidnankund Hantin da Mansin avtonomižen ümbrikon lodehes. Se om Belojarskijan rajonan administrativine keskuz.

Istorii

Eländpunktan aluz om pandud vl 1969 pedroiden paimendusen Huv Sanghum-tahondha («pit'k kall'» hantin kelel) sauvomha da holitamha londuseližen gazan veimen palad kompressorstancijanke sil. Vl 1988 žilo sai lidnan statusad.

Belojarskii šingotase kivivoin da gazan pompandal, sömtegimištol (leibän edheotand i maidtegim), sauvondmaterialiden pästandal (raudbeton, asfal't).

Geografijan andmused

Lidn sijadase Päivlaskmaižen Sibirin tazangištol, 22 m korktusel valdmeren pindan päl, Kazim-jogen (ven.: Казы́м) hural randal (Obin oiged ližajogi). Matkad Obinjogehesai om 60 km päivlaskmha Kazim-laivjogedme, Hanti-Mansiiskhasai om 325 km suvhe-suvipäivnouzmha orhal vai 566 km avtotedme. Lähembaine lidn om Nägan' 186 km suvhe-suvipäivlaskmha orhal vai 280 km avtol. Regionaline civiline lendimport (БЛР) om saudud lidnan suvipäivnouzmas, om reisid Näganihesai.

Klimat om kontinentaline. Voden keskmäine lämuz om −2,0 C°, heinkun +17 C°, kezakun i elokun +12..+13 C°, vilukun −22 C°, tal'vkun i uhokun −16..−17 C°. Paneb sadegid 547 mm vodes.

Belojarskii om lidnankundan üks'jäine eländpunkt.

Eläjad

Vn 2010 kaiken Venäman rahvahanlugemižen mödhe eläjiden lugu oli 20 283 ristitud, rajonan kaks' koumandest. Kaikiš suremb lidnan ristitišt oli 20 tuh. eläjid da sen enamba vll 2007−2017 (20 282 rist. vl 2016). Vl 2017 lidnan ristitišt oli 20 142 eläjad.

Ortodoksižen hristanuskondan kaks' pühäpertid oma avaitud lidnas: ph. Serafim Sarovalaižen (saudihe vll 2002−2003 voziden 1996−2001 palanuden puižen sijas) i Kaikiden pühämehiden (2017). Islaman pühäpert' om letud vn 2007 jäl'ghe.

Rahvahad (enamba 0,5 % vl 2010): venälaižed — 68,7 %, ukrainalaižed — 8,2 %, totarlaižed — 5,3 %, hantilaižed — 2,7 %, vaugedvenälaižed — 1,8 %, kumikad — 1,7 %, baškiralaižed — 1,6 %, kirgizlaižed — 1,2 %, armenijalaižed — 0,6 %, čuvašalaižed — 0,6 %, tabasaranalaižed — 0,5 %, toižed rahvahad — 4,8 %, rahvahuden ozutandata — 2,3 %.

Belojarskijan politehnine kolledž om lidnan professionaližen opendusen aluzkundaks.

Lidnankundan pämez' om sen Deputatoiden Nevondkundan ezimez'. Edeline lidnan pämez' om Vladimir Vasik (sügüz'ku 2013 — 2018). Lidnan Administracijan pämez' om Najil' Basirov (Наиль Басыров) vn 2011 uhokuspäi.

Galerei

• 
  Belojarskijan rajonan administracijan sauvuz (2021)
• 
  Ph. Serafim Sarovalaižen jumalanpert', vn 2010 nägu
• 
  «Rostelekom:an» Hantin da Mansin filialan palakundan sauvuz (2021)
• 
  Üks' torguindkeskusišpäi (2021)
• 
  Kul'turan da lebun «Kamerton»-keskuz (2021)
• 
  Belojarskii-aerovagzalan sauvuz, vn 2021 nägu

Irdkosketused

• Belojarskii-lidnan tobmuden sait (admbelgor.ru). (ven.)